Funda ELizwini LakaZimu

Kubayini UZimu Avumela Ubumbi Nokutlhaga?

Isihlokwesi siphakamisa iimbuzo okungenzeka wazibuza yona, bese sikutjengisa bona ungazifumanaphi iimpendulo eBhayibhilinakho. AboFakazi BakaJehova bangakuthabela ukucoca nawe ngeempendulwezi.

1. Bathoma njani ubumbi?

Ubumbi bathoma ephasini lokha uSathana aleya amala wokuthoma. USathana bekangasimumuntu omumbi nekabunjwako. Bekayingilozi epheleleko kodwana ‘azange ahlale eqinisweni.’ (Jwanisi 8:44) Wathoma ukufisa ukukhulekela okungekwakaZimu kwaphela. USathana waleya amala emfazini wokuthoma, u-Efa, wamenza bona alalele yena kunoZimu. U-Adamu wahlanganyela no-Efa ekungalalelini uZimu. Isiqunto saka-Adamu senza kwaba nokutlhaga nokufa.—Funda uGenesisi 3:1-6, 17-19.

USathana nekaphakamisa bona u-Efa angalaleli uZimu, bekahlela ukuhlubuka ebukhosini bakaZimu. Inengi labantu lahlanganyela noSathana ekwaleni uZimu njengoMbusi. Ngalokho, uSathana waba ‘mbusi wephaseli.’—Funda uJwanisi 14:30; ISambulo 12:9.

2. Indalo kaZimu beyineemtjhapho?

Abantu neengilozi uZimu azibumbako bebangakghona ngokupheleleko ukulalela iimfuneko zakaZimu. (Duteronomi 32:5) UZimu wasibumba sinekululeko yokuzikhethela ukwenza okuhle nokwenza okumbi. Ikululeko leyo isinikela indlela esingatjengisa ngayo ithando lethu ngoZimu.—Funda uJakobosi 1:13-15; 1 Jwanisi 5:3.

3. Kubayini uZimu avumela ukutlhaga bekube nje?

Sekusikhathi eside uJehova akghodlhelela ukuvukelwa kobukhosi bakhe. Kubayini? Ukutjengisa bona awukho umzamo wokuzibusa ngaphandle kwakhe ongazuzisa abantu. (Jeremiah 10:23) Ngemva kweemnyaka ezi-6 000 yomlando wesintu, amaqiniso sekayabonakala. Ababusi babantu babhalelwe kuqeda ipi, ubulelesi, ukungalungi namalwelwe.—Funda uMtjhumayeli 7:29; 8:9; Roma 9:17.

Ngokuphambene nalokho, labo abamukela uZimu njengoMbusi wabo bazizuzisa bona. (Isaya 48:17, 18) Msinyana, uJehova uzokutjhabalalisa boke aborhulumende babantu. Ngilabo kwaphela abakhetha ukubuswa nguZimu abazokuhlala ephasini.—Isaya 2:3, 4; 11:9; funda uDanyela 2:44.

  4. Ukubekezela kwakaZimu kunikela liphi ithuba?

USathana wathi akekho umuntu ozokulalela uJehova ngokuthembeka. Ukubekezela kwakaZimu kusinikela ithuba lokutjengisa bona sisekela ukubusa kwakaZimu namtjhana komuntu. Sitjengisa ukukhetha kwethu ngendlela esiphila ngayo.—Funda uJobhi 1:8-11; Iziyema 27:11.

5. Simkhetha njani uZimu njengoMbusi?

Sikhetha uZimu njengoMbusi nesifuna begodu sikhulekela ngeqiniso ngokusekelwe eLizwini lakhe, iBhayibhili. (Jwanisi 4:23) Godu sibalekela ukuzihlanganisa nezepolotiki nezepi, njengombana kwenza uJesu.—Funda uJwanisi 17:14.

USathana usebenzisa amandlakhe ukuthuthukisa ukuziphatha okumbi nezenzo ezilimazako. Nesala izenzo ezinjalo, abanye babangani neenhlobo zethu bangahlekisa ngathi namtjhana basiphikise. (1 Pitrosi 4:3, 4) Singakhetha. Sizozihlanganisa nabantu abathanda uZimu? Sizoyilalela iimthetho yakhe ehlakaniphileko nenethando? Nesenza njalo, sifakazela bona uSathana bekaleya amala nekathi akunamuntu obekangenza lokho uZimu akutjhoko.—Funda u-1 Korinte 6:9, 10; 15:33.

Ukufumana ilwazi elingeziweko, qala isahluko-11 sencwadi le, Khuyini Kwamambala Okufundiswa YiBhayibhili?, egadangiswe boFakazi BakaJehova.

[Isithombe ekhasini 12]

U-Adamu wenza ukukhetha okumbi

[Isithombe ekhasini 13]

Ukukhetha kwethu kwembula bona sifuna uZimu abe Mbusi wethu namtjhana awa