Ithute Lentšung la Modimo

Ke ka Baka la Eng Modimo a Dumelela Bobe le Tlaišego?

Sehlogo se se rotoša dipotšišo tšeo o ka bago o ile wa ipotšiša tšona le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Bobe bo thomile bjang?

Bobe bo thomile lefaseng ge Sathane a be a bolela maaka a mathomo. Sathane e be e se yo mobe ge a be a hlolwa. E be e le morongwa yo a phethagetšego, eupša “ga se a ka a ema a tiile therešong.” (Johane 8:44) O ile a thoma go kganyoga borapedi bjo bo bego bo swanetše go lebišwa go Modimo feela. Sathane o ile a botša mosadi wa pele e lego Efa maaka gomme a mo kgodiša gore a kwe yena go e na le go kwa Modimo. Adama o ile a thekga Efa tabeng ya go se kwe Modimo. Phetho ya Adama e ile ya feleletša ka tlaišego le lehu.—Bala Genesi 3:1-6, 17-19.

Ge Sathane a be a šišinya gore Efa a se ke a kwa Modimo, e be e le go godiša borabele kgahlanong le bogoši bja Modimo. Batho ba bantši ba thekgile Sathane tabeng ya go gana Modimo e le Mmuši. Ka go re’alo Sathane o ile a ba “mmuši wa lefase.”—Bala Johane 14:30; Kutollo 12:9.

2. Na tlholo ya Modimo e be e fokola?

Batho le barongwa bao Modimo a ba hlodilego ba be ba ka kgona go latela ditekanyetšo tša Modimo ka mo go phethagetšego. (Doiteronomio 32:5) Modimo o re bopile re ena le tokologo ya go ikgethela go dira se se lokilego goba se sebe. Tokologo yeo e re dumelela gore re bontšhe lerato la rena la go rata Modimo.—Bala Jakobo 1:13-15; 1 Johane 5:3.

3. Ke ka baka’ng Modimo a dumeletše tlaišego?

Go fetile nako e itšego Jehofa a kgotleletše borabele bjo bo lego kgahlanong le bogoši bja gagwe. Ka baka la’ng? Bakeng sa go bontšha gore ga go na boiteko bja go buša ntle le yena bjo bo ka holago batho. (Jeremia 10:23) Kgang ye e ile ya rarollwa ka morago ga nywaga e 6 000 ya go phela ga motho. Mebušo ya batho e paletšwe ke go fediša ntwa, bošoro, go hloka toka le malwetši.—Bala Mmoledi 7:29; 8:9; Baroma 9:17.

Ka mo go fapanego, bao ba amogelago Modimo e le Mmuši wa bona ba a holega. (Jesaya 48:17, 18) Kgauswinyane, Jehofa o tla fediša mebušo ka moka ya batho. Batho bao ba kgethago go bušwa ke Modimo ke bona feela bao ba tlago go dula lefaseng.—Jesaya 2:3, 4; 11:9; bala Daniele 2:44.

  4. Go se fele pelo ga Modimo go re bulela sebaka sefe?

Sathane o ile a bolela gore batho ba be ba ka se botegele Jehofa. Go se fele pelo ga Modimo go nea rena ka moka sebaka sa gore re bontšhe ge e ba re rata go bušwa ke Modimo goba ke batho. Tsela yeo re phelago ka yona e bontšha gore re eme ka lehlakoreng lefe.—Bala Jobo 1:8-11; Diema 27:11.

5. Re ka kgetha bjang Modimo e le Mmuši?

Re kgetha Modimo e le Mmuši ka go tsoma borapedi bja therešo bjo bo theilwego Lentšung la gagwe, Beibele, le go ba go bjona. (Johane 4:23) E bile re phema go kgatha tema dipolitiking le dintweng, go etša ge Jesu a dirile.—Bala Johane 17:14.

Sathane o diriša matla a gagwe go kgothaletša boitshwaro bjo bo gobogilego le ditiro tše mpe. Ge re phema mekgwa e bjalo, ba bangwe ba bagwera ba rena le ba leloko ba ka re kwera goba ba re ganetša. (1 Petro 4:3, 4) Ka gona re swanetše go dira kgetho. Na re tla gwerana le batho bao ba ratago Modimo? Na re tla latela melao ya gagwe e bohlale le e lerato? Ge e ba re dira bjalo, re tla be re hlatsela gore Sathane o be a bolela maaka ge a be a re ga go motho yo a ka dirago seo Modimo a se bolelago.—Bala 1 Bakorinthe 6:9, 10; 15:33.

Bakeng sa tsebišo e oketšegilego, bona kgaolo 11 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Seswantšho go letlakala 16]

Adama o ile a dira kgetho e mpe

[Seswantšho go letlakala 17]

Dikgetho tšeo re di dirago di bontšha ge e ba re nyaka gore Modimo e be Mmuši wa rena