Cani ruundaʼ revista riʼ racaláʼdxicaʼ gánnacaʼ

Ñee zaree binni gana guibani sin qué chuʼ dxi gati ndaaniʼ Paraísu la?

▪ Biblia rusiidiʼ zanda guibani binni sin qué chuʼ dxi gati ndaaniʼ ti paraísu lu Guidxilayú riʼ (Salmo 37:29; Lucas 23:43). Peru ñee zaree binni gana guibani ti lugar sicarú sin qué chuʼ dxi gati la?

Jneza guinabadiidxaʼ binni zacá. Ni huahuinni nga ca binni ni riree gana pur intiica si cosa nabé riuucaʼ xizaa o riuucaʼ triste, rápacaʼ depresión ne laaca riuu xquendanabánicaʼ ra naxoo. Ne ca binni ni qué ganna xi pur nabani o cani maʼ bixhacalaʼdxiʼ ca dxiiñaʼ runi guiráʼ dxi laaca rireecaʼ gana. Peru ñee zaree binni gana guibani ndaaniʼ Paraísu ca la? Ñee ngueca ca ngueca nga guni binni guiráʼ dxi la?

Primé la? cadi guiaandaʼ laanu Jiobá Dios ni bicaa Biblia nga cayabi laanu zudii laanu ti guendanabani ni qué zaluxe (Juan 3:16; 2 Timoteo 3:16). Guenda ni jma rusihuínnibe nga guendarannaxhii (1 Juan 4:8). Laabe nabé nadxiibe laanu ne rudiibe laanu stale cosa galán para chuʼnu nayecheʼ (Santiago 1:17).

Dios ni bizáʼ laanu nanna caquiiñeʼ gúninu dxiiñaʼ ni riuuláʼdxinu para chuʼnu nayecheʼ (Salmo 139:14-16; Eclesiastés 3:12). Ndaaniʼ Paraísu ca guirutiʼ qué zuni sentir naca casi xiixa guiibaʼ stiʼ ti máquina, sínuque guiráʼ dxiiñaʼ ni guni binni zacaneni laa ne zacaneni ca binni ni nadxii (Isaías 65:22-24). Ñee nireeluʼ gana pa ñúniluʼ xiixa ni riuuláʼdxiluʼ ne niquiiñeluʼ stale tiempu para ñúniluʼ ni la?

Sti cosa ni naquiiñeʼ gánnanu nga cadi tutiica si binni chigudii Jiobá guendanabani ni qué zaluxe ndaaniʼ Paraísu, sínuque ca binni si ni guni cásica biʼniʼ Jesús, Xiiñibe (Juan 17:3). Dxi guyuu Jesús lu Guidxilayú riʼ nabé guyuulaʼdxiʼ guni ni na Bixhoze. Pur cani guniʼbe ne cani bíʼnibe bisiidibe ca discípulo stibe jma nayecheʼ riuu binni ora rudii que ora ricaa (Hechos 20:35). Ora maʼ gaca Guidxilayú riʼ ti paraísu, guiráʼ binni zuni ni na guiropaʼ mandamientu jma risaca: gannaxhiicaʼ Dios ne gannaxhiicaʼ binni (Mateo 22:36-40). Bixuiʼlú nuuluʼ lade binni nachaʼhuiʼ ni nadxii lii ne riuuláʼdxicaʼ dxiiñaʼ ni cayúnicaʼ. Ñee zareeluʼ gana chuʼluʼ lade binni zacá la?

Ximódoruʼ zabani binni ndaaniʼ Paraísu ca yaʼ. Guiráʼ dxi zazíʼdinu xiixa cosa nacubi de Dios ni bizáʼ laanu. Ca binni ni ruundaʼ de tema riʼ maʼ runibiaʼcaʼ stale de ca cosa sicarú ni bizáʼ Jiobá (Romanos 1:20). Peru dxandipeʼ la? guisi si nga runibiaʼnu de laacani. Maʼ raca mil iza guyuu ti hombre ni qué nusaana de ñuni ni na Dios, labe Job. Hombre riʼ bizulú guníʼ ique de ca cosa ni runibiáʼ de cani bizáʼ Dios, ne dede yanna riníʼ ique binni zacá, laabe guniʼbe: «¡Laguuyaʼ! Ca ndiʼ nga ruaa ca neza stibe, ¡ne ti cosa huiiniʼ si nga ni huayunadiáganu de laabe! Peru tu zanda guiene pabiáʼ nadipaʼ ti rayu stibe yaʼ» (Job 26:14).

Neca guibáninu xadxí, qué ziuu dxi gánnanu guiráʼ xixé cosa de Jiobá ne de cani bizáʼ. Biblia na guluube ndaaniʼ ladxidóʼ binni chuulaʼdxiʼ guibani sin gati. Peru laaca cusiéneni qué ziuu dxi gunibiaʼnu guiráʼ ni maʼ bizáʼ Dios (Eclesiastés 3:10, 11). Ñee nireeluʼ gana niziidiluʼ cosa nacubi de Dios ni bizáʼ laanu la?

Dede yanna, ca binni ni cayúnicaʼ xiixa dxiiñaʼ para gacanecaʼ xcaadxi binni ne gusisácacaʼ Dios, huaxiéʼ si biaje rireecaʼ gana. Nanna dxíchinu ti cosa, pa iquiiñenu tiempu stinu zacá la? qué ziuu xiixa ni cuee gana laanu ne laaca qué zareʼnu gana ora maʼ guibáninu sin qué chuʼ dxi gátinu.

[Paraa gucuaacabe imagen ni zeeda lu yaza 23]

Guidxilayú: ni bidii Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)