E Mafai e le Tusi Paia Ona Suia Olaga

AISEĀ na tuu ai e se tamaʻitaʻi pese lauiloa lenā galuega ae avea ma faifeʻau talaʻi? Na mafai faapefea e se pagota na taʻua e se faamasino ua lē mafai ona suia lana amio, ona sui ma avea ma sē e fesoasoani i isi? Faitau i a la tala.

ʻE lē mafai ona pologa i ni matai se toʻalua.’​—ANTOLINA ORDEN CASTILLO

TAUSAGA FANAU: 1962

ATUNUU: SEPANIA

TALAAGA: TEINE E PESE MA FAATINO TALA

OLAGA SA IAI: Na ou fanau i Tresjuncos, o se nuu laʻitiiti i le itumalo o La Mancha. E faifaatoʻaga lo matou aiga. E Katoliko loʻu tinā, a o loʻu tamā e Porotesano. Na aʻoaʻoina aʻu e loʻu tamā ia faatāua le Tusi Paia, ma e fiafia o ia e faitau i ai i taimi uma. Ae na ave aʻu e loʻu tinā i le lotu Katoliko ma le Misasā i aso Sā uma.

O le 15 o oʻu tausaga na ou nofo ai i loʻu uso matua i Madrid. E ui ina ou misia oʻu mātua, ae na oo ina ou masani i le olaga i se aai telē. O le 17 o oʻu tausaga, na ou faigaluega ai mo ni nai masina i se ʻaufaipese faapitoa i pesega tuai faa-Sipaniolo. O loʻu fiafia i lea olaga, na ou filifili ai e galue i le faatinoga o tala. Na tuu laʻu aʻoga faafailautusi, ae faigaluega i ʻaufaipese o pesega faa-Sipaniolo. O le taimi foʻi lea, na ma feoaʻi ai ma le tuagane o se teine e ma te uō. Sa ou fiafia ona ua maua saʻu galuega lelei, ma tupe ma sē e alofa iā te aʻu.

Na matou malaga faataamilo i Sepania ma ʻaufaipese eseese, faapea atunuu o Ecuador, Kolomepia, Costa Rica, ma Venezuela. Sa ou pese foʻi i ʻaufaipese i Madrid e lauiloa i se isi ituaiga o pese. Sa avea foʻi aʻu ma tagata pese autū i se ʻaufaipese sa lauiloa ma fiafia i ai tagata.

Sa ou fiafia i le galuega ae ou te lē fiafia i amioga a tagata. O loʻu popole tele i le teuteuina o loʻu tino ma oʻu foliga, na ou maʻi ai ona o le soona tipi o laʻu ʻai.

Peitaʻi, sa ou manaʻo lava ia avea aʻu ma teine e faatinoina tala, ma na maua loʻu avanoa i le aʻoga e aʻo ai mea faapea i le Madrid School of Dramatic Arts. Sa aʻoaʻoina ai i matou e taumafai ia malamalama i tagata o loo matou faaata i tala, ma faaali mai o latou faalogona. Sa ou taumafai e faatino lea mea, ae e na o lagona gaogao na iā te aʻu ma ua avea o sē e manatu faapito.

 SUIA E LE TUSI PAIA LOʻU OLAGA: Na ou iloa a ou fia maua ni uiga lelei, e tatau ona ou taumafai e atiaʻe, ae ou te lē iloa pe faapefea. O lea, na ou alu ai i se lotu sa matou ō i ai ma oʻu mātua i Madrid. Sa ou tatalo i le Atua ma taʻu lona suafa o Ieova.

E leʻi umi ae asia loa aʻu e ni Molimau a Ieova se toʻalua. Ou te fiafia lava e matou te talanoa i le Tusi Paia, ae e tele foʻi ni a latou aʻoaʻoga na ou tetee i ai. Sa faapalepale mai pea Eseta o lē na faia aʻu lesona, ma na alolofa mai foʻi ma agalelei mai lona aiga. Na amata ona ou auai i sauniga a Molimau ma ou iloa ai, ua ou maua le upu moni sa ou saʻilia.

