E Veisautaka na Bula na iVolatabu

NA CAVA e biuta kina na nona cakacaka e dua na daulagasere kilai levu me cakacaka vakaitalatala vakatabakidua? E rawa vakacava ni veisau me dua na lewenivanua vinaka na daubasulawa e tukuna na turaganilewa ni na sega ni rawa ni veisau? Wilika mada na kedrau italanoa.

“E sega ni dua e rawa ni qarava e rua na turaga.”—ANTOLINA ORDEN CASTILLO

SUCU: 1962

VANUA: SIPENI

KA E KILAI KINA: DAUNIDRAMA YALEWA, DAUNILAGASERE

NOQU BULA E LIU: Au sucu ena dua na koro lailai o Tresjuncos, ena yasayasa o La Mancha. Keitou dauteitei vakavuvale. A lotu Katolika o tinaqu, ia a lotu Tawase o tamaqu. E vakavulici au o tamaqu meu doka na iVolatabu; au dau raici koya tale ga ni wilika. A tuberi au ena lotu Katolika o tinaqu qai dau kauti au ena Misa ena Sigatabu.

Niu yabaki 15 au biubiu mai nakoro, au lai vakaitikotiko kei tuakaqu e Madrid. Au dau nanumi rau vakalevu na noqu itubutubu niu tu ena siti, ia lakolako sa matau vei au. Niu yabaki 17 au lai cakacaka ena vica na vula ena zarzuela, na drama seretaki makawa ni Sipeni. Au marautaka sara vakalevu qori, au mani nanuma meu dua na daunidrama yalewa. Au biuta na noqu vuli cakacaka vakavunivola qai tekivu lagasere ena vica na kabani ni drama seretaki makawa ni Sipeni. Ena gauna qori sa noqu itau tiko kina na ganei noqu itokani. Au nanuma niu kalougata ni sa tu e dua na noqu cakacaka vinaka, au vakailavo, au vakaitau tale ga.

E duidui na kabani ni drama seretaki makawa ni Sipeni au lagasere kina, au lako wavoki e Sipeni kei na so tale na matanitu me vakataki Colombia, Costa Rica, Ecuador, kei Venezuela. Au lagasere tale ga kei na vica na ilawalawa era lewena e dua na isoqosoqo ni matasere e kilai levu e Madrid na “La movida madrileña.” A rawaka sara vakalevu e dua na ilawalawa au kena daunilagasere.

Au taleitaka na cakacaka, au sega ga ni taleitaka na ivalavala vakasisila e caka tu kina. Au sa kauaitaka vakasivia na kequ irairai au qai vinakata meu raici tiko ga meu dua na daulagasere rogo. Au muria e dua na ivakarau ni kana musu e lai vakavuna tale na anorexia (sega ni via kana) kei na bulimia (kana vakasivia qai saga me luaraki tani).

Na ka au vinakata vakalevu duadua meu dua na daunidrama yalewa. A vakadonui meu lai vuli ena Madrid School of Dramatic Arts e vulici kina na drama kei na kena danisi. Keimami vakavulici ena koronivuli qo ni vinakati vua e dua e via daunidrama me vakasamataka vakatitobu na ivakarau ni yalo i koya e talanoataki, me saga tale ga me vakaraitaka na ivakarau ni yalo oya. Au sega sara ga ni marau niu muria na ivakasala oya. Au sa cakava tu ga vakarairai na ka au qai nanumi au ga.

 VEISAUTAKI AU NA IVOLATABU: Au kila ni na vinakati na sasaga me vinaka na noqu itovo. Ia au sega ni kila na ka meu cakava. Au mani lako ena dua na matalotu tawase e Madrid, keitou a lako kina kei rau na noqu itubutubu ena dua na gauna. Au masu vua na Kalou niu cavuta na yaca, Jiova.

