Ica Ia Kera Gba Ga Tsô Tar Ua Hide A Doo!

“Shi côhin tsô iferor á kera lu ga . . . Kpa mbaasemaleghlegh yô, vea ya dyako u tar, á saan ve iyol sha mngee u bem.”—PASALMI 37:10, 11.

KWAGHÔRON u profeti u i ter sha heen ne una kura sha mi nahan, a doo u wee? A doo u je ka u henen a hen ga. Man atôakyaa nga a se fatyô u nan jighjigh ser, ica ia gba ga tsô kwaghôron u profeti la una kure sha mi yô.

Ngeren mba se tim sha mi ken ijime la, ôr kwagh u akaaôron a profeti kpuaa tseegh tsô, aa tese wang ér se mba “ken ayange a masejime” yô. (2 Timoteu 3:1-5) Aôndo yange na mbangeren Bibilo tsenga ôron ér akaa la aa er sha er se lu a ishimaverenkeghen yô. (Mbaroma 15:4) Er akaaôron a profeti ne a lu kuren sha mi hegen yô, kwagh la tese wang je ér mbamzeyol mba se lu tagher a mi hegen ne cii ica ia kera gba ga tsô vea bee.

Ayange a masejime ne aa karen kera yô, ka nyi ia ere? Tartor u Aôndo ua hemen uumace cii. (Mateu 6:9, 10) Nenge ase er Bibilo i tese er Tar ua lu hen shighe la yô:

● A bee a ijen vindi vindi. “Iyiav mbi̱ ngee shin tar sha ityouv mbi iwoov je kpaa.”—Pasalmi 72:16.

● A bee a angev vindi vindi. “Ma or u nan tem ker kpaa nana kera kaa ér: Kwagh nyoon mo, ga.”—Yesaia 33:24.

● A sôr tar ua hide a hingir dedoo. “Taaikyôngo man ikpoghonya vea lu sar sar, deserti una ember, una mondo er ishohough nahan.”—Yesaia 35:1.

Akaaôron a profeti a doon nga ken Bibilo kpishi, a ica ia gba ga tsô aa kure sha mi yô, se ter a heen kpuaa di tsô. Er nena u pine Mbashiada mba Yehova wer, ve pase u er i hii ve ve ne jighjigh ér, ica ia gba ga tsô tar ua hide a doo la ga?