Anoophiya Mahiku Oohakalaliha!

“Atakhali anorimela nananoru: . . . Vano atthu òmàla anoreriwa vathí-va: anokhala-mu ni murettele womalela”.—ESALIMO 37:10, 11.

IIREKE mwaaniphavela oweha yiiraneyaka eprofesia eyo? Moohaanyiherya enimwiiraneya. Sookhala itthu sinceene sinnikupaliwa wira enimwiiraneya moohipisa.

Myaha sivinre sootthokiherya iprofesia vakhaani sinooniherya oratteene wira ninkhala “mahiku ookiserya”. (2 Timootheyo 3:​1-5) Muluku aahaaruma alipa-oomulepa Biibiliya olepa itthu iyo wira nikhalane nlipelelo. (aRoma 15:4) Wiiraneya wa iprofesia iyo onnooniherya oratteene wira mixankiho sinoomala moohipisa.

Exeeni enrowa okhumelela nuumala mahiku ookiserya? Omwene wa Muluku onrowa waalamulelaka apinaatamu otheene. (Matheyo 6:9) Nwehe makhalelo Biibiliya onihimya awe anrowa okhala okathi owo:

● Etala enoomala. “Mmatta mothene moruwerye solya sinjene: mattumuxa esareye iphyó”.​—Esalimo 72:16.

● Iretta sinoomala. “Khavo-tho onkela ohimya wira: ‘Miyo ki muretta’”.​—Yesaya 33:24.

● Elapo enoolokiheriwa. “Etakhwa n’itthaya yowuma etthapeke: othako otteliweke murima, ophuwaka ithutu”.​—Yesaya 35:1.

Iya iprofesia vakhaani paahi sa mBiibiliyani sinrowa wiiraneya moohipisa. Munoonela sai waavekela Anamoona a Yehova wootthokiheryani etthu enaakupaliha wira muhoolo makhalelo anooloka?