Bibele Yi Hundzula Vutomi Bya Vanhu

I YINI lexi endleke leswaku xiyimbeleri lexi dumeke xi tshika ku yimbelela kutani xi va muchumayeri wa nkarhi hinkwawo la nga Mbhoni ya Yehovha? I yini lexi pfuneke khamba leri muavanyisi a vuleke leswaku a ri nge he pfuki ri cincile leswaku ri va muaka-tiko lonene? Hlaya hi vutomi bya vona leswaku u kuma tinhlamulo ta swivutiso leswi.

“Ku Hava Loyi A Nga Vaka Hlonga Ra Tihosi Timbirhi.”—ANTOLINA ORDEN CASTILLO

LEMBE RO VELEKIWA: 1962

TIKO: SPAIN

MATIMU YAKWE: MUTLANGI TLHELO XIYIMBELERI

VUTOMI BYA MINA: Ndzi velekeriwe eximutanini xa Tresjuncos, le xifundzheni xa La Mancha. Ndyangu wa ka hina a wu ri ni purasi. Manana a a ri Mukhatoliki kasi Tatana a a ri Muprotestente. Tatana u ndzi dyondzise ku xixima Bibele; minkarhi hinkwayo a ndzi n’wi vona a ri karhi a yi hlaya. Kambe Manana u ndzi kurise tanihi Mukhatoliki naswona a a famba na mina Sonto yin’wana ni yin’wana leswaku hi ya tlangela Masa.

Loko ndzi ri ni malembe ya 15, ndzi rhurhele edorobeni ra Madrid leswaku ndzi ya tshama ni sesi wa mina. A ndzi va kumbuka swinene vatswari va mina kambe ndzi hetelele ndzi tolovele vutomi bya le dorobeni. Loko ndzi ri ni malembe ya 17, ndzi hete tin’hweti ti nga ri tingani ndzi yimbelela ni khampani ya zarzuela, ku nga vuyimbeleri bya ndhavuko bya le Spain lebyi vuriwaka opera. A ndzi swi tsakela swinene naswona ndzi teke xiboho xo va mutlangi. Ndzi tshike xikolo xo dyondzela ku va matsalana kutani ndzi sungula ku tirha ni tikhampani to hambana-hambana ta zarzuela. Hi nkarhi wolowo, ndzi sungule ku rhandzana ni buti wa un’wana wa vanghana va mina. Ndzi titwe ndzi ri ni njombo hileswi a ndzi tirha kahle, ndzi ri ni mali naswona ndzi ri ni jaha.

Ndzi sungule ku endzela tikhampani to hambana-hambana ta zarzuela, ndzi endzele hinkwato ta le Spain ni ta le matikweni man’wana ya le Colombia, Costa Rica, Ecuador na Venezuela. Ndzi tlhele ndzi yimbelela ni mintlawa yo hambana-hambana leyi dumeke ya le Madrid, leyi na yona yi yimbelelaka vuyimbeleri lebyi vuriwaka “La movida madrileña.” Ntlawa wun’wana lowu eka wona a ndzi ri xiyimbeleri-nkulu, wu ve ni ndhuma swinene.

A ndzi swi rhandza swinene ku yimbelela kambe a ndzi nga yi rhandzi ndlela leyi vayimbeleri a va tikhoma ha yona. Ndzi sungule ku karhateka ngopfu hi ndlela leyi ndzi langutekaka ha yona ni ku endla leswaku vanhu va ndzi rhandza tanihi leswi a ndzi ri xiyimbeleri lexi dumeke. Leswi a ndzi dya swakudya leswitsongo, ndzi khomiwe hi vuvabyi byo chava ku dya ni bya makolo.

Hambiswiritano, pakani ya mina a ku ri ku va mutlangi. Eku heteleleni, ndzi amukeriwe exikolweni xa le Madrid xo dyondzela ku va mutlangi. A hi dyondzisiwa leswaku ku va munhu a va mutlangi swi lava leswaku a hetisisa xiphemu xakwe lerova swi nga tikombi nileswaku u le ku tlangeni. Loko ndzi sungule ku tirhisa leswi a va hi dyondzisa swona,  swi endle leswaku ndzi nga ha vi na ntwela-vusiwana. Ndzi sungule ku va ni vutianakanyi.

NDLELA LEYI BIBELE YI HUNDZULEKE VUTOMI BYA MINA HA YONA: A ndzi swi tiva leswaku loko ndzi lava ku va ni timfanelo letinene, ndzi fanele ndzi tikarhata. Kambe a ndzi nga swi tivi leswi a ndzi fanele ndzi swi endla. Ndzi endle xiboho xo ya ekerekeni ya protestente eMadrid, leyi ndzi tshameke ndzi ya eka yona ni vatswari va mina. Ndzi khongele eka Xikwembu, ndzi tirhisa vito ra xona leri nge Yehovha.

Endzhakunyana ka sweswo, Timbhoni ta Yehovha timbirhi ti ndzi endzele ekaya ra mina. Hi hete nkarhi wo leha hi ri karhi hi bula hi Bibele kambe a ndzi kaneta leswi a ti swi dyondzisa. Esther, Mbhoni leyi nkarhi na nkarhi a yi dyondza Bibele na mina, a a ndzi lehisela mbilu. Yena ni ndyangu wakwe va ndzi kombise rirhandzu ni tintswalo. Ndzi sungule ku ya eminhlanganweni ya Timbhoni naswona ndzi hatle ndzi swi xiya leswaku ndzi kume ntiyiso lowu a ndzi wu lava.

