Kwapili ku ka Ezahala Lika ze Nde!

“Ku sa na ni nakonyana ye nyinyani, mi ya maswe haa sa na ku ba teñi . . . Kono ba ba ishuwa ba ka luwa naha, ba ka ikola kozo ye tuna.”—SAMU 37:10, 11.

KANA mwa tabela ku bona bupolofita bo bu bulezwi fahalimu ha bu ka talelezwa? Ku si na ku kakanya, mwa tabela. Ku na ni mabaka a matuna ha lu swanela ku lumela kuli bupolofita bo, bu tuha bu talelezwa.

Mwa litaba ze felile, ku nyakisisizwe feela bupolofita bwa Bibele bu sikai bo bu bonisa hande kuli lu pila mwa “mazazi a maungulelo.” (2 Timotea 3:1-5) Mulimu naa susumelize bañoli ba Bibele ku polofita likezahalo zeo kuli lu ine lu na ni sepo. (Maroma 15:4) Bupolofita bo bu cwalo ha bu nze bu talelezwa ki sisupo sa kuli butata bo bu shutana-shutana bo lu kopana ni bona kacenu bu tuha bu fela.

Ku ka ezahalañi hamulaho wa mazazi a maungulelo? Mubuso wa Mulimu u ka busa batu kaufela. (Mateu 6:10) Ha lu nyakisiseñi ze i bulela Bibele ka za miinelo ye ka ba teñi mwa lifasi ka nako yeo:

● Tala ha i na ku ba teñi. “Buloto bu ka ba bo buñata mwa naha, mane ni fahalimu a malundu.”—Samu 72:16.

● Matuku a ka feliswa. “Ha ku na mutu . . . ya ka ipulela kuli: Na kula.”—Isaya 33:24.

● Lifasi li ka uncafazwa. “Lihalaupa li ka taba, ni lona lifasi le li omelezi; naha ye seta ya liuwa i ka wabelwa, i tunye lipalisa sina za mayangayanga.”—Isaya 35:1.

Bo ki bupolofita bu sikai feela bwa mwa Bibele bo bu susueza ili bo bu tuha bu talelezwa. Haike mu kupe Lipaki za Jehova kuli ba mi taluseze libaka ha ba kozwi ka ku tala kuli kwapili ku ka ezahala lika ze nde.