Lilongesa Ondaka Ya Huku

Omokonda Yatyi Huku Ayekelelako Ovivi no Nonkhumbi?

Monthele ei muna omapulo amwe hamwe uhole okulinga, nokulekesa apa movasi omakumbululo ao Mombimbiliya yove. Onombangi mba Jeova vena ehambu liokutomphola noove konthele yomakumbululo oo.

1. Oñgeni ovivi viahimbika?

Ovivi viahimbika kombanda yoohi etyi Satanasi apopia ounkhembi wotete. Etyi alingwa ankho Satanasi handingavivi. Oe ankho oandyu ihena onkhali, mahi “katualeleko okukala motyili.” (João 8:44) Oe ankho uhanda efendelo liatokala Huku. Satanasi wakemba Eva omukai wotete, emuhindila okutavela kwe, aanye Huku. Andau elipake kumwe na Eva okuhetavela ku Huku. Etyi tyalinga Andau tyaeta ononkhumbi nononkhia.—Tanga Gênesis 3:1-6, 17-19.

Etyi Satanasi ahongiliya Eva okuhetavela ku Huku, wahimbika okutyitukilapo Ouhamba wa Huku. Ovanthu ovanyingi velipaka kumwe na Satanasi okuyala Okutuminwa na Huku. Ngotyo Satanasi wakala “omutumini wouye.”—Tanga João 14:30; Revelação [Apocalipse] 12:9.

2. Okuti ovipuka Huku alinga ankho viapenga?

Ovanthu no noandyu Huku alinga ankho vapondola okutavela nawa-nawa ovitumino via Huku. (Deuteronômio 32:5) Huku wetutunga nepondolo liokuholovona okulinga etyi tyaviuka netyi tyapenga. Epondolo olio lituavela ondyila yokulekesa inkha tuhole Huku.—Tanga Tiago 1:13-15; 1 João 5:3.

3. Omokonda yatyi Huku ayekelako ovivi?

Mokueenda kuomuvo umwe, Jeova ukahi nokuyekelela oundyale ovanthu valingila ouhamba wae wavilapo. Omokonda yatyi? Opo alekese okuti ovanthu okulitumina ovo muene katyiveetela ouwa. (Jeremias 10:23) Pahe palamba omanima 6.000 outumini wovanthu, iya otyili tyikahi nokumoneka. Ovatumini vovanthu kavetyivilile okumanako ovita, noungangala, novivi nomauvela.—Tanga Eclesiastes 7:29; 8:9; Romanos 9:17.

Anthi, vana vetavela Okutuminwa na Huku tyiveetela ouwa. (Isaías 48:17, 18) Apa katutu, Jeova mamaneko omautumini aeho ovanthu. Ovanthu vana vaholovona okutuminwa na Huku ovo vala mavakakala kombanda yoohi.—Isaías 2:3, 4; 11:9; tanga Daniel 2:44.

  4. Oumphua-lundo wa Huku utuavela omphitilo yatyi?

Satanasi wati ovanthu kamavatualako okutavela Jeova noukuatyili. Oumphua-lundo wa Huku wavela atuho ondyila yokulekesa inkha tuapanda outumini wa Huku ine owovanthu. Onkhalelo tutyinda omuenyo wetu, ilekesa etyi tuaholovona.—Tanga Jó 1:8-11; Provérbios 27:11.

5. Oñgeni tuholovona okutuminwa na Huku?

Tuholovona okutuminwa na Huku tyina tuovola efendelo liotyotyili lielikuata Nondaka yae Ombimbiliya, nokuendelamo. (João 4:23) Tupu tulityilika okulipaka mopulitika no movita, ngetyi Jesus alingile.—Tanga João 17:14.

Satanasi uundapesa epondolo liae opo ahongiliye ovanthu okulinga oundalelapo novivi ovikuavo. Tyina tuanya ovituwa viatyo ovio, omapanga etu nombunga, pamwe vetulinga omukuele ine okutuyala. (1 Pedro 4:3, 4) Moluotyo, tuna okuholovona. Okuti matulingi oupanga novanthu vehole Huku? Matutavela ovitumino viae vionondunge noluembia? Inkha tulinga ngotyo, matulekesa okuti Satanasi wakemba, etyi ati nawike upondola okulinga etyi Huku apopia.—Tanga 1 Coríntios 6:9, 10; 15:33.

Opo unoñgonoke vali konthele oyo, tala okapitulu 11 komukanda ou, walingua no Nombangi mba Jeova Oityi Ombimbiliya Tyili Ilongesa?

[Olutalatu pefo 12]

Andau waholovona omapita

[Olutalatu pefo 13]

Etyi tuholovona tyilekesa inkha tuhanda Okutuminwa na Huku