Bijbel e kenki sma libi

Fu san ede wan pôpi singi-uma tapu nanga a wroko fu en fu tron wan furuten preikiman na ini a bribi fu en? Wan man ben ogri so te taki wan krutuman ben taki dati noiti a ben o kenki. San meki taki a man disi kon tron wan bun sma na ini a libimakandra? Leisi den tori disi fu kisi piki tapu den aksi dati.

„Nowan sma kan dini tu masra leki srafu.”​—ANTOLINA ORDEN CASTILLO

A GEBORE NA INI 1962

KONDRE: SPANYOROKONDRE

A BEN DE WAN SMA DI BEN E PREI NA INI KOMEDIPREI ÈN DI BEN E SINGI

A LIBI FU MI FOSI: Mi gebore na ini a pikin dorpu Tresjuncos, na ini a kontren di sma sabi leki La Mancha. Mi famiri ben de gronman. Mi mama ben de wan Lomsusma èn mi papa ben de wan Protestantsma. Fu di mi ben si mi papa leisi Bijbel ala ten, meki na so mi leri fu abi lespeki gi Bijbel. Ma mi mama kweki mi na ini a Lomsu bribi èn ala sonde a ben tyari mi go na kerki.

Di mi ben abi 15 yari, mi gowe libi a dorpu èn mi go tan na ini Madrid nanga mi bigi sisa. Mi ben misi mi papa nanga mama srefisrefi, ma te fu kaba mi kon gwenti a foto libi. Di mi ben abi 17 yari, mi kisi na okasi fu wroko wan tu mun na wan zarzuela, wan grupu di ben singi èn dansi na ini komediprei, spesrutu soleki fa a de na ini a Spanyoro kulturu. Mi ben lobi a libi dati srefisrefi èn mi bosroiti fu tron wan sma di e prei na ini komediprei. Mi ben tapu nanga a leri di mi ben teki fu tron wan sekretarsi èn mi bigin wroko nanga difrenti zarzuela grupu. Na a ten dati mi bigin hori nanga a brada fu wan fu den mati fu mi. Mi ben de koloku fu di mi ben feni taki mi abi wan bun wroko, moni nanga wan sma di lobi mi.

Mi bigin go nanga difrenti zarzuela grupu na ini heri Spanyorokondre èn sosrefi tra kondre, soleki Kolombia, Kosta Rika, Ekwador, nanga Venezuela. Mi ben singi tu nanga difrenti singi grupu na ini Madrid di ben singi wan spesrutu sortu pôpi poku di sma sabi leki „La movida madrileña”. Wan fu den grupu pe mi ben de a moro prenspari sma di e singi, ben kon pôpi srefisrefi.

Mi ben lobi a wroko, ma mi no ben lobi a yayolibi fu den sma di mi ben wroko nanga den. Boiti dati, mi ben broko mi ede doronomo nanga sani fu moi misrefi èn fu meki sma denki bun fu mi. Mi no ben wani nyan ala sani èn te mi ben nyan mi ben brâk en puru, fu di mi no ben wani kon fatu.

A moro prenspari sani di mi ben wani, na fu tron wan sma di e prei na ini komediprei. Te fu kaba, mi ben kan go na wan heiskoro pe sma e leri fa fu dansi èn prei komediprei. Drape wi ben leri taki te wi e prei gi wan sma, dan wi musu denki dipi fu dati, so taki wi man frustan fa a sma e firi èn so taki wi kan pruberi fu kon abi den srefi  firi leki en. Di mi ben du dati, dan mi kon si taki mi no ben firi noti. Mi ben kon tron wan sma di no e denki dipi fu seryusu sani èn mi ben denki misrefi nomo.

A FASI FA BIJBEL KENKI MI LIBI: Mi ben sabi taki efu mi wani kon kisi bun fasi, dan mi ben o abi fu du muiti fu kisi den fasi dati. Ma mi no ben sabi fa fu bigin. Mi bosroiti fu go na wan evangelie kerki na ini Madrid pe mi ben go wan leisi nanga mi papa nanga mama. Mi begi Gado èn mi ben gebroiki en nen, Yehovah.

