Skip to content

Skip to table of contents

Nkaambo nzi Leza Ncazumizya Bubi Akupenga?

Nkaambo nzi Leza Ncazumizya Bubi Akupenga?

Amwiiye Ncolyaamba Jwi Lya Leza

Nkaambo nzi Leza Ncazumizya Bubi Akupenga?

Cibalo eeci cili amibuzyo imwi ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino cibi cakatalika buti?

Cibi cakatalika anyika ciindi Saatani naakabeja ciindi cakusaanguna. Saatani tanaakalengwa kali mubi. Wakali mungelo uulondokede, pele “kunyina naakakakatila mukasimpe.” (Johane 8:44) Wakatalika kuyanda kukombwa kwakeelede buyo Leza alikke. Saatani wakabeja kumukaintu wakusaanguna, Eva, akumoongelezya kuti aswiilile nguwe kutali Leza. Adamu awalo wakamusangana Eva mukuzangila Leza. Ncaakacita Adamu cakaleta kupenga alimwi alufu.—Amubale Matalikilo 3:1-6, 17-19.

Ciindi Saatani naakaambila Eva kuti asotoke mulawo wa Leza, wakazangila bweendelezi bwa Leza. Bantu banji bamusangana Saatani mukukazya Leza kuba Mweendelezi. Aboobo Saatani wakaba “mweendelezi wanyika.”—Amubale Johane 14:30; Ciyubunuzyo 12:9.

2. Sena kuli cakalubide kuzilenge zya Leza?

Bantu abangelo mbaakalenga Leza bakali kukonzya kucita nzyayanda Leza. (Deuteronomo 32:5) Leza wakatulenga akutupa lwaanguluko lwakulisalila kucita cibotu naa cibi. Kulisalila ooku kutupa coolwe cakutondezya luyando lwesu kuli Leza.—Amubale Jakobo 1:13-15; 1 Johane 5:3.

3. Nkaambo nzi Leza ncaazumizya kupenga ?

Kuzwa ciindi cabuzangi mu Edeni, Jehova walekela buzangi kubweendelezi bwakwe kuti kabuliko. Nkaambo nzi? Kutegwa atondezye kuti kunyina bweendelezi bumbi bukonzya kugwasya bantu kunze lyabweendelezi bwakwe. (Jeremiya 10:23) Ikaambo kabambwa nokwainda myaka iili 6,000 kuzwa muntu naakalengwa. Ibaleli bamunyika baalilwa kumana nkondo, bugwebenga, kutalulama alimwi amalwazi.—Amubale Mukambausi 7:29; 8:9; Baloma 9:17.

Mukwiimpana, aabo bazumina Leza kuba Muleli wabo bagwasyigwa. (Isaya 48:17, 18) Ino-ino, Jehova uyoozinyonyoona mfulumende zyabantu zyoonse. Bantu balikke aabo basala kweendelezyegwa a Leza mbabayookkala munyika.—Isaya 2:3, 4; 11:9; amubale Daniele 2:44.

4. Ino kutupa coolwe nzi kukkazika moyo kwa Leza?

Saatani wakaamba kuti bantu tabakonzyi kuzumanana kumumvwida Leza. Kukkazika moyo kwa Leza kutupa coolwe toonse cakuti tutondezye naa tuyanda bulelo bwa Leza naa bwabantu. Tulatondezya kusala kwesu kwiinda mubukkale bwesu.—Amubale Jobu 1:8-11; Tusimpi 27:11.

5. Ino tutondezya buti kuti Leza ngo Mweendelezi?

Tulatondezya kuti Leza ngo Mweendelezi kwiinda mukuyandaula akutobela bukombi bwakasimpe kweelana ancolyaamba Jwi lyakwe, Bbaibbele. (Johane 4:23) Alimwi tatutoli lubazu mutwaambo twacisi amunkondo mbubwenya mbuli Jesu mbwakacita.—Amubale Johane 17:14.

Saatani ubelesya nguzu zyakwe kukulwaizya bukkale bwakutalilemeka abwakucita micito mibi. Beenzuma abamukwasyi balakonzya kutufwubaazya naa kutukazya ciindi notukaka micito eeyi. (1 Petulo 4:3, 4) Aboobo kusala nkukwesu. Sena tunakuyanzana abantu bamuyanda Leza? Sena tunakwiitobela milawo yakwe yaluyando abusongo? Ikuti naa tulacita oobu, tutondezya kuti Saatani wakabeja naakaamba kuti kunyina muntu uukonzya kucita ncaamba Leza.—Amubale 1 Bakolinto 6:9, 10; 15:33.

Kutegwa muzyibe zinji, amubone cibalo 11 mubbuku eeli, lyakamwaigwa a Bakamboni ba Jehova.

[Cifwanikiso icili apeeji 16]

Adamu wakasala kucita cibi

[Cifwanikiso icili apeeji 17]

Nzyotusala zilatondezya kuti naa tuyanda Leza kuba Mweendelezi wesu