Mụta Ihe N’okwu Chineke

Gịnị Mere Chineke Ji Kwe Ka Ihe Ọjọọ na Ahụhụ Dịrị?

Isiokwu a jụrụ ajụjụ ndị o nwere ike ịbụ na ị jụọla, ọ ga-egosikwa gị ebe ndị i nwere ike ịgụ na Baịbụl gị ga-aza gị ajụjụ ndị ahụ. Obi ga-adị Ndịàmà Jehova ụtọ ịkọwara gị azịza ha.

1. Olee otú ihe ọjọọ si malite?

Ihe ọjọọ malitere n’ụwa mgbe Setan ghara ụgha mbụ. Setan abụghị onye ọjọọ mgbe e kere ya. Ọ bụ mmụọ ozi zuru okè, ma ọ ‘guzosighị ike n’eziokwu.’ (Jọn 8:44) Ofufe ruuru naanị Chineke gụwara ya agụụ. Setan ghaara nwaanyị mbụ, bụ́ Iv, ụgha ma mee ka o rubere ya isi kama irubere Chineke isi. Adam sooro Iv nupụrụ Chineke isi. Ihe a Adam mere kpatara ahụhụ na ọnwụ.—Gụọ Jenesis 3:1-6, 17-19.

Mgbe Setan gwara Iv ka o nupụrụ Chineke isi, ihe o mere bụ ịgba ọchịchị Chineke mgba okpuru. Ọtụtụ mmadụ esonyerela Setan, ha achọghịkwa ka Chineke chịwa ha. Setan si otú ahụ ghọọ “onye na-achị ụwa.”—Gụọ Jọn 14:30; Mkpughe 12:9.

2. Ihe ndị Chineke kere hà nwere ntụpọ?

Ụmụ mmadụ na ndị mmụọ ozi Chineke kere nwere nnọọ ike irubere Chineke isi. (Diuterọnọmi 32:5) Chineke kere anyị otú anyị ga-enwe ike ịhọrọ ime ihe ọma ma ọ bụ ihe ọjọọ. Otú ahụ Chineke si kee anyị ga-eme ka anyị nwee ike igosi na anyị hụrụ ya n’anya.—Gụọ Jems 1:13-15; 1 Jọn 5:3.

3. Gịnị mere Chineke ji kwere ka ahụhụ dịrị?

Kemgbe e nupụchaara Jehova isi n’Iden, ọ gbachiri ndị na-enupụrụ ọchịchị ya isi nkịtị. N’ihi gịnị? Ọ bụ iji gosi na mgbalị ọ bụla ụmụ mmadụ mere ịchị onwe ha agaghị abara ha uru. (Jeremaya 10:23) Ugbu a ọ gaferela puku afọ isii ụmụ mmadụ dịwara ndụ, okwu a edoola anya. Ndị ọchịchị enwebeghị ike iwepụ agha, mpụ, ikpe na-ezighị ezi, na ọrịa.—Gụọ Ekliziastis 7:29; 8:9; Ndị Rom 9:17.

Ma ndị kwere ka Chineke chịwa ha na-erite uru. (Aịzaya 48:17, 18) N’oge na-adịghị anya, Jehova ga-ebibi ọchịchị ụmụ mmadụ. Ọ bụ naanị ndị kwere ka Chineke chịwa ha ga-eketa ụwa.—Aịzaya 2:3, 4; 11:9; gụọ Daniel 2:44.

 4. Olee uru ndidi Chineke baara ụmụ mmadụ?

Setan turu ọnụ na ụmụ mmadụ agaghị erubere Jehova isi ma kwesị ntụkwasị obi n’ebe ọ nọ. Ndidi Chineke na-enye anyị niile ohere igosi ma ànyị họọrọ ọchịchị Chineke ka ọ̀ bụ ọchịchị mmadụ. Ọ bụ otú anyị si ebi ndụ ga-egosi nke anyị họọrọ.—Gụọ Job 1:8-11; Ilu 27:11.

5. Olee otú anyị si egosi na anyị chọrọ ka Chineke chịwa anyị?

Anyị ga-egosi na anyị chọrọ ka Chineke chịwa anyị ma ọ bụrụ na anyị ejiri Okwu Chineke, bụ́ Baịbụl, chọpụta otú ọ chọrọ ka anyị si na-efe ya ma na-efe ya otú ahụ. (Jọn 4:23) Anyị agaghịkwa etinye aka na ndọrọ ndọrọ ọchịchị na agha, dị ka Jizọs na-etinyeghị.—Gụọ Jọn 17:14.

Setan na-eji ike ya eme ka ụmụ mmadụ na-eme omume rụrụ arụ ndị na-akpatara ha nsogbu. Ọ bụrụ na anyị ajụ ime omume ndị ahụ, ụfọdụ ndị enyi na ndị ikwu anyị nwere ike ịchị anyị ọchị ma ọ bụ megidewe anyị. (1 Pita 4:3, 4) N’ihi ya, anyị ga-ekpebirịrị ihe anyị ga-eme. Ọ̀ bụ ndị hụrụ Chineke n’anya ka anyị na ha ga na-akpa? Ànyị ga-erube isi n’iwu ndị o nyere anyị n’ihi na ọ hụrụ anyị n’anya? Ọ bụrụ na anyị emee otú ahụ, anyị ga-egosi na Setan ghara ụgha mgbe o kwuru na o nweghị onye ga-eme uche Chineke.—Gụọ 1 Ndị Kọrịnt 6:9, 10; 15:33.

Ọ bụrụ na ị chọrọ ịmatakwu banyere ihe a kọrọ n’isiokwu a, gụọ GỊnị n’Ezie Ka Bible Na-akụzi? isi nke 11 nke akwụkwọ a Ndịàmà Jehova bipụtara.

[Foto dị na peeji nke 16]

Adam họọrọ ime ihe ọjọọ

[Foto dị na peeji nke 17]

Ihe ndị anyị na-eme ga-egosi ma ànyị chọrọ ka Chineke chịwa anyị