Wene Regbo Ima Mbeda Kada!

“Fuo rago ngbutuko, gbegberẽ boro adú nga ho berewe te; . . . Ono bayee aboro adía kumbo ringara, ki du na ngbarago tipa gu wenepia du kpaima.”​—TAMBUAHE 37:10, 11.

YA MO oni naida ka bi gu sangbanebi gumbayo ho kuari re si nadigi nirengo? Zanga kapa, oni naida aida ka bihe wo. Nyanyaki nduapai kinaho tipa ka ida nga si ima mbeda ka manga.

Gu kekeapai ye mbata fu gere fura tipa bete agu asangbaanebi nga ga Ziazia Kekeapai nga gu nayugo gupai nzunzu nga ani naraka ti “kusa rago.” (2 Timoteo 3:1-5) Ga Mbori toro adu kugii abakeke Ziazia Kekeapai i gumbapa agu apai re tipa wa ka ani rengbe kadu na maabangirise. (ARomo 15:4) Pa digo gu sangbaanebi re nayugo gupai nga gu fudifudiapai ani agbiatirani nani nika digo bambeda.

Ginipai nika manga tingbafuo yangara arame? Ga Mbori Kindo azoga arikaaboro dunduko. (Matayo 6:9, 10) Oni bingo gupai Ziazia Kekeapai agumbaha tipa wai raka nikadu auru kpotosende ti gu regbo re:

● I adia gomoro kusayo. ‘Zende ahe azuko rogo ringara kpaima; si aduwo rii abaagangara yo.’​—Atambuahe 72:16.

● I adia kaza kusayo. “A nga boro kporo sa ayá, ‘Mi nawoka’ te.”​—Yesaya 33:24.

● I asa kpotosende berewe nivovoho. “Ngbakungba na gu rago ugu auga adu na ngbarago, ngbi ngume angi ki mbumba na mbumbuda ahe; si ambumba kpaima.”​—Yesaya 35:1.

Gere gbua nga bete agu asangbaanebi nangarasa rani nga gu nika digo bambeda. Si angba gbe ka oni sana aDezire Yekova i yugu ndu gupai furoni du yó ti ni naa kido nga wene regbo ima mbeda kada.