Anyisha bua kulonga Dîyi dia Nzambi

Bua tshinyi Nzambi mmulekele malu mabi ne makenga?

Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu baYehowa nebikale ne disanka dia kuyukila nebe pa mandamuna aa.

1. Mmunyi muakabanga malu mabi?

Malu mabi akatuadija pa buloba pavua Satana mushime bua musangu wa kumpala. Uvua muanjelu muimpe pakamufukabu, uvua mupuangane kadi ‘kakimana mu bualu bulelela’ to. (Yone 8:44) Wakalekela dijinga dia kumutendelelabu kudi bantu pamutu pa kutendelelabu Nzambi dikola munda muende. Satana wakashima Eva, mukaji wa kumpala ne kumusakaye bua amutumikile pamutu pa kutumikilaye Nzambi. Adama wakatua ku tshia mukajende, kutombokelaye pende Nzambi. Bualu buvua Adama muenze buakatukebela makenga ne lufu.​—Bala Genese 3:1-6, 17-19.

Pavua Satana usaka Eva bua kutombokelaye Nzambi, uvua uluisha bumfumu bua Nzambi. Bantu ba bungi mbatue ku tshia Satana padibu babenga bua Nzambi kubalombolaye. Nunku Satana mmulue “mukokeshi wa buloba.”​—Bala Yone 14:30; Buakabuluibua 12:9.

2. Nzambi uvuaku mua kuikala mufuke bantu bibi anyi?

Nzambi uvua mufuke bantu ne banjelu bakumbane bimpe menemene bua kutumikilabu mikenji yende. (Dutelonome 32:5) Nzambi wakatupesha tshipedi tshia kudisuingula tshidi tshimpe anyi tshidi tshibi. Tshipedi etshi tshidi tshitupesha mushindu wa kumuleja mutudi bamunange.​—Bala Yakobo 1:13-15; 1 Yone 5:3.

3. Nzambi mmulekele makenga bua tshinyi?

Yehowa muanji kulekela bantu batombokela bumfumu buende bua tshikondo kampanda. Bua tshinyi? Bua kuleja ne: bionso bidi bantu benze bua kudilombola nkayabu mbipangile. (Yelemiya 10:23) Panyima pa bidimu 6 000 katshia Nzambi wafuka bantu, tshilumbu tshidi tshitangila bukokeshi ntshidikose. Mbulamatadi ya bantu mmipangile bua kujikija mvita, tshikisu, kansungasunga ne masama.​—Bala Muambi 7:29; 8:9; Lomo 9:17.

Kadi bantu badi bitabe Nzambi bua ikale Mfumuabu badi bapeta mabenesha. (Yeshaya 48:17, 18) Yehowa ukadi pa kubutula mbulamatadi ya bana ba bantu. Anu bantu badi basungule bua Nzambi kubakokeshaye ke basomba pa buloba.​—Yeshaya 2:3, 4; 11:9; bala Danyele 2:44.

  4. Lutulu lua Nzambi nduambuluishe bantu ku tshinyi?

Satan wakamba ne: bantu kabakulamata Nzambi ne kumutumikila to. Lutulu lua Nzambi ndutupeteshe mushindu wa kuleja bituikale basue bumfumu buende peshi bua bantu. Malu atudi tuenza ke adi aleja luseke lutudi.​—Bala Yobo 1:8-11; Nsumuinu 27:11.

5. Mmunyi mutudi mua kuleja ne: tudi basungule Nzambi bua ikale Mfumuetu?

Tudi tuleja mutudi basungule Nzambi bua ikale Mfumuetu patudi tutungunuka ne kukeba ntendelelu mulelela udi muashila pa Bible Dîyi dia Nzambi ne tutumikila malu adimu. (Yone 4:23) Tudi kabidi ne bua kubenga kubuelakana mu malu a tshididi ne mu mvita anu muvua Yezu muenze.​—Bala Yone 17:14.

Satana udi wenza mudimu ne bukokeshi buende bua kusaka bantu ku tshiendenda tshia masandi ne ku dienzelangana malu mabi. Patudi tubenga kuenza malu a mushindu eu, bamue balunda ne balela betu badi mua kutuseka peshi kutuluisha. (1 Petelo 4:3, 4) Dîba adi ke ditudi kumpala kua disungula. Netusungule bua kudisangisha ne bantu badi banange Nzambi anyi? Netutumikile mikenji yende ya meji idi ileja mudiye mutunange anyi? Tuetu benze nunku, netuleje ne: Satana uvua mushime pavuaye muambe ne: kakuena muntu udi mua kuenza disua dia Nzambi to.​—Bala 1 Kolinto 6:9, 10; 15:33.

Bua kumanya malu makuabu, bala nshapita wa 11 wa mukanda eu Bible utu ulongesha tshinyi menemene?, mupatula kudi Bantemu ba Yehowa.

[Tshimfuanyi mu dibeji 16]

Adama uvua muenze disungula dibi

[Tshimfuanyi mu dibeji 17]

Malu atudi tusungula bua kuenza adi aleja bituikale basue bua Nzambi ikale Mfumuetu