Makaumanto Kadi ti Agbiag nga Agnanayon Idiay Paraiso?
Saludsod Dagiti Agbasbasa
Makaumanto Kadi ti Agbiag nga Agnanayon Idiay Paraiso?
▪ Ipanamnama kadatayo ti Biblia a mabalintayo ti agbiag nga agnanayon iti Paraiso a daga. (Salmo 37:29; Lucas 23:43) Makaumanto kadi ti agbiag nga agnanayon iti perpekto nga aglawlaw?
Napateg nga ammuen ti sungbat daytoy a saludsod. Natakuatan dagiti managsirarak a ti napalalo a pannakauma ti pakaigapuan ti panagdanag, panagliday, ken panagsikor. Mabalin a mauma dagidiay awanan panggep ti biagda wenno dagidiay mabambannogan iti inaldaw a rutinada. Awanto kadi ti mamaay ti biag dagidiay adda iti Paraiso? Saanto kadi a naragsak ti inaldaw a rutinada?
Umuna, panunotem koma a ti nangidiaya iti agnanayon a biag ket ni Jehova a Dios, ti Autor ti Biblia. (Juan 3:16; 2 Timoteo 3:16) Ayat ti kangrunaan a kualidad ti Dios. (1 Juan 4:8) Napalalo ti panagayat ni Jehova kadatayo, nga impaayna ti amin a naimbag a banag a tagtagiragsakentayo ita.—Santiago 1:17.
Ammo ti Namarsua a nasken nga adda makagunggona a trabahotayo tapno agbalintayo a naragsak. (Salmo 139:14-16; Eclesiastes 3:12) Saanto a marikna dagidiay agtartrabaho idiay Paraiso a kaslada iti robot. Makagunggonanto kadakuada ken kadagiti dungdungnguenda ti trabaho nga aramidenda. (Isaias 65:22-24) Makauma ngata ti biagmo no adda makapainteres, makapagagar, ken amin-tiempo a trabahom?
Panunotem met a saan nga ipalubos ni Jehova a Dios ti uray siasino lattan nga agbiag idiay Paraiso. Ti laeng sagutanna iti biag nga agnanayon ket dagidiay mangtulad iti Anakna a ni Jesus. (Juan 17:3) Nagragsakan ni Jesus nga aramiden ti pagayatan ni Amana uray idi adda ditoy daga. Babaen iti sao ken aramid, insurona kadagiti pasurotna a ti manayon a ragsak ket ad-adda nga agtaud iti panangted ngem iti panangawat. (Aramid 20:35) Amin nga agbiag iti naisubli a Paraiso, annurotenda ti dua a kadakkelan a bilin—ti panagayat iti Dios ken panagayat iti pada a tao. (Mateo 22:36-40) Panunotem laengen nga addaka iti lugar dagiti naparabur a tattao a mangay-ayat kenka ken iti trabahoda! Maumaka ngata no kasta ti kakaduam?
Anianto pay ti aramiden dagiti agbiag idiay Paraiso? Inaldaw nga addanto baro a banag a masursurotayo maipapan iti Namarsua kadatayo. Adun ti nakaskasdaaw a natakuatan dagiti managsirarak maipapan kadagiti parsua ni Jehova. (Roma 1:20) Ngem nakabasbassit pay ti ammotayo maipapan kadagita. Rinibu a tawenen ti napalabas, inusig ti matalek a lalaki a ni Job ti pannakaammona maipapan kadagiti parsua ti Dios, ket pudno ti imbagana. “Dagitoy ti pingir ti daldalan [ti Dios],” kinuna Job, “ket anian nga arasaas ti maysa a banag ti nangngegan kenkuana! Ngem iti mannakabalin a gurruodna siasino ti makaipakita iti pannakaawat?”—Job 26:14.
Kasano man ti kaatiddog ti biagtayo, saantayto a matakuatan ti amin a banag maipapan ken Jehova a Dios ken dagiti aramidna. Kuna ti Biblia nga inkabil ti Dios iti pusotayo ti tarigagay nga agbiag nga agnanayon. Ngem kunana met a “saan[tayto] a pulos masarakan ti aramid nga inaramid ti pudno a Dios manipud pangrugian agingga iti pagnguduan.” (Eclesiastes 3:10, 11) Maumakanto ngata nga agsursuro iti baro a bambanag maipapan iti Namarsua?
Uray ita, manmano a mauma dagidiay okupado nga agtartrabaho para iti pagimbagan ti sabsabali ken agpaay a pakaidayawan ti Dios. Masiguradotayo a no agtultuloytayo nga okupado iti kasta met laeng a trabaho, saantayto a pulos mauma—uray agbiagtayo iti agnanayon.
[Picture Credit Lines iti panid 27]
Daga: Image Science and Analysis Laboratory, NASA-Johnson Space Center; Galaksi: The Hubble Heritage Team (AURA/STScI/NASA)