Diospa Palabrampita Yachatsikïkuna

¿Imanirtaq hipakïkunatawan mana alli rurëkunata Dios rikaran?

Kë yachatsikïmi yanapashunki kikikipa Bibliëkichö tapukïnikikunapa respuestanta tarinëkipaq. Munaptikeqa, Jehoväpa testïgonkunam yanapariyäshunkiman.

1. ¿Imanötaq mana alli rurëkuna qallamurqan?

Patsachö mana alli rurëkunaqa qallamurqan, Satanás ulikunqampita o llullakunqampita patsëmi. Kë angeltaqa Dios kamarqan alli ruraqtam y hutsannaqtam, pero ‘rasonpa caqcunata’ mana gustarmi Diospa contran churakärirqan (Juan 8:44). Jehovällata adorana kanqanta musyëkarpis, pëta adorayänantam munarqan. Ëvata uliparninmi, Diosta cäsonampa rantin, pëta kë warmi cäsonampaq creiratsirqan. Adanpis warminta wiyarmi Diospa contran tikrarirqan, tsë ruranqanmi tsurinkunata kananyaq hipatsin y wanutsin. (Lei Génesis 3:1-6, 17-19.)

Diosta mana cäsonampaq Ëvata Satanás nirninmi, Jehovälla Ciëlochö y Patsachö mandakoq kanqanta mana kaqpaq churëkarqan. Casi llapan nunakunam Dioslla Ciëlochö y Patsachöpis mandakoq kanqanta mana kaqpaq churayashqa, tsëmi Satanasqa kë Patsachö “mana alli ruraqcunapa mandacoqnin” tikrashqa. (Lei Juan 14:30; Apocalipsis 12:9.)

2. ¿Mana alliku Dios kamanqan karqan?

Nunakunata y angelkunata Dios kamanqanqa llapampis hutsannaqmi kayarqan, y Diospa Leykunata wiyakïtapis puëdeyaqmi (Deuteronomio 32:4, 5). Alli kaqta o mana alli kaqta akrakunapaqmi Diosnintsikqa kamamarqantsik. Tsënö kamamanqantsikmi yanapamantsik kuyanqantsikta rikätsikunapaq. (Lei Santiagu 1:13-15; 1 Juan 5:3.)

3. ¿Imanirtaq kananyaq Dios hipakïkunata rikaräkun?

Jehovälla Ciëlochö y Patsachö mandakoq kanqampa contran churakäyänampaqqa, huk tiempolla kanampaqmi haqishqa. ¿Imapaq? Pë mana yanapaptinqa, tukï gobiernopis mana alli kanqanta rikätsikunampaqmi (Jeremías 10:23). Tsënö kanqanqa hoqta waranqa watakunachömi rikakashqa. Nunakunapa gobiernonkunaqa guërrakunata, mana alli rurëkunata y qeshyakunata manam ushakätsita puëdeyashqatsu. (Lei Eclesiastés 7:29; 8:9; Romanos 9:17.)

Pero kawëninkunachö Dios pushananta haqeqkunaqa, bendicionnintam chaskiyan (Isaías 48:17, 18). Jehoväqa ichikllachönam llapan gobiernokunata ushakäratsimunqa. Diospa Gobiernonchö këta munaqkunallam, kë Patsachö kawayanqa (Isaías 2:3, 4; 11:9; lei Daniel 2:44).

 4. Dios pacienciakoq kanqan, ¿imata ruranapaqtaq yanapamantsik?

Satanasqa ni huk nuna shonqupita patsë Diosta mana sirvenampaq kaqtam nirqan. Tsëmi, Dios pacienciakoq kanqan yanapamantsik kawënintsikwan y rurënintsikwan Diospa Gobiernonman o nunapa gobiernonman qaqanqantsikta rikätsikunapaq. (Lei Job 1:8-11; Proverbios 27:11.)

5. ¿Imanötaq Diosman qaqantsik?

Bibliapita yachatsikoq religionta ashirninmi, y yachakunqantsiknö rurarninmi (Juan 4:23). Hinamampis, Jesusnömi ni polïticaman ni kë mundopa pleitokïninkunaman mëtikuntsiktsu. (Lei Juan 17:14.)

Satanasqa puëdeq këninwanmi nunakunata rakchakunaman y mana alli rurëkunaman ishkitsin. Tsëkunata mana rurëta munashqaqa, itsa amïgontsikkuna y familiantsikkunapis penqakatsimäshun y tukï mana allikunata ruramäshun (1 Pedru 4:3, 4). Tsëkunapa pasarmi piman qaqanqantsiktapis rikätsikuntsik. ¿Jehoväta kuyaq nunakunamantsuraq qaqäshun? ¿Jehoväpa mandakïnintatsuraq wiyakushun? Wiyakurqa, manam pipis shonqupita patsëqa Diosta sirvenqatsu nir Satanás ulikunqanta o llullakunqantam rikätsikushun. (Lei 1 Corintios 6:9, 10; 15:33.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 11 kaq capïtulonta leiri, kë librotaqa Jehoväpa testïgonkunam rurayämushqa.

[20 kaq päginachö dibüju]

Adanqa mana alli kaqtam akrarqan

[21 kaq päginachö dibüju]

Imatapis akranqantsikwanmi rikätsikuntsik kawënintsikchö Dios yanapamänata munanqantsiktam