Aprann avek Parol Bondye

Akoz Bondye i permet lemal ek soufrans?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Ki mannyer lemal ti konmanse?

Lemal ti konmanse lo later ler Satan ti koz sa premye mansonz. Satan pa ti ganny kree konman en move lanz. I ti en lanz parfe, me apre sa i ti aret “kontan laverite.” (Zan 8:44) I ti devlop sa dezir pour ganny adore, sa drwa ki Bondye tousel i annan. Satan ti koz manti avek Ev, sa premye madanm e i ti persyad li pour obeir li olye obeir Bondye. Adan ti swiv Ev e li osi i ti dezobeir Bondye. Sa desizyon ki Adan ti fer ti anmenn soufrans ek lanmor.​—Lir Zenez 3:1-6, 17-19.

Ler Satan ti ankouraz Ev pour dezobeir Bondye, i ti pe rebel kont souvrennte Bondye. Lamazorite imen in zwenn Satan par rezet Bondye konman zot Dirizan. Alor Satan in vin “sa enn ki gouvern lemonn.”​—Lir Zan 14:30; Revelasyon 12:9.

2. Eski i ti annan en defo avek kreasyon Bondye?

Bann imen ek lanz ki Bondye ti kree ti parfe e zot ti kapab obeir bann standar Bondye. (Deterononm 32:5) Bondye ti kree nou avek sa liberte pour swazir ant fer sa ki byen ek sa ki mal. Sa liberte i donn nou en loportinite pour nou eksprim nou lanmour pour Bondye.​—Lir Zak 1:13-15; 1 Zan 5:3.

3. Akoz Bondye in permet soufrans ziska aprezan?

Pour en pe letan, Zeova in toler sa rebelyon kont son souvrennte. Akoz? Pour montre ki napa okenn dominasyon apard sa ki pour Bondye ki kapab anmenn byenfe pour bann imen. Apre 6,000 an depi ki imen i egziste, sa kestyon in ganny regle. Bann dirizan imen pa’n reisi elimin lager, krim, lenzistis ek maladi.​—Lir Eklezyast 7:29; 8:9; Romen 9:17.

Par kont, bann imen ki aksepte Bondye konman zot dirizan i ganny bann byenfe. (Izai 48:17, 18; Zeremi 10:23) Byento, Zeova pou met en lafen avek tou bann gouvernman imen. Zis bann dimoun ki swazir pour ganny dominen par Bondye ki pou reste lo later.​—Izai 2:3, 4; 11:9; Lir Danyel 2:44.

 4. Ki rezilta pasyans Bondye?

Satan ti pretann ki napa personn ki kapab obeir Zeova fidelman. Pasyans Bondye i permet nou demontre si nou siport dominasyon Bondye ouswa dominasyon zonm. Nou montre sa par nou fason viv.​—Lir Zob 1:8-11; Proverb 27:11.

5. Ki mannyer nou swazir Bondye konman nou dirizan?

Nou swazir Bondye konman nou dirizan ler nou rode ki vre ladorasyon i enplike dapre son Parol, Labib e nou fer sanmenm. (Zan 4:23) Nou pa mel nou dan politik ek lager, zis parey Zezi ti fer.​—Lir Zan 17:14.

Satan i servi son lenfliyans pour promouvwar bann aksyon move e imoral. Ler nou aret fer sa ki mal, serten zanmi ek manm nou fanmir i kapab boufonn nou ouswa opoz nou. (1 Pyer 4:3, 4) Alor, nou annan en swa pour fer. Eski nou pou asosye avek bann dimoun ki kontan Bondye? Eski nou pou obeir son bann bon lalwa ki saz? Si nou fer li, nou prouve ki Satan ti pe koz manti kan i ti dir ki napa personn ki pou fer sa ki Bondye i demann li.​—Lir 1 Korentyen 6:9, 10; 15:33.

Pour plis lenformasyon, vwar sapit 11 dan liv Ki Labib i vreman dir? pibliye par Temwen Zeova.

[Portre lo paz 12]

Adan ti fer en move swa

[Portre lo paz 13]

Nou bann swa i montre si nou swazir Bondye konman nou Dirizan