MU Disembala 2009 na Janyuwale 2010, makhoti ghakurughakuru ghaŵiri gha ku Russia, ghakadumura kuti vigomezgo vya Ŵakaboni ŵa Yehova ni vyakutalulira. Vinthu vikawelerangaso pakale. Apo boma la Soviet Union likawusanga Russia, Ŵakaboni ŵa Yehova ŵanandi ŵakaŵapusikira kuti mbalwani ŵa boma. Ŵakaŵacimbizga mu caru, kuŵajalira mu jele, ndiposo kuŵagwiriska nchito mu misasa yakusuzgirako ŵanthu. Boma ili likati lamara, Ŵakaboni ŵa Yehova ŵakaphalirika kuti ŵakayuzgikanga kwambura mulandu. Boma liphya likatozga zina lawo. a Kweni sono, ŵanthu ŵanyake ŵakukhumba comene kunanga zina la Ŵakaboni ŵa Yehova.

Kukwambilira kwa cilimika ca 2009, ŵalara ŵa boma ŵakawukira Ŵakaboni ŵa Yehova kuti ŵakanizgike mu caru ca Russia. Mu Febuluwale pera, boma likasanda vinthu 500 mu caru cose ca Russia ivyo ŵakaghanaghananga kuti Ŵakaboni ŵakubudiska. Kasi cilato cawo cikaŵa civici? Cikaŵa cakuti ŵasange kafukwa Ŵakaboni ŵa Yehova. Mu myezi yakulondezgapo, ŵapolisi ŵakanjiranga mu Nyumba za Ufumu ndiposo mu nyumba za Ŵakaboni ŵanyake na kutimbanizga maungano. Ŵakapoka mabuku ndiposo katundu wawo. Ŵalaraŵalara ŵa boma ŵakacimbizga maloya gha ku vyaru vinyake agho ghakawovwiranga Ŵakaboni ndipo ŵakaghakanizga kunjiraso mu caru ici.

Pa Okutobala 5, 2009, ŵakasitomu ŵakakora mabuku ghakulongosora Baibolo pa boda ya pafupi na St. Petersburg. Mabuku agha ghakasindikizgika ku Germany ndipo ghakaŵa gha  mipingo yinandi mu Russia. Gulu linyake lapadera la kuwona za katundu wakofya uyo wanganjira mu caru, likamba kusanda mabuku agha. Cifukwa wuli? Cikalata cinyake ca boma cikati mabuku agha “ghangaŵa na nkhani izo zingapangiska kugaŵikana mu visopa.”

Suzgo ili likafika paheni comene. Makhoti ghakuru gha mu Russia ndiposo ku Altay Republic (caru ico nchigaŵa ca Russia) ghakati mabuku ghanandi gha Ŵakaboni, kusazgapo magazini iyo mukuŵazga apa, ngakutalulira. Ŵakaboni ŵa Yehova ŵakacita apilu ndipo vyaru vinyake vikanjilirapo kweni khoti likasintha yayi ivyo likadumura. Ivyo khoti likadumura vindasinthe ndipo nchakukanizgika ku Russia kutumizga panji kugaŵa mabuku ghakulongosora Baibolo.

Kasi Ŵakaboni ŵa Yehova ŵacitenge wuli apo ŵalaraŵalara ŵakuyezga kunanga zina lawo ndiposo kukanizga mulimo wawo? Kasi ivyo Makhoti agha ghali kudumura vikulongora kuti ŵanthu wose ŵa ku Russia ŵali na wanangwa wa kusopa?

Pa Cinkhondi, pa Febuluwale 26, 2010, Ŵakaboni ŵa Yehova ŵakukwana 160,000 mu Russia mose ŵakamba kugaŵira thirakiti lapadera la mutu wakuti: Could it Happen Again? A Question for the Citizens of Russia (Fumbo ku Ŵanthu ŵa ku Russia Ndakuti, Kasi Vicitikengeso?) ndipo ŵakaŵa na mathirakiti ghakukwana 12 miliyoni. Mwaciyelezgero, mu msumba wa Usol’ye-Sibirskoye uwo uli ku cigaŵa ca Siberia, Ŵakaboni ŵa Yehova pafupifupi 400, ŵakamba kugaŵira mathirakiti agha mu misewu nyengo ya 5:30 mulenji. Ŵanyake mwa Ŵakaboni aŵa ni awo ŵakacimbilira ku Siberia mu 1951 cifukwa ca cipulikano cawo. Ŵakagaŵira mathirakiti ghakukwana 20,000 nangauli kukazizimanga comene.

