Hen Kwagh Ken Mkaanem Ma Aôndo

Er Nan Ve Aôndo a De Ér Kwaghbo man Ican i Yan I̱ Za Hemene?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Kwaghbo yange hii nena?

Kwaghbo yange hii sha tar shighe u Satan er aie u hiihii la. Yange i gba Satan lu or u bo ga. Yange lu ortyom u vough, nahan cii kpa á kera “tile sha mimi ga.” (Yohane 8:44) Yange soo ér i gema nan un icivir i i lu i Yehova tseegh la. Satan tsugh Ifa, kwase u hiihii la, a mgbegha un a ungwa imo na, a gema a hemba Aôndo ato. Adam kpa dondo Ifa sha u hemban Aôndo ato. Kwagh u Adam er ne gema va a ican i yan man ku.—Ôr Genese 3:1-6, 17-19.

Shighe u Satan ôr kwagh a Ifa sha u a hemba Aôndo ato la, lu van a ihyembeato sha hemen u Yehova u sha won cii la. Ikpela i uumace ta ikyaa a Satan sha u vendan hemen u Aôndo. Sha nahan yô, Satan hingir “Tor u tar ne.” Ôr Yohane 14:30; Mpase 12:9.

2. Aôndo yange gba akaa lu a mshii?

Uumace man mbatyomov mba Aôndo gba la cii lu vough, nahan lu u vea fatyô u kuran atindi a Aôndo. (Duteronomi 32:5) Aôndo yange gba se, na se ian i tsuan u eren kwagh u dedoo shin u bo. Ian ne gema bugh se gbenda u tesen ser Aôndo doo se ishima.—Ôr Yakobu 1:13-15; 1 Yohane 5:3.

3. Er nan ve Aôndo a ne ican i yan iana?

Yehova wa ishima a ihyembeato i yange i va a mi sha hemen na la shighe kar hegen. Er nan man a we ishima nahana? A er nahan sha u tesen ér iniôngon i uumace ve lu nôngon ér vea hemen ayol a ve a na shio la ia lu ve a iwasen ga. (Yeremia 10:23) Akaa aa a er ken atô u anyom a a kar hegen 6,000, hii shighe u uumace hemba ato la je, tese ér ka Aôndo tseegh a kom u hemen ye. Utor mba tar ne kanshio u been a ityav man ifer man ijirôron i sha mimi ga man angev kpaa.—Ôr Orpasenkwagh 7:29; 8:9; Mbaromanu 9:17.

Nahan cii kpa mba ve de ér Aôndo a hemen ve yô ve zua a mbamtsera kpishi. (Yesaia 48:17, 18) Ica a gba ga tsô, Yehova una tim ugomoti mba uumace cica cii kera. Ka mbara mba ve lumun ér Aôndo a̱ hemen ve la tseegh vea ya dyako u tar ye.—Yesaia 2:3, 4; 11:9; ôr Daniel 2:44.

  4. Ka ian i nyi ishimawan i Yehova la i ve a mini?

Satan senge ér or môm tsô kpa nana fatyô u tilen sha mimi hen Yehova ga. Kpa ishimawan i Aôndo la i na hanma wase ian i tesen aluer ka hemen u Aôndo nan soo shin ka u uumace yô. Man ka gbenda u se eren uma wase la ua tese kwagh u se tsough la ye.—Ôr Yobu 1:8-11; Anzaakaa 27:11.

5. Se tsua Aôndo ser a̱ lu Orhemen wase nena?

Ka se tese ser se tsua Aôndo ser a̱ lu orhemen wase sha u keren mcivir u a lu u mimi la shi dondon gbenda shon u civir un sha mimi, er i tese ken Bibilo i i lu Mkaanem nav la nahan. (Yohane 4:23) Shi a gba u mayange je se nyôr iyol ken pati u eren man ityav mbi nôngon ga, vough er Yesu kpa er nahan.—Ôr Yohane 17:14.

Satan ka a er tom a tahav nav sha u samber a anza a bo kua aeren a wang ga. Alaghga ahuraior a ase man anmgbianev asev vea lam sha a vese dang shin vea hendan a vese zum u se venda u eren aeren ne yô. (1 Peteru 4:3, 4) Nahan a gba u se tsua kwagh u se er yô. Se tsua u lun vea ior mba Aôndo a doo ve ishima laa? Se kura atindi na a a we se sha dooshima shi a tese kwaghfan la kpa? Aluer se er nahan yô, se tese ser kwagh u Satan yange senge ér or môm kpa nana fatyô u eren kwagh u Aôndo a soo ga la ka aie.—Ôr 1 Mbakorinte 6:9, 10; 15:33.

Wea soo u seer zuan a iwanger yô, ôr ityough ki sha 11 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Foto u sha peeji 24]

Adam tsua kwaghbo

[Foto u sha peeji 25]

Akaa a se tsough u eren ken uma wase la aa tese ér se lumun ser Aôndo a̱ lu Orhemen wase shin se lumun ga