Teki leri fu Gado Wortu

Fu san ede Gado e gi pasi taki ogri de èn taki sma e pina?

Na artikel disi e poti prakseri na sani di yu ben aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fa ogri bigin?

Di Satan fruteri a fosi lei, dan ogri bigin na grontapu. Satan no ben ogri di Gado meki en. A ben de wan engel sondro fowtu, ma „a no ben tanapu kánkan na ini a waarheid” (Yohanes 8:44). Safrisafri a bigin angri fu kisi na anbegi di Gado wawan abi reti na tapu. Satan fruteri Eva, a fosi uma, wan lei èn a kori en fu gi yesi na en na presi fu Gado. Adam teki Eva en sei èn a trangayesi Gado tu. A bosroiti di Adam teki meki taki pina nanga dede kon.​—Leisi Genesis 3:1-6, 17-19.

Di Satan ben kori Eva fu trangayesi Gado, dan na so a bigin meki sma opo densrefi teige Gado di abi a reti fu tiri. Moro furu sma teki a sei fu Satan èn den no wani Gado leki Tiriman. Na so Satan kon tron „a tiriman fu grontapu”.​—Leisi Yohanes 14:30; Openbaring 12:9.

2. Den sani di Gado meki no ben bun?

Gado meki libisma nanga engel na so wan fasi taki den man gi yesi dorodoro na den wet fu en (Deuteronomium 32:5). Gado gi wi a grani fu bosroiti gi wisrefi efu wi o du san bun noso san ogri. A grani disi di wi abi, e gi wi na okasi fu sori taki wi lobi Gado.​—Leisi Yakobus 1:13-15; 1 Yohanes 5:3.

3. Fu san ede Gado gi pasi taki sma e pina?

Sensi a ten fu Eden te nanga now, Yehovah gi pasi taki sma opo densrefi teige a tiri fu en. Fu san ede a du dati? Fu sori taki sani no o waka bun noiti te libisma wani tiri sondro en (Yeremia 10:23). Baka 6000 yari a tori dati kon na krin. Libisma tiriman no ben man tyari wan kaba kon na feti, ogridu, kruktudu nanga siki.​—Leisi Preikiman 7:29; 8:9; Romesma 9:17.

Na a tra sei, den sma di e teki Gado leki Tiriman e kisi wini (Yesaya 48:17, 18). Heri esi Yehovah o tyari wan kaba kon na ala libisma tirimakti. Soso den sma di wani saka densrefi na ondro a tiri fu Gado, sa libi na grontapu.​—Yesaya 2:3, 4; 11:9; leisi Danièl 2:44.

 4. Sortu okasi sma e kisi fu di Gado abi pasensi?

Satan taki dati libisma no o tan gi yesi na Gado. Fu di Gado abi pasensi, meki wi alamala abi na okasi fu sori efu wi wani a tiri fu Gado, noso fu libisma. Nanga a fasi fa wi e libi wi e sori sortu bosroiti wi teki na ini a tori disi.​—Leisi Yob 1:8-11; Odo 27:11.

5. Fa wi e teki Gado leki Tiriman?

Wi e sori taki wi e teki Gado leki Tiriman te wi e anbegi en na a yoisti fasi soleki fa en Wortu, Bijbel e taki (Yohanes 4:23). Boiti dati, neleki Yesus, wi no e teki prati na politiek afersi èn na feti.​—Leisi Yohanes 17:14.

Satan e gebroiki en makti fu gi sma deki-ati fu du hurudu nanga tra sani di no bun kwetikweti. Te wi e wai pasi gi den sortu sani dati, dan kande sonwan fu wi mati nanga famiriman o spotu wi, noso den o gens wi (1 Petrus 4:3, 4). Sobun, wi musu teki wan bosroiti. Wi o abi demakandra nanga sma di lobi Gado? Wi o gi yesi na den koni wet fu Gado di e meki wi kisi wini? Efu wi du dati, dan wi e sori taki Satan ben lei di a taki dati nowan sma ben o du san Gado taki.​—Leisi 1 Korentesma 6:9, 10; 15:33.

Efu yu wani sabi moro, dan luku kapitel 11 fu a buku disi, San Bijbel e leri wi trutru?, di Yehovah Kotoigi tyari kon na doro.

[Prenki na tapu bladzijde 16]

Adam teki wan bosroiti di no bun srefisrefi

[Prenki na tapu bladzijde 17]

Den bosroiti di wi e teki e sori efu wi wani Gado leki wi Tiriman