Shamuj punllacunapica ali causaigumi tiagrin

“Cunanmanda asha punlla jipaca, nali runaca illangami. [...] Ashtahuangarin na jariyajcunami, alpataca japinga. Casilla ali causaihuanmi, ninanda cushijunajunga” (SALMO 37:10, 11).

¿CAI PROFECÍA pactarijta ricungapaj munapanguimanllu? Tucuicunallatami chaita munapanchi. Cai profecía ñallapacha pactarinataca seguropachami caita ushapanchi.

Caishuj temacunapica Bibliamanda huaquin profeciacunatami ricuparcanchi. Chai profeciacunaca ‘tucurimui punllacunapi’ causanajushcatami ricuchin (2 Timoteo 3:1-5). Taita Diosca cai tucuri punllacunapi imacunalla pasana cashcata escribichunmi huaquin jaricunataca paipa espíritu santohuan ayudarca. Chaimandami ñucanchicunaca shuj esperanzata chari ushapanchi (Romanos 15:4). Cai profeciacuna pactarijta ricushpami cunanbi charishca llaquicuna ñallapacha tucurina cashcata ricupanchi.

Tucurimui punllacuna jipaca ¿imashi pasanga? Taita Diospa Gobiernomi cai alpata mandanga (Mateo 6:9, 10). Bibliapimi imashina causaigu tianata villajun:

● Yarjaicunaca ñana tiangachu. “Pambapipash, jahua urcu umacunapipash, granocuna tiachunmi, maqui jundata shitanajunga” (Salmo 72:16).

● Ungüicunaca ñana tiangachu. “Chaipi causajcunaca, pipash na: ‘Ñucaca huañujunimi’ ninajungachu” (Isaías 33:24.)

● Mundo enteromi juyaillagu tucunga. “Jichushca chulunlla sirij pambaca, cushillami tucunga. Chaquishca yuracunapash cushijushpami juyailla rosas sisashna sisanga” (Isaías 35:1).

Cai profeciacunaca shamuj punllacunapi pactarinacunamandaca huaquingunallami can. Ashtahuan yachajungapaj munashpaca shuj testigo de Jehovatami ¿imamandata ali causaigu ñallapacha tianataca seguro capangui? nishpa tapuita ushapangui.