Kuti ŵapharazge kuti ŵambenge kugaŵira mathirakiti agha kwa mazuŵa ghatatu, Ŵakaboni ŵa Yehova ŵakacita ungano wa ŵamutolamakani mu msumba ukuru wa Moscow. Pa ŵanthu awo ŵakapempheka kuyowoyapo pakaŵa Lev Levinson, uyo ni mulara ku wupu wakuwona za wanangwa wa ŵanthu wa Human Rights Institute. Wakayowoyapo mwakudumura za nkhaza ndiposo nthambuzgo izo Ŵakaboni ŵa Yehova ŵakakumana nazo mu muwuso wa Nazi Geremany na Soviet Union ndipo wakayowoya kuti pakukhumbikwa kuti boma litozge zina la Ŵakaboni. Wakatiso: “Pulezidenti Yeltsin wakapharazga kuti visopa vyose ivyo vikatambuzgika mu nyengo ya muwuso wa Soviet vikwenera kusopa pakweru kwambura kukanizgika. Ndipo vinthu vyawo vyose ivyo vikanangika mu nyengo iyi, vikenera kuwezgekerapo. Ŵakaboni ŵa Yehova ŵakaŵavya katundu waliyose mu muwuso wa Soviet Union, kweni zina lawo liwemi likawezgekerapo.”

 Ŵanji ŵambaso kunanga zina liwemi ili. Levinson wakati: “Caru ici cikajipa mulandu cifukwa ca viheni ivyo cikaŵacitira kweni sono cambaso kutambuzga ŵanthu aŵa kwambura kafukwa.”

Kasi cilato ca kugaŵira thirakiti ili cikafiskika? Levinson wakati: “Apo nizanga kuno ku ungano nanguwona ŵanthu ŵakhala pasi mumphepete mwa msewu ndipo ŵaŵazganga thirakiti ilo Ŵakaboni ŵa Yehova ŵagaŵanga mwahuno mu caru cose ca Russia. . . . Ŵanthu ŵakukhala pasi na kuŵazga, ndipo ŵakuŵazga mwakunweka comene.” b Mwaciyelezgero, wonani ivyo ŵanyake ŵakayowoya.

Mama munyake mucekuru uyo wakukhala mu cigaŵa ca pakati ca Russia ico kuli Ŵasilamu ŵanandi wakapoka thirakiti na kufumba ivyo likayowoyanga. Wakati waphalirika kuti likulongosora za wanangwa wa ŵanthu mu Russia, mama uyu wakayowoya kuti: “Nchiwemi kuti ŵanji ŵamba kuyowoyapo pa nkhani izi. Sono caru ca Russia camba kuwelera mu muwuso wa Soviet Union. Nawonga comene. Mukucita mulimo uwemi.”

Mwanakazi munyake ku Chelyabinsk uyo ŵakakhumbanga kumugaŵira thirakiti wakati: “Napokera kale thirakiti ili ndipo naliŵazga. Nkhukolerana namwe. Nindawonepo cisopa cinyake ico cikuvikilira cigomezgo cawo mu nthowa yiwemi nthena. Mukuvwara makora comene ndipo nyengo zose mukupwelelera pakucita vinthu. Nchakuwonekerathu kuti mukugomezga comene vigomezgo vinu. Nkhuwona kuti Ciuta wali namwe.”

Ku St. Petersburg, mwanalume munyake uyo wakayowoya kuti wapokera kale thirakiti ili, wakafumbika usange ivyo wakaŵazga vikamukondweska. Wakazgora kuti: “Enya. Apo nkhaŵazganga, thupi likati yiriyiriyiri ndipo nkhalira. Abuya  ŵakakakika [mu nyengo ya muwuso wa Soviet] ndipo ŵakaniphalira vinandi vya awo ŵakaŵira lumoza ku jele. Kukaŵa vigeŵenga vinandi, kweniso kukaŵa ŵanyake ŵambura mulandu awo ŵakakakika cifukwa ca cipulikano cawo. Nkhuwona kuti waliyose wakwenera kumanya nadi ivyo vikacitika, ntheura mukucita mulimo uwemi.”

Ŵakaboni ŵa Yehova ŵakuzirwiska comene wanangwa uwo ŵasangwa nawo mu vilimika 20 ivyo vyajumpha. Ndipouli, ŵakumanya kuti wanangwa ungapokeka nyengo yiliyose. Tikumanya yayi usange kunanga zina la Ŵakaboni ŵa Yehova uko kukucitika sono kukulongora kuti ku Russia kwambengeso nthambuzgo nga ni kale. Vizamuwoneka vyekha.

Ndipouli, Ŵakaboni ŵa Yehova mbakusimikizga na mtima wose kuti ŵalutilirenge kupharazga uthenga wa mu Baibolo uwo ngwamtende ndiposo wakupeleka cilindizga ciwemi ca munthazi, kwambura kupwelerako ivyo vingacitika. Pakulongosora ivyo Ŵakaboni ŵa Yehova ŵasimikizga, thirakiti lapadera ili likuti: “Kutambuzga uku kuŵawovwirengepo yayi. Tilekenge yayi kuyowoya mwakupwelelera ndiposo mwanchindi za Yehova Ciuta ndiposo mazgu ghake, Baibolo. (1 Petrosi 3:15) Tikaleka yayi apo tikatambuzgikanga na muwuso wa Nazi Germany, tikaleka yayi apo tikatambuzgikanga na muwuso wa Soviet Union, ndipo sono napo tilekengepo yayi.—Milimo 4:18-20.”