Osẹnobulua Dẹ Kẹ Mun Agbejele Re!
Osẹnobulua Dẹ Kẹ Mun Agbejele Re!
“Bhi ẹghe nọn bha yẹ ree gbe, ọluemhin-ebe ida yẹ ha ribhọ; Ọkpakinọn, ọne otọ nan ki ha yi ọsi ene mhọn ẹkẹ-omẹnhiẹn, ele dẹ manman ha sọnyẹnmhẹn bhi ẹkẹ ọfure nọn ha gba ije rebhe.”—PSALM 37:10, 11.
WỌ dẹ yẹẹ uwẹ rẹ nyẹnlẹn bhi agbọn nọn sẹ inian? Edandan iribhọ ghe ọ dẹ yẹẹ uwẹ. Emhin ne bunbun ribhọ ne rẹman ghe ọne ọta akhasẹ nan dẹ kẹ munsẹ.
Ene uhọnmhọn-ọta nin mhan ka zilo nyan da tẹmhọn ọta akhasẹ eso ne rẹman ghe “ẹghe ọkike” mhan ki da nyẹnlẹn. (2 Timothy 3:1-5) Nin mhan da sabọ ha mhọn iruduba, ọle zẹle nin Osẹnobulua da noo eria rẹ gbẹn ene ọta akhasẹ ọbhi ẹkẹ iBaibo. (Romans 15:4) Uwedẹ nin ene ọta akhasẹ rẹ ha munsẹ, rẹman ghe iloya dẹ kẹ fo bhi ọne agbọn nan.
Be ha sunu sade ẹghe ọkike ọsi ọne agbọn nan gbera fo? Agbejele nọnsi Osẹnobulua ki ha gbẹloghe ọrebhe bhi ọne agbọn nan. (Matthew 6:9) Ghe ebi Baibo yọle emhin dẹ diayẹ ẹghenin:
● Ohanmhẹn iyẹ da ha gbe ọsoso. “Ebale dẹ manman vuọn ọne otọ nan; ọ dẹ kpọfiara a bhi uke oke.”—Psalm 72:16.
● Emianmhẹn iyẹ da ha ribhọ. “A ida miẹn ọnọn nyẹnlẹn bhi enin nọn ha yọle: “Imẹn khọnmhon.’ ”—Isaiah 33:24.
● Ọne otọ nan ki kiẹn ọsọgbọn. “Ọne ojẹgbo bi ọne otọ nọn ka amẹn an dẹ ha ghọnghọn. Sẹyẹ, ọne ugbẹbubu ki mhọn-ose a bọsi eji aroro natiọle saffron da jẹre.”—Isaiah 35:1.
Emhin esili eso nin Baibo yọle e dẹ kẹ sunu, ele enan khin. Taman Esali Jehova nin ele rẹman uwẹ ebezẹle nin ele da rẹọbhọ ghe agbọn ọsọgbọn dẹ kẹ vae.