Diospa Palabranmanta yachay

¿Imanasqam Diosqa saqen mana allintawan ñakariyta?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Imaynatam rikurirqa mana allinqa?

Satanaspa punta llullakusqanwanmi mana allin rurayqa Allpapi qallarirqa. Diosqa mana pantaq angeltam unancharqa, ichaqa ‘manam cheqappichu kawsarqa’ (Juan 8:44). Jehová Dioslla yupaychana kaptinpas yupaychasqa kaytam munarqa. Llullakuspanmi Evata creerachirqa Diosta kasukunanmantaqa payta kasukunanpaq. Adanpas Eva hinam Diosta mana kasukurqachu, chay mana kasukusqanwanmi kunankama mirayninkunaqa ñakarinchik hinaspa wañunchik. (Leey Genesis 3:1-6, 17-19.)

Diosta mana kasukunanpaq Evata Satanas engañaspanqa Diospa contranpim churakurqa. Kamachiqnin kasqanta mana reqsikuspam yaqa lliw runakunaqa Satanasta qatipakunku, chaymi ‘kamachiqninkuña’ rikurirun. (Leey Juan 14:30; Apocalipsis 12:9.)

2. ¿Pantaqtachu Diosqa unancharqa?

Runakunata hinaspa angelkunataqa Diosmi unancharqa kamachisqankunata mana pantaspa kasukunankupaq (Deuteronomio 32:5). Allin ruray otaq mana allin ruray tanteakuqtam Dios unanchawarqanchik. Chayna unanchasqa kaspam kuyakuyninchikta qawachichwan. (Leey Santiago 1:13-15; 1 Juan 5:3.)

3. ¿Imanasqataq Diosqa ñakariyta saqerqa kunankama?

Huk tiempollapaqmi Diosqa Llapallan Kamachiq kasqanpa contranpi kaqkunata saqerqa. ¿Imanasqa? Paylla runakunapaq allin kamachiq kasqanta qawachinanpaq (Jeremias 10:23). Chaytam Dios qawachirqa 6 waranqa wata pasasqanpi. Runakunapa gobiernonqa manam chinkachiyta atinkuchu guerrata, ñakariyta, mana allin ruraykunata nitaq onqoykunatapas. (Leey Eclesiastes 7:29; 8:9; Romanos 9:17.)

Diospa nisqanman hina kawsaqkunam ichaqa vidankupi allin yanapasqa kanku (Isaias 48:17, 18). Jehová Diosmi chaylla chinkachinqa runakunapa gobiernonkunata. Diospa gobiernonta akllaq runakunallam kay Allpapi kawsanqaku (Isaias 2:3, 4; 11:9; leey Daniel 2:44).

 4. ¿Imapitaq yanapawanchik Diospa ancha pacienciakusqan?

Satanasmi nirqa mana pi runapas Diosman sonqo kay atisqanmanta. Dios pacienciakuptinmi imayna kawsasqanchikwan qawachinchik Paypa Gobiernonpaq otaq runapa gobiernonpaq kasqanchikta. (Leey Job 1:8-11; Proverbios 27:11.)

5. ¿Imaynatam qawachinchik Dioswan kasqanchikta?

Bibliapa nisqanman hina yachachiq religionta maskaspam hinaspa Bibliapa nisqanta kasukuspam (Juan 4:23). Chaynataq Jesusta qatipakuspa politicapiwan guerrakunapi mana chaqrukuspa. (Leey Juan 17:14.)

Satanasmi atiyninwan kallpanchachkan mana allinkunata ruranapaq. Chaykunata mana ruraptinchikmi wakin amistadninchikwan ayllunchikkunaqa burlakuwasun otaq sasachawasunpas (1 Pedro 4:3, 4). Tapukusun: ¿Diosta kuyaq runakuna hinachu kana? ¿Kasukusunchu kamachikuyninkunata? Chaynata ruraspaqa qawachisunmi Satanas llulla kasqanta, paymi nirqa Diosta mana pipas kasukunankumanta. (Leey 1 Corintios 6:9, 10; 15:33.)

Astawan yachayta munaspaqa qawariy ¿Imatapunim Bibliaqa yachachin? libropa 11 kaq yachachikuyninta, kay libroqa Jehová Diospa testigonkunapa rurasqanmi.

[14 kaq paginapi dibujo]

Adanmi mana allinta tantearqa

[15 kaq paginapi dibujo]

Imayna tanteasqanchikmi qawachin Diospa yanapaynin munasqanchikta