E faatoʻā uma lava aʻu aʻoga i le avea ma sē e faatinoina tala, ae maua loa le mau avanoa faigaluega. Na maua saʻu vaega i se tala e fuafua e fai i se fale mataaga lauiloa i Madrid. Ae na ou iloaina, ina ia ou taulau i laʻu matātā, e tatau ona ou uaʻi atoatoa i ai. Na ou filifili mulimuli ane e sui laʻu galuega, ina ia mafai ai ona ou uaʻi atu i le auaunaga i le Atua. Na tāua iā te aʻu fetalaiga a Iesu: “E lē mafai ona pologa se tasi i ni matai se toʻalua, auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi. E lē mafai ona e pologa i le Atua atoa ma ʻOa.” (Mataio 6:24) E lē tutusa o mā talitonuga ma le alii lea na ma uō mo le valu tausaga, ma na ou faamutaina loa la ma faigāuō. E leʻi faigofie nei suiga iā te aʻu.

AOGĀ IĀ TE AʻU: I le taimi nei, ou te faigaluega faavaitaimi e fesoasoani i tagata matutua. Ua tele ai loʻu taimi e aʻoaʻo le Tusi Paia i tagata e tautatala i le gagana Arapi o lo matou vaipanoa. O i latou o tagata e talimālō ma naunau i mea faaleagaga, ma ou te taumafai lava e aʻoina la latou gagana ona o se fiafiaga ia te aʻu le aʻoaʻo o i latou i le tala lelei.

O lagona gaogao sa iai a o ou aʻoga o se teine e faatinoina tala, ua suia i lagona ua aogā loʻu olaga. Ou te iloa ua fesoasoani mai Ieova ia avea aʻu o sē e sili atu ona lelei ma fiafia.

“Ua ou taʻu le sesē o le faamasino”​—PAUL KEVIN RUBERY

TAUSAGA FANAU: 1954

ATUNUU: EGELANI

TALAAGA: SOLITULAFONO MA FAASAUĀ

OLAGA SA IAI: Na ou fanau i Dudley, o se aai telē i le itumalo o West Midlands. O loʻu tamā na ou fiafia ai e faitau tusi mai lava i loʻu laʻitiiti. Sa ia aʻoaʻoina foʻi aʻu ia ou talisapaia le matagofie o foafoaga, e ui ina talitonu o le faaevolusione na māfua ai. Na fai mai o ia, e leai se Atua. E ui i lea, na tuli aʻu e oʻu mātua i le Aʻoga Aso Sā a le Metotisi i lo matou nuu.

I le valu o oʻu tausaga, na ou vaai ai i ni tama o lo  matou nuu o susunu se vaa. Na ō mai leoleo e suʻe po o ai na faia, ae ona o loʻu fefe i tama ou te leʻi lipotia ai. Na tuuaʻia aʻu e leoleo, ma o loʻu ita i le tuuaʻia sesē o aʻu, na ou faaleagaina ai ni faleaʻoga, falesā, ma falefaigaluega i lo matou vaipanoa. E tele tupe na maʻimau ai. E oo ane i le sefulu o oʻu tausaga, ua ou talepeina fale ma faleoloa ma gaoia mea o iai. Sa ou fiafia lava e susunu fale, ma o le tala a faiaʻoga o laʻu aʻoga, ua latou lē mafai ona pulea aʻu.

I le 12 o oʻu tausaga, na ou maua ai se tusi i faiga faataulāitu, ma na ou tago loa faataʻitaʻi. Talu ai e lē talitonu oʻu mātua i le Atua, sa manatu ai e lē afāina lea mea ona e tuu ai loʻu ulavale. Ona ou te auai i se kegi sauā, e iʻu ane laʻu aʻoga, ua tele taimi ua ou tulaʻi ai i le fale faamasino mo tamaiti, e tali oʻu moliaga. Ou te feaveaʻi se matātafi ma se filifili uila e faaaogā o ni auupega. Na maua laʻu galuega, ae na tuu ina ua ou falepuipui. Ina ua ou magalo mai, sa ou toe faaleagaina foʻi ni fale, ma na toe puʻeina ai aʻu ma faafalepuipui mo le isi lua tausaga. Na taʻu aʻu e le faamasino, o sē ua lē mafai ona suia le amio, ma o se faamataʻu i tagata lautele.

