Dinako tše di Kgahlišago di Letše ka Pele!

“Go se gokae yo kgopo o tla be a se sa le gona . . . Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”—PSALME 37:10, 11.

NA O be o ka rata go bona boporofeta bjo bo tsopotšwego ka mo godimo bo phethagala? Ga go pelaelo gore o be o ka rata. Go na le mabaka a kwagalago a go dumela gore bo tla phethagala kgauswinyane.

Dihlogo tša pele ga se di hlahlobile tše dingwe tša diporofeto tša Beibele tšeo di bontšhago gabotse gore re phela “mehleng ya bofelo.” (2 Timotheo 3:1-5) Modimo o ile a budulela bangwadi ba Beibele gore ba bolele ditiragalo e sa le pele e le gore re ka ba le kholofelo. (Baroma 15:4) Go phethagala ga diporofeto tšeo go bolela gore mathata ao re lebeletšanago le ona ga bjale a tla fela kgauswinyane.

Ke’ng seo se tlago go latela mehla ya bofelo? Mmušo wa Modimo o tla buša batho ka moka. (Mateo 6:9) Ela hloko tlhaloso ya Beibele ya maemo ao a tlago go ba gona mo lefaseng nakong yeo:

● Tlala e tla fedišwa. “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”—Psalme 72:16.

● Malwetši a tla fedišwa. “Ga go na modudi yo a tla rego: ‘Ke a babja.’”—Jesaya 33:24.

● Lefase le tla tsošološwa. “Lešoka le tikologo e se nago meetse di tla hlalala gomme leganata le tla thaba la khukhuša go etša letšoba la safrona.”—Jesaya 35:1.

Tše ke tše sego kae tša diporofeto tše di kgothatšago tša Beibele tšeo di tlago go phethagala kgauswinyane. O re’ng o sa kgopele Dihlatse tša Jehofa gore di go bontšhe lebaka leo ka lona di kgodišegilego gore dinako tše di kgahlišago di letše ka pele?