Syatu baka dati, tu Kotoigi fu Yehovah kon na mi oso. Mi ben taki fayafaya nanga den fu Bijbel, ma mi no ben agri nanga furu fu den leri fu den. Esther, a Kotoigi di ben e studeri Bijbel doronomo nanga mi, ben abi furu pasensi. En nanga en osofamiri ben sori furu lobi nanga switifasi gi mi. Mi bigin go na den konmakandra di den Kotoigi ben hori èn mi kon frustan heri esi taki mi feni a tru bribi di mi ben e suku.

Syatu baka di mi klari a skoro pe mi ben go, dan mi kisi okasi fu du difrenti sortu wroko. Mi ben kisi na okasi fu prei na ini wan komediprei di ben o hori na ini wan bigi theater na ini Madrid. Ma mi kon frustan tu taki efu mi ben wani meki en, dan mi ben musu gi misrefi dorodoro na a wroko disi. Te fu kaba mi bosroiti fu suku wan tra sortu wroko di ben o gi mi na okasi fu poti ala mi prakseri na a diniwroko fu Gado. Mi kon frustan taki den wortu disi fu Yesus tru: „Nowan sma kan dini tu masra leki srafu; bika a sa teige a wan masra èn lobi a trawan, noso a sa tan nanga a wan èn wisiwasi a trawan. Unu no kan dini Gado èn dini Gudu na a srefi ten” (Mateyus 6:24). A man di mi ben hori nanga en aiti yari langa, no ben abi a srefi overtoigi leki mi, sobun mi bosroiti fu no hori nanga en moro. Nowan fu den kenki disi di mi ben tyari kon, ben makriki.

DEN WINI DI MI KISI: Now mi e wroko wan tu dei na ini a wiki fu yepi owru sma. Disi e gi mi na okasi fu gebroiki moro furu fu mi ten fu gi Bijbel leri na sma di e taki Arabiatongo na ini a kontren pe mi e libi. Mi musu du furu muiti fu leri a tongo disi. Ma a e gi mi prisiri trutru fu fruteri den sma disi den bun sani di mi leri, iya, den sma disi di abi switifasi èn di wani kon leri sabi Gado.

Mi no e firi moro leki fosi di mi ben go na a skoro. Now mi abi wan marki na ini mi libi. Mi firi taki Yehovah yepi mi fu tron wan moro bun sma di de koloku.

„Mi sori a krutuman taki a no abi leti.”​—PAUL KEVIN RUBERY

A GEBORE NA INI 1954

KONDRE: INGRISIKONDRE

A BEN DE WAN OGRIMAN

A LIBI FU MI FOSI: Mi gebore na ini Dudley, wan bigi foto pe furu fabriki de, na West Midlands. Sensi di mi ben yongu, mi papa meki taki mi kon lobi leisi. A ben gi mi deki-ati tu fu abi warderi gi den moi sani na grontapu, aladi a ben feni taki den sani dati kon fu den srefi, soleki fa na evolutie-leri e taki. A ben leri mi taki Gado no de. Ma toku, mi papa nanga mama seni mi go na a sondeskoro fu a Methodist Kerki fu a kontren.

 Di mi ben abi aiti yari, mi si fa wan tu boi fu a birti sutu faya gi wan boto di ben de na tapu a watra. Skowtu ben kon, ma mi no ben taki san mi si, fu di mi ben frede den boi di ben tapu skreki gi mi. Skowtu ben feni taki mi bron a boto, aladi dati no ben de so. Disi meki taki mi kisi bita-ati. Dati meki mi bigin broko sani na skoro na ini a birti, na den kerki, èn na den fabriki. Den sani di mi ben broko ben kostu dusundusun dala. Na a ten di mi ben abi tin yari, mi ben broko go fufuru na ini sma oso èn na ini wenkri. Mi ben lobi plèi nanga faya èn furu leisi mi ben sutu faya gi gebow nanga wagi. Den leriman na skoro ben taki dati nowan sma ben man nanga mi.

