Ntangw’a Kiese Ifinamene!

“Finkolo-kolo kaka, e kimpumbulu, ladi: . . . Alembami bevwa nza; beyangalela muna mawete mayingi.”—NKUNGA 37:10, 11.

NGA ozolele mona e ndungana ungunza uyikilu ova ntandu? Elo, i wau ozolele. Vena ye kuma kiasikila mu kwikila vo ke kolo ko ungunza wau ulungana.

E malongi mantete m’Eyingidilu diadi masongele una ungunza wa Nkand’a Nzambi ukieseselanga vo mu “lumbu yambaninu” tuzingilanga. (2 Timoteo 3:1-5) Nzambi wavumunwina asoneki a Nkand’a Nzambi basakula mambu mama kimana twakala ye vuvu. (Roma 15:4) E ndungana ungunza wau isonganga vo e mpasi tumonanga owau, ke kolo ko zifokoka.

Nkia mambu mevangama kuna mfoko a lumbu yambaninu? Kintinu kia Nzambi kiyala wantu awonso. (Matai 6:9) Badika dina Nkand’a Nzambi keyikanga muna songa e mpila ina e zingu kia wantu kikala ova ntoto muna kolo kiakina:

● O wantu ke befwa diaka nzala ko. “O ulolo wa masa ukala muna nsi, yakuna ntandu a miongo, e mbongo andi ivwembeta nze Lebanone: Muna mavata mpe besakumuka nze mbundu a ntoto.”—Nkunga 72:16.

● Mayela ke mekala diaka ko. “O ntungi kevova ko vo, yela nyela.”—Yesaya 33:24.

● O ntoto ukitulwa se wampa. ‘E makanga ye nsi a kaya iyangalala, o nzanz’angidinginza umon’e kiese yo savuka nze nasisi.’—Yesaya 35:1.

O wau i ungunza wakete kaka wa Nkand’a Nzambi ulungana ke kolo ko. Mokena ye Mbangi za Yave kimana basasila ekuma bena ye vuvu vo ntangw’a kiese ifinamene.