Woyyitino Yanna Daggara Mule No!

“Bushuullu shiima yannalla keeshshitanno . . . Shaqqaddu kayinni baatto ragidhanno; atootenna keere afidhe hagiidhitanno.”—FAARSO 37:10, 11.

TINI masaalo woˈmitanna laˈˈa halchatto? Halchattoti dihuluullissannote. Tini masaalo muli yannara woˈmitannota ammanneemmo gede assitannonke taje no.

Saˈu birxichuwara, heeˈnoommohu “goofimarchu barra” ikkinota xawisse leellishshannote Qullaawu Maxaafi masaalo giddo mitella laˈnoommo. (2 Ximootewoosi 3:1-5) Maganu qullaawu ayyaanisinni tenne masaalo borreessinanni gede assinohu hexxo heedhannonke gedeeti. (Roomu Sokka 15:4) Qullaawu Maxaafi masaalo woˈmase xa noo qarri baalunku muli yannara baˈˈannota leellishshannote.

Goofimarchu barri gedensaanni mayi ikkanno? Maganu Mangiste alame woˈma gashshitanno. (Maatewoosi 6:9) Hanni Qullaawu Maxaafi hatte yannara uullate aana heeshsho hiittoota ikkitanno yaannoro laˈno:

● Hude diheedhanno. “Baatto gide laashshito; ilaallate aana jajju woˈmo.”—Faarso 72:16.

● Dhibbu diheeˈranno. “Tsiyooni heeˈranno manni giddo, ‘Dhiwamoommo’ yaannoha dianfanni.”—Isayaasi 33:24.

● Baatto haarooˈmitanno. “Molo baatto hagiidhitanno; halalli baattorano daraaro fultanno.”—Isayaasi 35:1.

Muli yannara woˈmitannote Qullaawu Maxaafite jawaachishshanno masaalo giddo kuri gamatella. Yihowa Farciˈraasine muli yannara woyyitino yanna daggannota huluullantannokkihu mayiraatiro kultannohe gede mayira dixaˈmatto?