Aye ti nzoni aga nduru ti si awe!
Aye ti nzoni aga nduru ti si awe!
“A ngbâ kete, na fade azo ti sioni ayeke mbeni pëpe . . . Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”—PSAUME 37:10, 11.
MO YE ti bâ gango tâ tënë ti prophétie so ayeke na nduzu ge so? Kite ayeke pëpe so mo ye ti bâ ni. E yeke na anzoni raison ti mä na bê so a ga nduru ti ga tâ tënë awe.
A-article so ahon asara tënë na ndo ti ambeni prophétie ti Bible so afa polele so e yeke na “alango ti nda ni”. (2 Timothée 3:1-5). Nzapa amû yingo ti lo na azo so asû Bible ti fa tënë ti aye ni kozoni tongaso si e duti na beku (aRomain 15:4). So aprophétie so aga tâ tënë afa so akpale so e yeke wara laso aga nduru ti hunzi awe.
Nyen la ayeke si ande na peko ti alango ti nda ni? Royaume ti Nzapa ayeke komande ande na ndo ti azo kue (Matthieu 6:9). Bâ ambeni tënë so Bible atene na ndo ti dutingo ti aye na ndo ti sese na ngoi ni so:
● Nzara ayeke duti ande dä mbeni pëpe. “Fade le-kobe ayeke mingi na sese na li ti ahoto.”—Psaume 72:16.
● Kobela ayeke hunzi ande biani biani. “Fade wakodoro atene pëpe, Mbi yeke na kobela.”—Ésaïe 33:24.
● Sese ayeke ga pendere. “Fade yando na kuru sese ayeke na ngia; fade désert ayeke na tâ ngia na ambumba tongana rose.”—Ésaïe 35:1.
Aye so ayeke gi ambeni prophétie so ayeke ga tâ tënë na yâ ti kete ngoi. Ngbanga ti nyen mo hunda pëpe na aTémoin ti Jéhovah ti fa na mo ndani so ala mä na bê so aye ti nzoni aga nduru ti si awe?