Wantuku masiya xTachuwin Dios

¿Tuku xlakata Dios masta talakaskin kaʼanalh tuku nitlan chu tapatin?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo, lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿La lakatsukulh tuku nitlan?

Wantuku nitlan lakatsukulh Katiyatni akxni Satanás wa xapulana takgsanin. Akxni Dios tlawalh uma ángel tlan xlikatsi chu ni xkgalhi talakgalhin, pero «ni tamakgxtakgli kxaxlikana» (Juan 8:44, NM). Alistalh tsukulh lakpuwan pi xkakninanika, pero uma kajwatiya kiMalakatsukinakan lakgchan. Akgskgawilh Eva xapulana puskat xlakata wa xkgalhakgaxmatnika nixawa Jehová. Adán na ni kgalhakgaxmatli Dios, chuna kamatitaxtinilh lhuwa tapatin chu linin putum xkamanan. (Kalikgalhtawakga Génesis 3:1-6, 17-19.)

Akxni Satanás wanilh Eva pi ni xkgalhakgaxmatli Dios, xlimasiyama pi Dios ni lakgchan namapakgsinan. Xlakata lhuwa tiku lakatayamakgolh xTamapakgsin Dios chu tlawamakgolh la Satanás, la uku litaxtu «xapuxku yunu nkatuxawat». (Kalikgalhtawakga Juan 14:30; Apocalipsis [Revelación] 12:9.)

2. ¿Nitlan xwanit tuku tlawalh Dios?

Latamanin chu ángeles, Dios katlawalh chuna la tlan putum xkgalhakgaxmatkgolh xlimapakgsin (Deuteronomio 32:4, 5). Dios kinkatlawan xlakata tlan xlaksakwi tuku tlan chu tuku nitlan. Xlakata chuna kinkatlawan tlan nalimasiyaniyaw pi paxkiyaw. (Kalikgalhtawakga Santiago 1:13-15; 1 Juan 5:3.)

3. ¿Tuku xlakata Dios mastanit talakaskin pi kaʼanalh tapatin?

Jehová mastama talakaskin pi kaj ni lhuwa kilhtamaku nalakatayakan xtamapakgsin. ¿Tuku xlakata? Xlakata nalimasiya pi ni anan akgtum tamapakgsin nema tlan nakamakgtaya latamanin komo ni wa Jehová wilinit (Jeremías 10:23). Uma akgchaxan milh kata nema titaxtunita litasiyanit pi latamanin nila xakstukan mapakgsinankgo. Mapakgsinanin xalak Katiyatni nila masputukgo guerra, tiku lakatsalakgo limapakgsin, tiku latlawani tuku nitlan chu tajatat. (Kalikgalhtawakga Eclesiastés 7:29; 8:9; Romanos 9:17.)

Pero wantiku Dios kapulalin lu tlan kitaxtunikgo (Isaías 48:17, 18). Nialh makgas Dios nakamasputu mapakgsinanin. Kaj watiya tiku natatayakgo xTamapakgsin Dios nalatamakgo kKatiyatni (Isaías 2:3, 4; 11:9; kalikgalhtawakga Daniel 2:44).

 4. ¿La kinkamakgtayayan xlakata ni lakapala sitsi Jehová?

Satanás wa pi ni anan chatum lataman tiku ni makgatsankganani Dios. Xlakata Jehová mastamaku kilhtamaku tlan nalimasiyayaw pi wa tatayayaw xtamapakgsin o xla latamanin. (Kalikgalhtawakga Job 1:8-11; Proverbios 27:11.)

5. ¿La tatayayaw xtamapakgsin Dios?

Naputsayaw chu natlawayaw tuku katsinitilhamaw kxaxlikana takanajla nema masiya tuku takilhtinit kBiblia (Juan 4:23). Na ni makgtanuyaw kpolítica chu kxtaʼakglhuwitkan kakilhtamaku, chuna la tlawalh Jesús. (Kalikgalhtawakga Juan 17:14.)

Satanás limaklakaskin xlitliwakga xlakata nakamatlawi latamanin talakgxtumit xalimaxana chu nitlan tayat. Komo ni tlawayaw umakgolh tayat max kiʼamigoskan o kifamiliajkan nakinkalilitsinkgoyan o max lu nitlan nakinkamamakgkatsinikgoyan (1 Pedro 4:3, 4). Wa xlakata wi tuku tuwa kililaksakatkan. ¿Natayayaw tiku paxkikgo Dios? ¿Nakgalhakgaxmataw xatlan xlimapakgsin Dios? Komo chuna natlawayaw, nalimasiyayaw pi Satanás kaj akgsaninalh akxni wa pi nitiku nakgalhakgaxmata Dios. (Kalikgalhtawakga 1 Corintios 6:9, 10; 15:33.)

Komo tlakg katsiputuna xlakata uma, kaʼakxilhti capítulo 11 xla libro ¿Tuku xlikana masiya Biblia?, nema tlawakgonit xtatayananin Jehová.

[Epígrafe xla página 22]

Adán nitlan tuku tlawalh

 [Epígrafe xla página 1]

Tuku tlawayaw limasiyayaw komo lakaskinaw pi Dios napulalin kilatamatkan