Gudani Kha Ipfi Ḽa Mudzimu

Ndi Ngani Mudzimu A Tshi Tendela Vhuvhi Na Tshengelo?

Yeneyi thero i haseledza nga ha mbudziso dze na vhuya na dzi vhudzisa nahone i ḓo sumbedza hune na wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Vhuvhi ho thoma hani?

Vhuvhi ho thoma kha ḽifhasi musi Sathane a tshi amba mazwifhi awe lwa u thoma. Sathane ha ngo sikwa e muvhi. O vha e muruṅwa o fhelelaho, fhedzi “ha ngo ima na mafhungo-ngoho.” (Yohane 8:44) O vha na lutamo lwa uri hu gwadamelwe ene nṱhani ha uri hu gwadamelwe Mudzimu fhedzi. Sathane o zwifhela Eva musadzi wa u thoma, nahone a ita uri a thetshelese ene nṱhani ha Mudzimu. Adamu o ṱanganela na Eva kha u sa thetshelesa Mudzimu. Phetho ya Adamu yo ita uri hu vhe na tshengelo na lufu.—Vhalani Genesi 3:1-6, 17-19.

Musi Sathane a tshi ita uri Eva a si thetshelese Mudzimu, o vha a tshi khou ita uri vha shandukele vhuvhusahoṱhe ha Mudzimu. Vhathu vhanzhi vho ṱanganela na Sathane kha u landula Mudzimu sa Muvhusi. Nga zwenezwo, Sathane o mbo ḓi vha “muvhusi wa shango ḽino.”—Vhalani Yohane 14:30; Ndzumbululo 12:9.

2. Naa hu na zwe zwa vha zwo khakhea nga tsiko ya Mudzimu?

Vhathu na vharuṅwa vhe Mudzimu a vha sika vho vha vha tshi nga kona u thetshelesa ndaela dza Mudzimu nga ho fhelelaho. (Doiteronomio 32:5) Mudzimu o ri sika ri na mbofholowo ya u ḓikhethela u ita zwo lugaho kana zwi songo lugaho. Yeneyo mbofholowo i ita uri ri kone u sumbedza Mudzimu uri ri a mu funa.—Vhalani Yakobo 1:13-15; 1 Yohane 5:3.

3. Ndi ngani Mudzimu o tendela tshengelo?

U bva tshee ha vha na vhushandukwa tsimuni ya Edeni, Yehova o konḓelela u shandukelwa ha vhuvhusahoṱhe hawe. Ndi ngani? U itela u sumbedza uri vhuḓidini hoṱhe ha vhuvhusi ha vhathu vhu nga si vhuye ha vuwa ho vhuyedza vhathu. (Yeremia 10:23) Nga murahu ha miṅwaha ya 6 000 kha ḓivhazwakale ya vhathu, yeneyo khani yo tandululwa. Mivhuso ya vhathu yo kundelwa u fhelisa dzinndwa, vhuvemu, u shayea ha khaṱulo yo teaho na malwadze.—Vhalani Muhuweleli 7:29; 8:9; Vha-Roma 9:17.

Zwo fhambanaho na zwenezwo vhane vha dzhia Mudzimu sa Muvhusi wavho, vha a vhuyelwa. (Yesaya 48:17, 18) Hu si kale, Yehova u ḓo fhelisa mivhuso yoṱhe ya vhathu. Vhathu vhane vha khetha u vhuswa nga Mudzimu ndi vhone fhedzi vhane vha ḓo tshila kha ḽifhasi.—Yesaya 2:3, 4; 11:9; vhalani Daniele 2:44.

  4. U sa fhela mbilu ha Mudzimu zwo ri ṋea tshibuli tshifhio?

Sathane o amba uri vhathu vha nga si thetshelese Mudzimu nga u fulufhedzea. U sa fhela mbilu ha Mudzimu zwi ri ṋea tshibuli tsha u sumbedza arali ri tshi funa u vhuswa nga Mudzimu kana nga vhathu. Zwenezwi ri zwi sumbedza nga nḓila ine ra khetha u tshila ngayo.—Vhalani Yobo 1:8-11; Mirero 27:11.

5. Ri nga sumbedza hani uri ri khetha Mudzimu sa Muvhusi washu?

Ri sumbedza uri ri khetha Mudzimu sa Muvhusi washu musi ri tshi guda na u tevhedza mafhungo ngoho o thewaho Ipfini ḽawe, Bivhili. (Yohane 4:23) Ri iledza u ṱanganela kha zwa politiki na dzinndwa samusi na Yesu o ita nga u ralo.—Vhalani Yohane 17:14.

Sathane u shumisa maanḓa awe u itela u ṱuṱuwedza vhuḓifari na zwiito zwi si zwavhuḓi. Musi ri tshi iledza zwiito zwo raloho, dziṅwe khonani dzashu na vhaṅwe vha mashaka ashu vha nga ri goḓa kana u ri hanedza. (1 Petro 4:3, 4) Zwenezwo zwi amba uri ri fanela u ḓikhethela. Naa ri ḓo ḓikonanya na vhathu vhane vha funa Mudzimu? Naa ri ḓo thetshelesa milayo yawe ya vhuṱali na ya lufuno? Arali ra ita nga u ralo, ri ḓo vha ri tshi khou sumbedza uri Sathane o vha a tshi khou zwifha musi a tshi amba uri a hu na muthu ane a nga ita zwine zwa ambiwa nga Mudzimu.—Vhalani 1 Vha-Korinta 6:9, 10; 15:33.

U itela u wana mafhungo o engedzeaho, sedzani ndima ya 11 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Tshifanyiso kha siaṱari 16]

Adamu o khetha u ita vhuvhi

[Tshifanyiso kha siaṱari 17]

Zwine ra zwi khetha zwi ḓo sumbedza arali ri tshi ṱoḓa uri Mudzimu a vhe Muvhusi washu