Niu masu oti ga, rau sikovi au mai e vale e rua na iVakadinadina i Jiova. Au marautaka sara ga na noqu veivosakitaka kei rau na iVolatabu, au tukuna tale ga e levu na ka me saqati kina na ka erau vakavulica. E marama dauvosovoso o Esther na iVakadinadina a dauvakavulici au ena iVolatabu. Eratou dau kauaitaki au vakavuvale, ratou lomani au tale ga. Au tekivu lako ena soqoni ni iVakadinadina i Jiova au qai liaca niu sa kunea na ka dina au vaqara voli.

Ni oti noqu vuli drama kei na kena danisi, e levu na vanua e vinakati meu cakacaka kina. Au lai vakaitavi sara ena dua na drama ena caka ena vanua ni vakatasuasua kilai levu e Madrid. Au vakasamataka ni na vinakati meu na soli au kina vakatabakidua meu rawa ni daunidrama vinaka. Au sa qai vakatulewataka meu na vaqara e dua tale na cakacaka me rawa kina niu qarava vakatabakidua na Kalou. Au vakadinadinataka na vosa i Jisu: “E sega ni dua e rawa ni qarava e rua na turaga; ni na cata e dua qai lomana e dua, ena doka e dua qai beca e dua. Oni sega ni rawa ni qarava na Kalou kei na iYau.” (Maciu 6:​24) A sega ni duavata kei na noqu vakabauta na noqu itau ena walu na yabaki, au mani vakatulewataka me sa cegu na neirau veivosaki. A sega ni rawarawa na veisau qori.

KENA YAGA: Nikua, au sa cakacaka vagauna meu qaravi ira na itabaqase. Qori e levu kina na gauna meu vakavulica na iVolatabu vei ira na vosa vakaArapea ena vanua au vakaitikotiko kina. Dua na ka na noqu sasaga meu vulica na vosa vou qo, ia au marautaka noqu wasea na veika vinaka au vulica vei ira era dauveikauaitaki ra qai via kila na Kalou.

Au sega ni marau ena gauna au vuli tiko kina meu daunidrama, ia qo sa vakainaki na noqu bula. Au kila ni vukei au o Jiova me vinaka na noqu itovo, meu marau tale ga.

“Au Vakadinadinataka ni Cala o Turaganilewa.”—PAUL KEVIN RUBERY

SUCU: 1954

VANUA: IGILADI

KA E KILAI KINA: DAUBASULAWA VORAVORA

NOQU BULA E LIU: Au sucu e Dudley, e dua na taoni levu ni cakacaka e West Midlands. Niu se lailai e dau vakavulici au o tamaqu meu taleitaka na wilivola. E dau uqeti au tale ga meu vakavinavinakataka na vakatubuqoroqoro ni veika buli, ia e dau tukuna ni qori e vu kece ga mai na bula vakaidewadewa. E vakavulica ni sega ni bula dina tiko na Kalou. Ia erau se vakatalai au ga na noqu itubutubu meu lai wilivola ni Sigatabu ena lotu  Wesele ena vanua keitou vakaitikotiko kina.

Niu yabaki walu, au raica eso na gonetagane era vakaitikotiko ena neitou yasayasa era vakama e dua na waqa a kele tu e uciwai. Era lako mai na ovisa, ia au sega ni tukuna vei ira na ka au raica niu rere. Era vakarerei au tale ga o ira na vakama na waqa. Dua na ka noqu yaloca niu beitaki vakatawadodonu niu basulawa. Au mani vakacaca ena so na koronivuli ena neitou itikotiko, valenilotu, kei na vanua ni cakacaka. E rauta ni vica na udolu na dola na veika au vakacacana. Niu se yabaki tini, au basuvale kei na sitoa meu butako. Au taleitaka na ka e kama, au vakamakama kina vakaveitalia. E tukuna e dua na qasenivuli mai koronivuli ni sega ni dua e rawa ni tarovi au.

