Taimi Lelei Ange ‘i Mu‘a Pē!
Taimi Lelei Ange ‘i Mu‘a Pē!
“‘Oku toe si‘i pea mole ‘a ia ‘oku fai kovi . . . Ka ‘e ma‘u ‘a e fonua ‘e he fa‘a kataki; pea te nau fefiefia‘i ‘i he melino lahi.”—SĀME 37:10, 11.
TE KE sai‘ia ke sio ki he hoko ‘a e kikite ‘oku hiki ‘i ‘olungá? ‘Oku ‘ikai ha veiveiua, te ke pehē. ‘Oku ‘i ai e ngaahi ‘uhinga mālohi ke tui ai kuo vavé ni ke hoko.
Ko e ngaahi kupu ki mu‘á na‘e lāulea ai ki he ni‘ihi pē ‘o e ngaahi kikite Fakatohitapu ‘a ia ‘oku fakahaa‘i mahino ai ‘oku tau mo‘ui ‘i he “kuonga fakamui.” (2 Timote 3:1-5) Na‘e fakamānava‘i ‘e he ‘Otuá ‘a e kau hiki Tohi Tapú ke nau tomu‘a tala ‘a e ngaahi me‘a ko iá koe‘uhi ke lava ai ‘o tau ma‘u ‘a e ‘amanaki. (Loma 15:4) Ko e fakahoko ‘o e ngaahi kikite ko iá ‘oku ‘uhinga iá ko e ngaahi faingata‘a ‘oku tau fehangahangai mo ia he taimi ní kuo vavé ni ke ngata.
Ko e hā ‘e hoko hili ‘a e kuonga fakamuí? Ko e Pule‘anga ‘o e ‘Otuá ‘e pule mai ki he fa‘ahinga kotoa ‘o e tangatá. (Mātiu 6:9) Fakakaukau angé ki he fakamatala ‘a e Tohi Tapú ki he ngaahi tu‘unga he māmaní ‘i he taimi ko iá:
● ‘E fakangata ‘a e fiekaiá. “E i ai ae falukuga oe uite i he fonua i he tumutumu oe gaahi mouga, e gau‘eu‘e hono fua.”—Sāme 72:16, PM.
● ‘E fakangata ‘a e mahakí. “‘Oku ‘ikai ha nofo ai te ne pehe, ‘Oku ou mahaki.”—Aisea 33:24.
● ‘E fakafo‘ou ‘a e fo‘i māmaní. “E fiefia ae toafa moe botu lala koeuhi ko kinautolu, bea e fiefia ae botu liaki, bea fiji o hage koe lose.”—Aisea 35:1, PM.
Ko e ni‘ihi pē eni ‘o ha ngaahi kikite si‘i Fakatohitapu fakalototo‘a ‘a ia kuo vavé ni ke fakahoko. Ko e hā ‘oku ‘ikai te ke kole ai ki he Kau Fakamo‘oni ‘a Sihová ke nau fakahaa‘i atu ‘a e ‘uhinga ‘oku nau tuipau ai ‘oku ‘i ai ‘a e taimi lelei ange ‘i mu‘a pē?