Diospa Siminmanta yachachikuykuna

¿Imaraykun Dios hinallata qhawan mana allin ruwayta ñak’ariytapas?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaynapin paqarirqan mana allin ruway?

Mana allinqa kay pachapi paqarirqan Satanás llullakuspa rimasqan p’unchaymi. Diosqa ch’uyatan chay angelta kamarqan, ichaqa ‘manan cheqaq-kay sonqonpi’ takyarqanchu (Juan 8:44). Dioslla derechoyoq yupaychasqa kananpaqqa. Saqran ichaqa sonqonpi wiñachirqan pay yupaychasqa kayta. Chaymi Evata q’oturqan payta kasukunanpaq, amataq Diostachu. Adanpas warmin hinan Diosta mana kasurqanchu, chay mana allin decidisqanraykutaq llapa miraynin runakuna wañuypi ñak’ariypi tarikunku. (Leey Génesis 3:1-6, 17-19.)

Evata q’otuspan Satanasqa Dioslla kamachinanpaq derechoyoq kasqan contra sayarirqan. Yaqa llapa runakunan Satanaspa munasqanta ruwanku manataqmi Diosta Kamachiqninkuta hinachu qhawarinku. Chhaynapin Saqra ‘kay pachapi kamachikuq qollanaman’ tukupun. (Leey Juan 14:30; Apocalipsis 12:9.)

2. ¿Imallapipas Dios pantarqanchu kamasqanpi?

Diospa kamasqan runakunapas angelkunapas atirqankun Diospa kamachikuyninkuna kasukuyta (Deuteronomio 32:4, 5). Hinaspapas Diosqa akllakuy atiytan qowarqanchis, ñoqallanchismanta allin kaqta otaq mana allin kaqta ruwanapaq. Chhaynapin Diosta sonqomanta munakusqanchista rikuchinchis. (Leey Santiago 1:13-15; 1 Juan 5:3.)

3. ¿Imaraykun Dios hinallata qhawashan ñak’ariykunata?

Huk tiempon Diosqa hinallata qhawashan pay contra hatariqkunata. ¿Imanaqtin? Chhaynapin rikuchinqa mana paypa yanapayninwan runaq kamachisqan mana allinpi tukusqanta (Jeremías 10:23). Ima iskayayña karqan chaypas, soqta waranqa watakunapi runaq kamachisqanqa sut’in kashan. Runaq gobiernonqa manan atirqanchu guerrakunata, wañuchinakuyta, mana chanin ruwaykunata ni onqoykunatapas tukuchiyta. (Leey Eclesiastés 7:29; 8:9; Romanos 9:17.)

Kawsayninkupi Dioswan pusachikuqkunan ichaqa allinninkupaq chayta ruwanku (Isaías 48:17, 18). Jehová Diosqa ñan tukuchinqaña runakunaq gobiernonta. Diospa Gobiernonta apoyaqkunallan kay pachapi tiyanqaku (Isaías 2:3, 4; 11:9; leey Daniel 2:44).

 4. ¿Imanaqtinmi Diospa pacienciakusqan allinninchispaq?

Satanasqa llapa runamantan nirqan Diospaq mana hunt’aq kanankuta. Pacienciakusqanraykun ñoqanchispaq tiempo kashan, chaypin imayna kawsasqanchiswan rikuchisunman Diospa kamachikusqan ladomantachu kashanchis icha runakunaqmantachu chayta. Chaymi Diospa pacienciakusqanqa allin llapa runapaq. (Leey Job 1:8-11; Proverbios 27:11.)

5. ¿Imaynatan Diospa ladonmanta kasunman?

Bibliamanta yachachiq religionta maskhaspa, chayman hina kawsaspa (Juan 4:23). Hinaspapas, Jesús hinan mana politicapi nitaq kay pachaq ch’aqwayninkunapi chaqrukunachu. (Leey Juan 17:14.)

Satanasqa atiyninwanmi imaymana mana allinkunata mast’arishan. Chay ruwaykunata mana munaqtinchisqa yaqapaschá familianchiskuna amigonchiskunapas asipayawasunman otaq cheqnikuwasunman (1 Pedro 4:3, 4). Chhaynaqa, kaykunatan decidinanchis kanqa: ¿Diosta munakuq runakunawanchu hukllachakusun? ¿Kasukusunchu Diospa kamachikuyninkunata? Chayta ruwaspaqa Saqra llulla kasqantan rikuchisun, paymi nirqan mana mayqen runapas Diospaq hunt’aq kananta. (Leey 1 Corintios 6:9, 10; 15:33.)

Astawan yachayta munanki chayqa ¿Imatapunin Biblia yachachin? nisqa librota qhaway 11 capitulota, chaytaqa Jehová Diospa testigonkunan ruwan.

[14 paginapi dibujo]

Adanqa mana allintan decidirqan

[15 paginapi foto]

Decidisqanchiswanmi rikuchisun munanchischu Dios pusariwananchista icha manachu chayta