Obusumi Oburungi Buli Haihi Kuhika!

“Baitu hasigaireho akacu kake omubi alihera . . . Baitu abaculezi baligwetwa ensi; balikyanganuka obwobusinge obwingi.”​—ZABULI 37:10, 11.

WAKUGONDEZE kurora obunabbi obwolekerwe eruguru nibuhikirizibwa? Amananu gali ngu n’okigonza. Haroho ensonga enungi ezirukukuleetera kwikiriza ngu buli haihi kuhikirizibwa.

Ebicweka ebitwaruga kurora bibalizeeho bumu ha bunabbi oburukwolekera kimu ngu tuli omu biro ebya ha mpero. (2 Timoseo 3:1-5) Ruhanga akaterekereza abahandiiki ba Baibuli kuranga ebintu ebi nukwo tusobole kutunga okunihira. (Abarumi 15:4) Okuhikirizibwa kw’obunabbi obu nikumanyisa ngu ebizibu ebiturukurabamu kasumi kanu nibiija kuhwaho omu kasumi akatali ka hara.

Kiki ekiribaho hanyuma y’ebiro ebya ha mpero? Obukama bwa Ruhanga bulirema abantu boona. (Matayo 6:9) Wetegereze omulingo Baibuli esoborramu enyikara eziriba omu nsi omu kasumi ako:

● Enjara erihwaho. “Halibaho omweru [gw’oburo] omu nsi, ha mutwe gwensozi.”​—Zabuli 72:16.

● Oburwaire nibwija kuhwaho. “Anyakuikarayo taligamba ati Ndi murwaire.”​—Isaya 33:24.

● Ensi niija kugarurwa buhyaka. “Irungu nensi eyomere birisemererwa; ibuga lirikyanganuka, liryakya ebyakyo.”​—Isaya 35:1.

Bunu buli bumu ha bunabbi bwa Baibuli oburukugarramu amaani kandi oburaahikirizibwa omu kasumi akatali ka hara. Habwaki otasaba Abakaiso ba Yahwe bakakwoleka ensonga habwaki nibakigumiza kimu ngu obusumi oburungi buli haihi kuhika?