Teipa kuali tiitstosej

“Ayok uejkauas noja itstosej axkuajkualmej [...]. Pero tlakamej tlen moiknonekij iixpa toTeko itstosej ipan nopa kuali tlali uan tlauel pakisej, pampa yajaya kinteochiuas hasta mokauas” (SALMO 37:​10, 11).

¿MITSPAKTISKIA tikitas kema moaxitis ni tlajtolpanextili? Uelis kena. Onka miak tlamantli tlen techpaleuia ma timotemachikaj nechka moaxitis.

Ipan sekinok tlamachtili tikitakej se keski tlajtolpanextili tlen kinextia tiitstokej ipan “itlamia tonali” (2 Timoteo 3:​1-5). ToTeotsij kichijki se keskij tlakamej ma kiijkuilokaj tlen panoskia ipan ni tonali, uan kiampa ueliskia timotemachisej teipa kuali tiitstosej (Romanos 15:⁠4). Nopa tlajtolpanextili tlen nama moaxitia kinextia nechka tlamis tlen amo kuali.

¿Tlake panos kema tlamis itlamia tonali? ToTeotsij iTlanauatijkayo kinnauatis nochi maseualmej (Mateo 6:​9, 10). Xikita tlen Biblia kiijtoua:

● Nochi kipiasej tlen kikuasej. “Onkas miak trigo ipan nochi nopa tlali, uan hasta nopa kuatinij tlen onka ipan tepetinij ma temakasej inintlajka” (Salmo 72:16).

● Ayokmo aka mokokos. “Ayok kiijtosej para mokokouaj” (Isaías 33:24).

● Sampa elis tlayejyektsi. “Ipan nopa tonali elis keja pakis nopa uaktok tlali uan kampa tlatsitsika pampa xochiyouasej keja se yejyektsi xochitl” (Isaías 35:1).

Ni eli san se keski tlajtolpanextili tlen nechka moaxitis. Tlaj nojua tijneki tijmatis, xikiljui se tlen Jehová itlajtoltemakauaj ma mitsixtomili kenke uelis timotemachis teipa kuali tiitstos.