Niu yabaki 12, au raica e dua na ivola me baleta na vakatevoro, au qai bulia ga e dua na noqu papa ni vakatevoro na Ouija board. Ni rau sega ni vakabauta na Kalou na noqu itubutubu erau nanuma kina ni sega ni ca na noqu taleitaka na vakatevoro, ena bau tarovi au toka oya mai na leqa. Ena gauna au biu vuli kina au sa rairai vakavicavata ena nodra mataveilewai na gone. Au lewena e dua na ilawalawa voravora era vakatokai na skinhead (ulu tasi). Au dau kauta tu e dua na itoro kei na sinucodo ni motopai me noqu iyaragi. A dua na noqu cakacaka, ia au biuta tale niu bala i valeniveivesu ena dua na gauna lekaleka. Au baci vakacaca tale niu sere mai, au vesu qai totogitaki tale meu yabaki rua e valeniveivesu. E tukuna na turaganilewa niu na sega ni rawa ni veisau, au dau vakavu ca tale ga.

Au sota tale kei na noqu itau e liu o Anita niu sere mai valeniveivesu. Ni oti na neirau vakamau, au sega tale ni butako se vakavu ca. Ia ni oti ga e vica na yabaki au tekivu basulawa tale. Au basu vale ni bisinisi, au butakoca tale ga na ilavo e maroroi tu ena nodra sefi. Au vakayagataka na wainimate gaga, gunusivia, au vakadakai tale ga. Au vesu qai bala tale i valeniveivesu.

E vakalomaocaocataki Anita na ivakarau ni noqu bula. E solia na nona vuniwai na wainimate kei na vuanikau e vakalailaitaka na nona lomaocaoca, ia e tukuna ni na vinaka ga na veisere. Au kalougata ni sega ni muria na ka e tukuna na vuniwai.

VEISAUTAKI AU NA IVOLATABU: Ena itekivu ni neirau bula vakawati a vuli iVolatabu kei ira na iVakadinadina i Jiova o Anita ena dua na gauna lekaleka. Ena iotioti ni gauna qo au curu kina e valeniveivesu a sotavi ira tale na iVakadinadina i Jiova. Ena siga tale ga oya au masu qai kerea vua na Kalou: “Ke oni bula dina tiko, moni vakaraitaka vei au.”

Niu sere mai valeniveivesu ni oti tale e vica na vula, au lai raica e dua na bete ni lotu qai kerea me vakavulici keirau kei Anita ena iVolatabu. E tukuna ni na vakavulici keirau ga ena vakabauta ni lotu kei na masu.

Au sa qai wilika ga vakataki au na iVolatabu. Au kurabuitaka ni vakacala sara ga na iVolatabu na vakatevoro. (Vakarua 18:10-12) Ena dua na gauna e muri au kunea e dua na ilavelave ni Watchtower era solia vei Anita na iVakadinadina i Jiova ena siga au kerea kina na veivuke ni Kalou. E uqeti au na ka au wilika meu vaqarai ira na iVakadinadina i Jiova.

Era sega ni taleitaka na noqu vuvale, noqu itokani, kei ira na noqu ilala daubasulawa, na noqu vulica na iVolatabu kei ira na iVakadinadina i Jiova. Eso era tukuna niu sa vakacalai. Au vakabauta ni na vinakati me vakasavasavataki na noqu vakasama. E levu na noqu malumalumu, sa sega ni cakacaka vinaka na noqu lewaeloma, kena ikuri au dau utubokotaka e 60 na tavako ena dua na siga. Na iVakadinadina e vakavulici keirau ena iVolatabu kei ira keimami sosoqoni vata ena ivavakoso keirau lako kina, era dauveikauaitaki ra qai vosovoso. Au sa qai biuta na noqu itovo ca.—2 Korinica 7:1.

KENA YAGA: Sa 35 na yabaki na neirau vakawati kei Anita. Eratou tomani keirau tiko ena neirau qaravi Jiova na luvei keirau yalewa kei na rua na luvena. Keirau sa vakayagataka vakalevu na neirau gauna kei Anita ena neirau vukei ira tale eso mera vulica na iVolatabu.

Na neirau qarava na Kalou o Jiova kei na neirau vukei ira tale eso sa qai vakainaki kina na neirau bula. Ena 1970, a tukuna e dua na turaganilewa niu na sega ni rawa ni veisau. Ia ena veivuke ni Kalou kei na veidusimaki ni iVolatabu, au vakadinadinataka ni cala na ka e tukuna.