Ӱр ниместең чахсы чуртас полар
Ӱр ниместең чахсы чуртас полар
«Ӱр ниместең хара сағыстығ кізі чох пол парар... Амыр хылыхтығларға, тізең, чир ӱлӱске пирілер паза олар амыр чуртасха ӧрінерлер» (ПСАЛОМ 37:10, 11).
ПУ ухаанҷыластың толарын кӧрерге хынчазар ба? Ікінҷілес чоғыл, хынча поларзар! Пу ухаанҷылас ӱр ниместең толарына киртінерге ізестіг киречілестер пар.
Пу статьяларда «тӱгенҷі кӱннерде» чуртапчатханыбысты киречілепчеткен нинҷе-де ухаанҷылас ӱзӱрілген (2 Тимофейге 3:1—5). Худай пістің ізеніс ползын тіп нымысчыларын пу ухаанҷыластарны пас саларға кӧӧктірген (Римдегілерге 15:4). Оларның толчатханнары ам полчатхан сидіктернің ӱр ниместең чох пол парарын кӧзітчелер.
Анаң чи, ниме полар? Чир ӱстӱнде Худайның Хан-ӱлгӱзі устап пастир (Матфей 6:9, 10). Кӧріңер, ол туста полар алызығлардаңар Библияда хайди пазылча:
● Пірдеезі ӧзӧкпес. «Тамах чир ӱстӱнде толдыра полар, тағлар пастарында даа кӧп полар» (Псалом 72:16).
● Пірдеезі ағырбас. «Чуртағҷыларның пірдеезі мин ағырчам тібес» (Исаия 33:24).
● Чир нааҷылан парар. «Хуу паза суғ чох чир тың ӧрінер, хуу чазы кӧглир паза, шафран чіли, ӧңненер» (Исаия 35:1).
Пу, кізі кӧңнін кӧдірчеткен ухаанҷыластар, Библияда пазылған, ӱр ниместең тол парар ухаанҷыларның піреелері ле. Ноға ӱр ниместең чуртас чахсы саринзар алыс парарына киртінчеткеннерін Иегованың киречілерінең сур кӧріңер.