Dyondza Eka Rito Ra Xikwembu

Ha Yini Xikwembu Xi Pfumelela Vubihi Ni Ku Xaniseka?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana vubihi byi sungule njhani?

Vubihi byi sungule laha misaveni loko Sathana a vulavula mavunwa yo sungula. Sathana a a nga hombolokanga loko a vumbiwa. A a ri ntsumi leyi hetisekeke, kambe “a nga yimanga a tiyile entiyisweni.” (Yohane 8:44) U sungule ku navela vugandzeri lebyi nga bya Xikwembu ntsena. U xise wansati wo sungula, ku nga Evha, naswona u n’wi kanganyise leswaku a yingisa yena ematshan’weni ya Xikwembu. Adamu u landzele Evha hikuva a nga xi yingisi Xikwembu. Xiboho xa Adamu xi endle leswaku ku va ni ku xaniseka ni rifu.—Hlaya Genesa 3:1-6, 17-19.

Loko Sathana a kanganyisa Evha leswaku a nga xi yingisi Xikwembu, entiyisweni a a lwisana ni vuhosi bya xona. Ku fana na Sathana, vanhu vo tala a va xi amukeli Xikwembu tanihi Mufumi. Kutani Sathana u hundzuke “mufumi wa misava.”—Hlaya Yohane 14:30; Nhlavutelo 12:9.

2. Xana a ku ri na lexi a xi soleka eka leswi Xikwembu xi swi vumbeke?

Xikwembu xi vumbe tintsumi ni vanhu va hetisekile naswona a va ta swi kota ku yingisa milawu ya xona. (Deteronoma 32:5) Xi hi vumbe hi ri ni ntshunxeko wo tihlawulela eka ku endla leswinene kumbe swo biha. Ntshunxeko wolowo wu hi pfuna leswaku hi kombisa ndlela leyi hi xi rhandzaka ha yona.—Hlaya Yakobo 1:13-15; 1 Yohane 5:3.

3. Ha yini Xikwembu xi pfumelele ku xaniseka?

Se swi endla malembe Yehovha a ri karhi a tiyisela malunghana ni ku pfukeriwa ka vuhosi byakwe. Ha yini a tiyisele nkarhi wo leha swonghasi? A a lava ku kombisa leswaku matshalatshala ya vafumi va misava a ma va vuyerisi vanhu. (Yeremiya 10:23) Eka malembe ya 6 000 lawa eka wona a ku fuma vanhu, mhaka leyi yi ve erivaleni. Vafumi va misava va tsandzekile ku herisa nyimpi, vugevenga, mavabyi ni ku endla leswaku ku va ni vululami.—Hlaya Eklesiasta 7:29; 8:9; Varhoma 9:17.

Kambe vanhu lava amukelaka Xikwembu tanihi Mufumi va tivuyerisa. (Esaya 48:17, 18) Ku nga ri khale Yehovha u ta herisa tihulumendhe hinkwato ta vanhu. Lava hlawulaka ku fumiwa hi Xikwembu, hi vona lava nga ta tshama hilaha ku nga heriki laha misaveni.—Esaya 2:3, 4; 11:9; hlaya Daniyele 2:44.

  4. Xana ku va Xikwembu xi lehisa mbilu swi hi pfulela lunghelo rihi?

Sathana u vule leswaku vanhu a va nge tshembeki eka Yehovha. Ku lehisa ka Xikwembu mbilu swi hi nyika nkarhi wo kombisa leswaku hi lava ku fumiwa hi xona kumbe hi vanhu. Ndlela leyi hi hanyaka ha yona yi ta kombisa leswi hi swi hlawulaka.—Hlaya Yobo 1:8-11; Swivuriso 27:11.

5. Hi nga swi kombisa njhani leswaku hi hlawula Xikwembu tanihi Mufumi?

Hi hlawula Xikwembu tanihi Mufumi loko hi lava vugandzeri bya ntiyiso kutani hi hanya hi ku pfumelelana na byona hilaha byi hlamuseriweke hakona eRitweni ra xona, ku nga Bibele. (Yohane 4:23) Hi ta tlhela hi papalata ku tikatsa eka swa tipolitiki ni tinyimpi hilaha Yesu a endleke hakona.—Hlaya Yohane 17:14.

Sathana u tirhisa matimba yakwe leswaku a hlohlotela mahanyelo yo biha. Loko hi papalata mahanyelo yo tano, van’wana va vanghana ni maxaka ya hina va nga ha hi hlekula kumbe va hi kaneta. (1 Petro 4:3, 4) Kutani hi fanele hi endla xiboho. Xana hi ta tihlanganisa ni vanhu lava rhandzaka Xikwembu? Xana hi ta yi yingisa milawu ya xona ya vutlhari ni ya rirhandzu? Loko hi endla tano, hi ta va hi kombisa leswaku Sathana u hembile loko a vula leswaku a ku na munhu la nga yingisaka Xikwembu.—Hlaya 1 Vakorinto 6:9, 10; 15:33.

Leswaku u kuma rungula leri engetelekeke, vona ndzima 11 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

Adamu u endle xiboho lexi nga riki xinene

[Xifaniso lexi nga eka tluka 17]

Swiboho swa hina hi swona leswi nga ta kombisa leswaku hi hlawula Xikwembu tanihi Mufumi