Di mi ben abi 12 yari, mi feni wan afkodrei buku èn mi ben meki wan spesrutu bord di ben meki taki mi ben man taki nanga ogri yeye. Fu di mi papa nanga mama no ben bribi na ini Gado, meki den no ben si en leki wan ogri sani taki mi ben du afkodrei. Den ben feni taki efu mi ben o du wan sani di mi lobi, dan mi no ben o abi ten moro fu du ogri. Ma na a ten di mi gowe fu skoro, mi ben kon na fesi krutu furu leisi kaba. Mi ben tron wan fu den skinheads, dati ben de wan grupu yonguwan di ben lobi du ogri nanga trawan. Mi ben waka nanga wan skermes èn nanga wan baisigri keti. Mi ben feni wan wroko, ma fosi yu denki mi ben lasi a wroko fu di mi ben musu koti strafu fu wan syatu pisi ten. Di mi komoto na strafu, mi bigin broko sani baka na gebow nanga tra sani fu sma èn skowtu grabu mi. Mi ben musu koti strafu tu yari langa. A krutuman ben taki dati mi no o kenki noiti èn taki mi ben de wan hebi gi a libimakandra.

Baka di mi komoto na strafu, mi miti baka nanga Anita, na uma di mi ben hori nanga en fosi. Wi trow èn fu wan pisi ten mi no ben fufuru moro èn mi no ben du ogri moro. Ma baka wan tu yari mi bigin du ogri baka. Mi bigin broko go fufuru a moni na ini wenkri. Mi bigin gebroiki drugs, mi ben dringi bun furu sopi, èn mi ben waka nanga wan gon. Skowtu ben grabu mi baka èn mi ben musu koti strafu.

A fasi fa mi ben e libi ben gi Anita furu broko-ede. A datra fu en ben gi en dresi gi den senwe fu en, ma a ben taigi en fu broko trow nanga mi, fu di na dati ben o yepi en trutru. Koloku taki a no ben du san a datra taki.

A FASI FA BIJBEL KENKI MI LIBI: Syatu baka di wi trow, Anita studeri Bijbel nanga Yehovah Kotoigi fu wan syatu pisi ten. Bakaten, di mi ben de na strafu fu a lasti leisi, Anita miti baka nanga den Kotoigi. Tapu a srefi dei dati, mi ben begi Gado taki: „Efu yu de trutru, dan sori mi dati.”

Di mi ben komoto na strafu wan tu mun baka dati, dan mi go na a domri fu a kerki na ini a birti èn mi aksi en fu studeri Bijbel nanga mi èn nanga Anita. A ben taki dati a ben o leri wi soso den kerki leri nanga wan begi.

Te fu kaba mi bigin leisi Bijbel. Mi ben fruwondru fu kon sabi taki Bijbel e krutu afkodrei (Deuteronomium 18:10-12). Bakaten mi feni wan Waktitoren di den Kotoigi ben libi gi Anita tapu a dei di mi ben begi Gado fu yepi mi. Den sani di mi ben leisi ben meki taki mi du muiti fu miti den Kotoigi.

Den famiriman nanga mati fu wi èn sosrefi den ogriman nanga suma mi ben e waka, no ben lobi en taki wi ben e studeri Bijbel nanga Yehovah Kotoigi. Sonwan fu den ben taki dati den ben drai mi frustan. Ma fu taki en leti, mi ben musu kon kisi wan krin frustan. Mi ben abi furu swakifasi, a konsensi fu mi no ben wroko bun moro, èn boiti den tra sani di mi no ben du bun, mi ben smoko sowan 60 sikaret wan dei. Den Kotoigi di ben yepi wi fu leri moro fu Bijbel èn den sma fu a gemeente di wi ben abi demakandra nanga den, ben abi furu pasensi nanga switifasi. Te fu kaba, mi ben man tapu nanga den takru gwenti disi.​—2 Korentesma 7:1.

DEN WINI DI MI KISI: Now mi nanga Anita trow 35 yari kaba. Wan fu den pikin fu wi èn tu fu wi granpikin e dini Yehovah tu. Na ini den yari no so langa pasa, mi nanga Anita ben man gebroiki furu fu wi ten fu yepi trawan fu teki leri fu Bijbel.

Fu di wi e dini Yehovah Gado, meki wi abi wan trutru marki na ini a libi. Na ini 1970 wan krutuman ben taki dati mi no o kenki noiti. Ma nanga yepi fu Gado èn nanga yepi fu a tiri fu Bijbel, mi sori a krutuman taki a no ben abi leti.