Sambilileni Icebo ca kwa Lesa

Mulandu Nshi Lesa Asuminishisha Ububifi no Kucula?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe ububifi bwatendeke shani?

Ububifi pe sonde bwatendeke ilyo Satana abepele ubufi bwa kubalilapo. Pa kubala ilyo bamupangile, tali umubifi. Ali ni malaika uwapwililika, lelo “tatwalilile mu cine.” (Yohane 8:44) Atendeke ukufwaisha ukuti abantu balemupepa, nangu ca kuti Lesa fye e o abantu balingile ukulapepa. Satana abeleleke umwanakashi wa ntanshi, Efa, kabili amulengele ukumfwila ena ukucila ukumfwila Lesa. Adamu na o taumfwilile Lesa, akonkelele Efa. Ifyo Adamu acitile fyaletele ukucula ne mfwa.—Belengeni Ukutendeka 3:1-6, 17-19.

Ilyo Satana atunkile Efa ukukanaumfwila Lesa, apondokele ukuteka kwa kwa Lesa. Abantu abengi balikonkelela Satana no kukaana Lesa ukuba Kateka wabo. E ico, Satana e “kateka wa ici calo.”—Belengeni Yohane 14:30; Ukusokolola 12:9.

2. Bushe Lesa tapangile bwino abantu na bamalaika?

Lesa apangile abantu na bamalaika mu nshila ya kutila kuti baumfwila amafunde ya kwa Lesa bwino bwino. (Amalango 32:5) Lesa atupangile no buntungwa bwa kuisalila ukucita icisuma nelyo icabipa. Ubu buntungwa bulenga twalanga ifyo twatemwa Lesa.—Belengeni Yakobo 1:13-15; 1 Yohane 5:3.

3. Mulandu nshi Lesa asuminishisha ukucula?

Pali ino nshita, Yehova alisuminisha abantu ukupondokela ukuteka kwakwe. Cinshi acitila ifi? Afwaya cishibikwe ukuti abantu te kuti baiteke bwino ukwabula ena. (Yeremia 10:23) Pa myaka 6,000 iyo abantu babela pano calo, calimoneka apabuuta ukuti balifilwa ukuiteka. Bakateka abantunse balifilwa ukufumyapo inkondo, imisoka, ulufyengo, na malwele.—Belengeni Lukala Milandu 7:29; 8:9; Abena Roma 9:17.

Lelo abafwaya Lesa ukubateka, ifintu filabawamina. (Esaya 48:17, 18) Nomba line fye, Yehova akonaula amabuteko ya bantunse yonse. Bantu fye abasalapo ukutekwa na Lesa e bakapyana isonde.—Esaya 2:3, 4; 11:9; belengeni Daniele 2:44.

  4. Bushe ukutekanya kwa kwa Lesa kwatupeela ishuko nshi?

Satana aletila takwingaba umuntunse uwingaba ne cumfwila kuli Lesa. Ukutekanya kwa kwa Lesa kwalenga ifwe bonse ukulanga uo tufwaya ukuti aletuteka, nampo nga ni Lesa nelyo bantu. Ifyo tucita e filanga uo tufwaya ukuti aletuteka.—Belengeni Yobo 1:8-11; Amapinda 27:11.

5. Kuti twasala shani Lesa ukuba Kateka wesu?

Kuti twasala Lesa ukuba Kateka wesu nga twafwaya ukupepa kwa cine ukusambilisha ifyaba mu Cebo cakwe Baibolo, no kutwalilila muli uko kwine kupepa. (Yohane 4:23) Na kabili tatufwile ukulaitumpa mu mapolitiki na mu nkondo, nga filya na Yesu acitile.—Belengeni Yohane 17:14.

Satana abomfya amaka yakwe ku kulenga abantu ukuba ne mibele ne misango yabipa. Nga tatulecitako ifya musango yu, abanensu bamo na balupwa kuti baletupumya no kutukaanya. (1 Petro 4:3, 4) Kanshi tulingile ukusalapo ica kucita. Bushe tukasalapo ukula-ampana na bantu abatemwa Lesa? Bushe tukalaumfwila amafunde yakwe ayasuma? Nga tuleumfwila Lesa, tukashinina Satana ukuti alibepele ilyo alandile ukuti takuli umuntu nangu umo uwingomfwila Lesa.—Belengeni 1 Abena Korinti 6:9, 10; 15:33.

Nga mulefwaya ukwishibilapo na fimbi, belengeni icipandwa 11 icaba muli ici citabo, icitila Bushe Cinshi Baibolo Isambilisha?, icalembwa ne Nte sha kwa Yehova.

[Icikope pe bula 16]

Ico Adamu asalilepo ukucita calibipile icine cine

[Icikope pe bula 17]

Ifyo tusalapo ukucita filanga nampo nga tufwaya Lesa ukuba Kateka wesu nelyo iyo