Kestyon sorti kot nou lekter . . .

Eski lavi eternel dan Paradi pou annwiyan?

▪ Labib i koz lo lespwar pour nou viv pour touzour dan Paradi lo later. (Psonm 37:29; Lik 23:43) Eski i pou annwiyan pour viv dan en lanvironnman parfe pour touzour?

Sa i en bon kestyon. Bann resers in montre ki en dimoun ki vwar son lavi toultan annwiyan i kapab enkyet, dan depresyon oubyen i kapab tant pour pran bann risk. Bann dimoun ki napa en bi dan lavi oubyen ki’n fatige fer menm keksoz tou le zour i kapab vwar zot lavi annwiyan. Eski lavi dan Paradi pou napa en bi? Eski nou pou toultan fer menm zafer?

Mazinen ki Bondye ki apel Zeova ki’n donn nou Labib, se li ki’n ofer nou lespwar pour viv pour touzour. (Zan 3:16; 2 Timote 3:16) Kalite prensipal Bondye i lanmour. (1 Zan 4:8) Zeova i kontan nou en kantite e i’n donn nou tou bann bon keksoz pour nou apresye la konmela.​—Zak 1:17.

Nou Kreater i konnen ki pour nou ere, nou bezwen en travay satisfezan. (Psonm 139:14-16; Eklezyast 3:12) Dan Paradi, nou pa pou santi ki nou zis en robot ki pe toultan fer menm louvraz. Dimoun pou fer en travay ki pou direkteman benefisye zot ek bann ki zot kontan. (Izai 65:22-24) Si ou ti annan en travay a plen tan vreman enteresan kot ou bezwen servi ou lentelizans, eski ou ti pou vwar ou lavi annwiyan?

Mazinen osi ki Zeova pa pou les nenport ki viv dan Paradi. I’n promet lavi eternel selman avek bann ki pe imit son Garson, Zezi. (Zan 17:3) Ler Zezi ti lo later, i ti vreman kontan pour fer lavolonte son Papa. I ti montre son bann disip an parol e an aksyon ki nou ganny vre boner ler nou kontan donnen plito ki resevwar. (Akt 20:35) Dan Paradi, tou dimoun pou swiv sa de pli gran komannman, setadir kontan Bondye ek son prosen. (Matye 22:36-40) Imazin ou dan en landrwa kot dimoun ki pa egois i kontan ou e kontan zot travay! Eski ou krwar ou lavi ti pou annwiyan avek bann dimoun koumsa?

Ki lezot keksoz ki nou pou fer dan Paradi? Sak zour, nou pou kapab aprann en nouvo keksoz lo nou Kreater. Bann resers in montre ki i annan en kantite keksoz remarkab pour aprann lo kreasyon Zeova. (Romen 1:20) Pour lemoman, nou zis konn en ptigin lo la. Depi byen byen lontan, en zonm fidel ki ti apel Zob ti koz lo sa ki i ti konnen lo kreasyon Bondye e son konklizyon i ankor vre ozordi. I ti dir: “Gete! Sa i zis en ptigin sa ki [Bondye in] fer, e nou’n tann zis en ptigin lo li! Me lekel ki kapab montre i konpran son loraz pwisan?”​—Zob 26:14.

Menm si nou viv pour touzour, nou pa pou zanmen kapab fini konn tou sa ki i annan pour konnen lo Zeova ek son kreasyon. Labib i dir ki Bondye in met dezir dan nou leker pour nou viv eternelman. Labib i osi dir ki nou pa pou “zanmen dekouver travay ki sa vre Bondye in fer depi o konmansman ziska lafen.” (Eklezyast 3:10, 11) Eski ou krwar ki i pou annwiyan si nou toultan aprann bann nouvo keksoz lo nou Kreater?

Menm ozordi, bann dimoun ki byen okipe pe fer bann keksoz itil pour lezot ki anmenn laglwar pour Bondye i pa souvan vwar zot lavi annwiyan. Nou kapab asire ki si nou okipe pe fer en travay parey, nou lavi pa pou zanmen annwiyan, menm si nou viv pour touzour.

[Portre lo pa 14]

Later: Image Science and Analysis Laboratory, NASA-Johnson Space Center; Galaksi: The Hubble Heritage Team (AURA/​STScI/​NASA)