Me Sauma na iVolatabu

Na Cava e Vakatara Tiko Kina na Kalou na Ca kei na Rarawa?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. A tekivu vakacava na ca?

A tekivu e vuravura na ca ena imatai ni lasu a cavuta o Setani. O Setani a dua na agilosi uasivi ena gauna a buli kina. Ia a qai “sega ni dei ena dina.” (Joni 8:44) E vinakata na sokalou e dodonu me caka duadua ga vei Jiova. A lasutaki Ivi na imatai ni yalewa qai rawai koya me talaidredre vua na Kalou. O Atama tale ga a tomani Ivi me talaidredre. Na vakatulewa i Atama e vakavuna na rarawa kei na mate.—Wilika Vakatekivu 3:1-6, 17-19.

Ni tukuna o Setani me talaidredre o Ivi vua na Kalou, e vakaraitaka tiko ni saqata na veiliutaki cecere i Jiova. E levu era tomani Setani nira besetaka me nodra iLiuliu na Kalou. E yaco gona o Setani me “turaga ni vuravura.”—Wilika Joni 14:30; Vakatakila 12:9.

2. E ca na ka e bulia na Kalou?

Na tamata kei na agilosi a bulia na Kalou a rawa sara ga mera cakava na veika e vinakata. (Vakarua 32:5) E solia na galala ni vakatulewa meda cakava na veika vinaka se ca. Na galala ni vakatulewa oya eda rawa ni vakaraitaka kina nida lomana na Kalou.—Wilika Jemesa 1:13-15; 1 Joni 5:3.

3. Na cava se vakatara tiko ga kina na rarawa na Kalou?

E vakatara voli mai ena loma ni dua na gauna o Jiova na saqati ni nona veiliutaki. Na cava na vuna? Me vakadinadinataki kina ni na guce na sasaga ni tamata me liutaki koya ga. (Jeremaia 10:23) Na 6,000 na yabaki ni bula ni kawatamata e sa vakalasui kina na ka e tukuni mai Iteni. E guce na veiliutaki vakatamata me vakaotia na ivalu, basulawa, ivalavala tawadodonu, kei na tauvimate.—Wilika Dauvunau 7:29; 8:9; Roma 9:17.

Ena yasana adua, o ira era digia na Kalou me nodra iLiuliu era vakila na kena yaga. (Aisea 48:17, 18) Sa voleka sara me na vakarusa o Jiova na matanitu kece vakatamata. O ira ga era digia me liutaki ira na Kalou era na bula e vuravura.—Aisea 2:3, 4; 11:9; wilika Taniela 2:44.

  4. Yaga vakacava na nona vosovoso na Kalou?

E tukuna o Setani ni sega ni dua ena yalodina se talairawarawa vei Jiova. Na nona vosovoso na Kalou eda rawa ni vakaraitaka kece kina se da tokona me veiliutaki na Kalou se na tamata. Ena laurai na noda vakatulewa ena ivakarau ni noda bula.—Wilika Jope 1:8-11; Vosa Vakaibalebale 27:11.

5. Eda na vakaraitaka vakacava nida digia me noda iLiuliu na Kalou?

Eda na vakaraitaka qori nida qara da qai muria na sokalou dina e yavutaki ena iVolatabu. (Joni 4:23) Eda na sega tale ga ni vakaitavi ena politiki kei na ivalu, me vakataki Jisu.—Wilika Joni 17:14.

E vakayagataka na nona kaukaua o Setani me uqeta kina na ivalavala vakasisila, kei na ivakarau ni bula e veivakaleqai. Nida cata na ivalavala va qori, era na rairai vosavakacacataki keda se tusaqati keda eso na noda itokani kei ira na wekada. (1 Pita 4:3, 4) Ena gadrevi meda vakatulewa. Eda na vakailala kei ira era lomana na Kalou? Eda na talairawarawa ina nona lawa na Kalou vuku qai dauloloma? Ke da cakava qori, eda sa vakalasuya tiko na nona tukuna o Setani ni sega ni dua ena cakava na ka e vinakata na Kalou.—Wilika 1 Korinica 6:9, 10; 15:33.

Me ikuri ni vakamacala, raica na wase 11 ni ivola qo, tabaka na iVakadinadina i Jiova.

[iYaloyalo ena tabana e 16]

Digidigi cala o Atama

[iYaloyalo ena tabana e 17]

Na noda vakatulewa ena kilai kina se da vinakata na Kalou me noda iLiuliu