Ina ua ou magalo mai, sa ma toe fetaui ai ma se tamaʻitaʻi sa ma uō muamua e igoa iā Anita. Na ma faaipoipo, ma tuu ai loʻu gaoi ma loʻu ulavale mo sina taimi, ae ina ua mavae ni nai tausaga na ou toe foʻi ai i laʻu masani. Sa ou talepeina fale o pisinisi ma gaoia tupe mai i a latou sefe. Sa ou tagofia fualaau faasāina, inu tele, ma feaveaʻi se fana. Sa toe puʻeina foʻi aʻu e leoleo ma tuu i le falepuipui.

Na matuā faapopoleina Anita i aʻu amioga. Na ave i ai e lana fomaʻi ni fualaau e faafilemu ai lona mafaufau, ma fai i ai, e sili pe a tatala la ma faaipoipoga. O le mea e lelei ai ona e leʻi faalogo Anita i lana fautuaga.

SUIA E LE TUSI PAIA LOʻU OLAGA: I pō pō fou o la ma ulugalii, na suʻesuʻe ai Anita ma Molimau a Ieova mo sina taimi, ma na toe feiloaʻi foʻi ma Molimau mulimuli ai nei, a o ou i le falepuipui. O le aso tonu lava na amata ai lana suʻesuʻega, o le aso foʻi lea na ou tatalo ai i le Atua: “Afai e moni o loo e soifua, ia e faailoa mai iā te aʻu.”

Ina ua ou magalo i ni nai masina mulimuli ane, na ou talosaga ai i le faifeʻau o lo matou nuu e fai ni ma lesona ma Anita. Ae fai mai, e na o talitonuga o le lotu ma le tatalo e mafai ona ia aʻoaʻoina mai.

O lea, sa ou faitauina loa le Tusi Paia, ma na faateʻia aʻu i le iloaina, e inosia e le Tusi Paia faiga faataulāitu. (Teuteronome 18:10-12) Sa ou maua foʻi se Olomatamata na tuu e Molimau iā Anita, i le aso lea na ou tatalo ai i le Atua mo se fesoasoani. O mea na ou faitau ai, na uunaʻia ai aʻu e faafesootaʻi Molimau.

E leʻi fiafia o ma aiga ma uō, ma ē sa matou faifaimea faatasi, ina ua iloa ua matou suʻesuʻe ma Molimau a Ieova. Na fai mai nisi ua faasesēina i maʻua, ae o le mea moni, o lea faatoʻā saʻo loʻu mafaufau. Na tele oʻu vaivaiga sa iai, na ou lē iloa le eseesega o le saʻo ma le sesē, ma e oo i le 60 sikareti ou te ulaina i le aso. Ae e ese le agalelei ma le faapalepale o Molimau na matou suʻesuʻe i le Tusi Paia, faapea ma le ʻauuso i la matou faapotopotoga. Na mafai lava ona ou manumalo i aʻu masaniga leaga.—2 Korinito 7:1.

AOGĀ IĀ TE AʻU: Ua 35 tausaga talu ona ma faaipoipo ma Anita. O loo matou auauna faatasi iā Ieova ma la ma tama teine ma lana fanau e toʻalua. I tausaga talu ai nei, ua faaaluina ai le tele o lo ma taimi ma Anita i le aʻoaʻoina o isi i le Tusi Paia.

Ua ma maua se olaga e iai se uiga, ona o le fesoasoani i isi ma auauna iā Ieova le Atua. I tuā i le 1970, na faapea mai ai se faamasino, o aʻu o se tagata ua lē mafai ona suia laʻu amio. Peitaʻi ane, ona o le fesoasoani mai i le Atua ma lana Afioga, ua ou taʻu le sesē o le faamasino.