Fundza EVini LaNkulunkulu

Kungani Nkulunkulu Avumela Bubi Nekuhlupheka?

Lesihloko siphakamisa imibuto lokungenteka kutsi uke watibuta yona futsi siveta nekutsi ungatitfolaphi timphendvulo eBhayibhelini lakho. BoFakazi BaJehova batawukujabulela kucoca nawe ngaletimphendvulo.

1. Bacala njani bubi?

Bubi bacala emhlabeni ngesikhatsi Sathane acamba emanga ekucala. Abengasiye umuntfu lomubi ngesikhatsi adalwa. Abeyingilosi lete sono, kodvwa akazange ‘eme ecinisweni.’ (Johane 8:44) Waba nesifiso sekutsi kukhontwe yena esikhundleni saNkulunkulu. Sathane wacamba emanga ku-Eva, umfati wekucala, futsi wamenta walalela yena kunekutsi alalele Nkulunkulu. Adamu wahlanganyela na-Eva ekwedzeleleni Nkulunkulu. Sincumo sa-Adamu sabangela kuhlupheka kanye nekufa.—Fundza Genesisi 3:1-6, 17-19.

Ngesikhatsi Sathane atjela Eva kutsi angamlaleli Nkulunkulu, abevukela bukhosi baKhe. Bantfu labanyenti balandzele Sathane ngekutsi bangamemukeli Nkulunkulu njengeMbusi. Ngako-ke, Sathane ‘ungumbusi walelive.’—Fundza Johane 14:30; Sembulo 12:9.

2. Indalo yaNkulunkulu beyinesici yini?

Bantfu Nkulunkulu labebadalile, kanye netingilosi, bebangakhona kuyilalela ngalokuphelele imiyalo yakhe. (Dutheronomi 32:5) Nkulunkulu wasidala saba nenkhululeko yekukhetsa emkhatsini wekwenta lokuhle nobe lokubi. Lenkhululeko isenta sikwati kuveta lutsandvo lwetfu ngaNkulunkulu.—Fundza Jakobe 1:13-15; 1 Johane 5:3.

3. Kungani Nkulunkulu avumele kuhlupheka?

Kute kube ngunyalo, Jehova abesolo akubeketelela kuvukelwa kwebukhosi bakhe. Kungani? Kungobe ufuna kubonakale kutsi kute imetamo yekutibusa lengabazuzisa bantfu. (Jeremiya 10:23) Ngemuva kweminyaka lengu-6 000 yemlandvo webantfu, lemphikiswane iphendvulekile. Babusi behlulekile kucedza timphi, bugebengu, kungalungi, kanye netifo.—Fundza Umshumayeli 7:29; 8:9; Roma 9:17.

Ngalokwehlukile kuloku, labo labemukela Nkulunkulu njengeMbusi wabo batizuzisa bona. (Isaya 48:17, 18) Madvutane, Jehova utawucedza bonkhe bohulumende labakhona. Labo labakhetsa kubuswa nguNkulunkulu ngibo kuphela labatawuhlala emhlabeni.—Isaya 2:3, 4; 11:9; fundza Danyela 2:44.

  4. Kubeketela kwaNkulunkulu kuvula liphi litfuba?

Sathane watsi kute bantfu labebatawulalela Jehova ngebucotfo. Kubeketela kwaNkulunkulu kuvula litfuba lekutsi sonkhe sivete kutsi sikhetsa kubuswa nguYe nobe bantfu. Indlela lesiphila ngayo iveta loko lesikukhetsako.—Fundza Jobe 1:8-11; Taga 27:11.

5. Simkhetsa njani Nkulunkulu kutsi abe nguMbusi wetfu?

Sisuke sikhetsa Nkulunkulu kutsi abe nguMbusi wetfu nasifuna inkholo yeliciniso lesekelwe eVini lakhe liBhayibheli, futsi siphila ngekuvumelana nayo. (Johane 4:23) Kufanele singatingeneli tindzaba tetembangave kanye netimphi, njengobe nje naJesu enta.—Fundza Johane 17:14.

Sathane usebentisa emandla akhe kute akhutsate kutiphatsa lokungcolile, nalokuyingoti. Nasikubalekela kutiphatsa lokunjalo, bangani kanye netihlobo tetfu bangase bakhulume kabi ngatsi nobe basiphikise. (1 Phetro 4:3, 4) Ngako-ke, kutawudzingeka sikhetse. Sitawutihlanganisa nebantfu labatsandza Nkulunkulu yini? Sitawuyilalela yini imitsetfo yakhe lehlakaniphile naleveta lutsandvo lwakhe? Nasenta kanjalo, sitawube sifakazela kutsi Sathane wacamba emanga ngesikhatsi atsi kute lotawulalela Nkulunkulu.—Fundza 1 Khorinte 6:9, 10; 15:33.

Kute utfole kwatiswa lokubanti, fundza sehluko 11 salencwadzi, Lifundzisani Mbambambamba LiBhayibheli?, leshicilelwa boFakazi BaJehova.

[Sitfombe ekhasini 12]

Adamu wenta sincumo lesibi

[Sitfombe ekhasini 13]

Tincumo lesitentako tiyaveta yini kutsi sifuna kubuswa nguNkulunkulu?