Zwifhinga Zwi Takadzaho Zwi Tsini!
Zwifhinga Zwi Takadzaho Zwi Tsini!
“Si fhele mbilu, muvhi ha lalami . . . Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—PSALME YA 37:10, 11.
NAA ni nga takalela u vhona vhuporofita ho bulwaho afho nṱha vhu tshi ḓadzea? A zwi timatimisi uri ni nga zwi takalela. Hu na zwiitisi zwi pfalaho zwa u tenda uri vhu ḓo ḓadzea hu si kale.
Theroni dzo fhiraho ro haseledza vhuṅwe ha vhuporofita ha Bivhili vhune ha sumbedza zwavhuḓi uri ri khou tshila “maḓuvhani a vhufhelo.” (2 Timotheo 3:1-5) Mudzimu o hevhedza vhaṅwali vha Bivhili uri vha ambe hu tshee nga phanḓa nga vhuporofita honoho u itela uri ri vhe na fulufhelo. (Vha-Roma 15:4) U ḓadzea ha vhuporofita honoho zwi sumbedza uri vhuleme he ra sedzana naho zwino vhu ḓo fhela hu si kale.
Nga murahu ha maḓuvha a vhufhelo hu ḓo itea mini? Muvhuso wa Mudzimu u ḓo vhusa vhathu vhoṱhe. (Mateo 6:9) Ṱhogomelani uri Bivhili i ṱalusa uri zwiimo zwi ḓo vha hani kha ḽifhasi nga tshenetsho tshifhinga:
● Nḓala i ḓo fheliswa tshoṱhe. “Shangoni hu ḓo vha na muḓalo wa mavhele; dziṱhohoni dza dzithavha hu ḓo guma maḓaka.”—Psalme ya 72:16.
● Malwadze a ḓo fheliswa tshoṱhe. “Kha vho dzulaho fhano a huna ane a ḓo ri: Ndi a lwala.”—Yesaya 33:24.
● Shango ḽi ḓo vusuluswa. “Nga hu takale soga na ḽo omaho; na midavhi nga i khane i nake vhunga dzuvha.”—Yesaya 35:1.
Vhuporofita honoho vhu a ṱuṱuwedza vhukuma nahone ndi vhu si gathi fhedzi kha hoṱhe vhu re Bivhilini vhune ha ḓo ḓadzea hu si kale. Ndi ngani ni sa humbeli Ṱhanzi dza Yehova uri vha ni sumbedze zwine zwa ita uri vha vhe na fulufhelo ḽa uri zwifhinga zwi takadzaho zwi tsini?
