Sambirani Kufuma mu Mazgu gha Ciuta

Cifukwa Wuli Ciuta Wakuzomerezga Viheni Ndiposo Masuzgo?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi viheni vikamba wuli?

Viheni vikamba pano pa caru capasi apo Satana wakayowoya utesi wakwamba. Satana wakaŵa muheni yayi apo wakalengekanga. Wakaŵa mungelo wakufikapo, kweni “wakima mu unenesko cara.” (Yohane 8:44) Wakakhumbanga kuti ŵanthu ŵasopenge iyo m’malo mwa kusopa Ciuta. Satana wakapusika mwanakazi wakwamba Eva, ndipo wakumunyengelera kuti wamupulikire iyo m’malo mwa Ciuta. Adamu wakakolerana na muwoli wake pa kugalukira Ciuta. Ivyo Adamu wakasankha vili kupangiska masuzgo na nyifwa.—Ŵazgani Genesis 3:1-6, 17-19.

Apo Satana wakaphalira Eva kuti waleke kupulikira Ciuta, wakakhumbanga kuti ŵakugalukira muwuso wa Ciuta ŵaŵe ŵanandi. Ŵanthu ŵanandi ŵakolerana na Satana pakukana Ciuta kuŵa Muwusi wawo. Ntheura Satana ndiyo waŵa “muwusi wa caru.”—Ŵazgani Yohane 14:30; Uvumbuzi 12:9.

2. Kasi Ciuta wakalenga vilengiwa vinyake vyakugaluka?

Ŵanthu na ŵangelo awo Ciuta wakalenga ŵakaŵa ŵakufikapo mwakuti ŵangapulikira ivyo Ciuta wakaŵaphalira. (Duteronome 32:5) Ciuta wakatilenga na wanangwa wa kusankha kucita ciwemi panji kucita ciheni. Wanangwa uwu ukutipa mwaŵi wa kulongora usange tikutemwa Ciuta.—Ŵazgani Yakobe 1:13-15; 1 Yohane 5:3.

3. Cifukwa wuli Ciuta wazomerezga kuti masuzgo ghaŵepo?

Kwa kanyengo, Yehova waŵaleka waka awo ŵagalukira muwuso wake. Cifukwa wuli? Wakukhumba kulongora kuti vinthu vingaŵayendera makora yayi ŵanthu kwambura kuwusika na iyo. (Yeremiya 10:23) Vilimika 6,000 ivyo vyajumphapo kufuma apo ŵanthu ŵakalengekera, vyalongora kuti tingajiwusa tekha yayi. Ŵanthu awo ŵakuwusa ŵatondeka kumazga nkhondo, kuswa malango, vinthu vyambura urunji ndiposo matenda.—Ŵazgani Mupharazgi 7:29; 8:9; Ŵaroma 9:17.

Kweni awo ŵakuzomera Ciuta kuŵa Muwusi wawo ŵakusanga candulo. (Yesaya 48:17, 18) Sonosono apa, Yehova waparanyenge maboma ghose gha ŵanthu. Ŵanthu ŵekha awo ŵasankha kuwusika na Ciuta ndiwo ŵazamukhala pa caru capasi.—Yesaya 2:3, 4; 11:9; ŵazgani Daniel 2:44.

  4. Kasi kuzikira kwa Ciuta kukutipa mwaŵi wuli?

Satana wakati ŵanthu ŵangagomezgeka yayi kwa Yehova. Kuzikira kwa Ciuta kwatipa mwaŵi tose kuti tilongore usange tikukhumba muwuso wa Ciuta panji wa ŵanthu. Tikulongora ivyo tasankha kwizira mu ivyo tikucita.—Ŵazgani Job 1:8-11; Zintharika 27:11.

5. Kasi tikusankha wuli Ciuta kuŵa Muwusi withu?

Tikusankha Ciuta kuŵa Muwusi withu para tikupenja na kulondezga kusopa kwaunenesko uko kukukolerana na ivyo Mazgu ghake, Baibolo ghakuyowoya. (Yohane 4:23) Nga umo Yesu wakacitira, nase tikukana kunjilirapo mu vya ndyali panji nkhondo.—Ŵazgani Yohane 17:14.

Satana wakugwiliskira nchito nkhongono zake kuti ŵanthu ŵacitenge vinthu viheni. Para tikuleka kucitako vinthu ivi, ŵabali ŵithu na ŵabwezi ŵithu ŵanyake ŵangatigoska panji kutisuska. (1 Petrosi 4:3, 4) Ntheura tikwenera kusankha tekha. Kasi tisankhenge kucezga na ŵanthu awo ŵakutemwa Ciuta? Kasi tipulikirenge malango ghake? Usange ticitenge nthena, tikuzgora utesi wa Satana wakuti palije munthu uyo wangapulikira Ciuta.—Ŵazgani 1 Ŵakorinte 6:9, 10; 15:33.

Kuti mumanye vinandi wonani cipaturo 11 ca buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Cithuzithuzi pa peji 16]

Adamu wakasankha uheni

[Cithuzithuzi pa peji 17]

Ivyo tikusankha vikulongora usange tikukhumba Ciuta kuŵa Muwusi withu panji yayi