A ndza ha ku heta ku dyondzela ku va mutlangi loko ndzi pfulekeriwa hi mintirho yo hambana-hambana. Ndzi nyikiwe xiphemu eka ntlango lowu a wu ta tlangiwa eka yindlu ya mintlango leyi dumeke ya le Madrid. Kambe leswaku ndzi va mutlangi la dumeke, ndzi xiye leswaku a ndzi fanele ndzi tikatsa eka swilo leswi a swi endliwa endlwini ya mintlango. Kambe ndzi endle xiboho xo lava ntirho wun’wana lowu a wu ta ndzi nyika nkarhi wo tirhela Xikwembu. Ndzi vone ntiyiso wa marito ya Yesu lama nge: “Ku hava loyi a nga vaka hlonga ra tihosi timbirhi; hikuva u ta venga yin’wana a rhandza leyin’wana, kumbe u ta namarhela yin’wana a yi langutela ehansi leyin’wana. A mi nge vi hlonga ra Xikwembu ni ra Rifuwo.” (Matewu 6:24) Jaha leri ndzi rhandzaneke na rona ku ringana malembe ya nhungu a ri lwisana ni ripfumelo ra mina, kutani ndzi endle xiboho xo ri tshika. Leswi hinkwaswo a ku nga ri matlangwana.

NDLELA LEYI NDZI VUYERIWEKE HA YONA: Sweswi ndzi pfuna vadyuhari leswaku va titsakisa naswona ntirho lowu a ndzi wu endli nkarhi hinkwawo. Sweswo swi endla leswaku ndzi va ni nkarhi wo tala wo dyondza Bibele ni vanhu lava vulavulaka Xiarabu lava tshamaka endhawini ya ka hina. A hi matlangwana ku dyondza ririmi leri, kambe ndza tiphina hi ku avelana swilo leswinene ni vanhu lava nga ni malwandla ni lava va tiyimiseleke ku dyondza hi Xikwembu.

Loko ndza ha dyondzela ku va mutlangi, vutomi bya mina a byi nga ri na xikongomelo kambe sweswi se byi na xona. Yehovha u ndzi pfune leswaku ndzi va munhu lonene ni la tsakeke.

“Leswi Muavanyisi A Swi Vuleke A Swi Nga Ri Ntiyiso.”—PAUL KEVIN RUBERY

LEMBE RO VELEKIWA: 1954

TIKO: NGHILANDHI

MATIMU YAKWE: KHAMBA LERI NGA NI MADZOLONGA

VUTOMI BYA MINA: Ndzi velekeriwe edorobeni lerikulu ra Dudley leri nga eVupela-dyambu bya Midlands. Ku sukela ndza ha ri ntsongo, Tatana u endle leswaku ndzi rhandza ku hlaya. U tlhele a endla leswaku ndzi rhandza ntumbuluko, hambileswi yena a a pfumela eka dyondzo ya ku tiendlekela ka swilo. U ndzi dyondzise leswaku Xikwembu a xi kona. Hambiswiritano, vatswari va mina a va ndzi yisa exikolweni xa Sonto xa Methodist lexi a xi ri endhawini leyi a hi tshama eka yona.

Loko ndzi ri ni malembe ya  nhungu, ndzi vone vafana van’wana lava tshamaka endhawini ya ka hina va hisa xikepe emugerhweni. Loko maphorisa ma fika ndzi chavile ku ma byela ntiyiso. Vafana volavo va ndzi xungetile. Kutani ndzi hehliwe hi nandzu wolowo naswona leswi swi ndzi hlundzukisile. Leswi swi endle leswaku ndzi onha swikolo swa le ndhawini ya ka hina, tikereke ni tifeme, naswona nhundzu leyi ndzi yi onheke a yi endla magidi ya tirhandi. Loko ndzi ri ni malembe ya khume, ndzi sungule ku tshova tindlu ni switolo leswaku ndzi yiva. A ndzi rhandza ku tlanga hi ndzilo naswona ndzi hise tindhawu to tala. Exikolweni, vadyondzisi a va ndzi teka ndzi ri xipandza-nhloko.

Loko ndzi ri ni malembe ya 12, ndzi kume buku leyi vulavulaka hi swa vungoma naswona ndzi tiendlele bodo ya Ouija. Leswi vatswari va mina a va nga tshembi leswaku Xikwembu xi kona, a va nga swi voni swi bihile ku va ndzi rhandza swilo swa vungoma naswona a va tibyela leswaku swi ta endla leswaku ndzi nga ha karhati. Loko ndzi tshika xikolo, se a ndzi ye ko tala ehubyeni leyi tamelaka milandzu leyi endliwaka hi vana. Ndzi joyine ntlawa wa vanhu lava byevuleke misisi lowu a wu ri ni madzolonga. A ndzi tshama ndzi khome xikaringana ni nketana ya xikanyakanya leswaku ndzi tisirhelela. Ndzi kume ntirho, kambe swi nga si ya kwihi wu ndzi helerile hikwalaho ko khomiwa. Loko ndzi huma, ndzi tlhele ndzi sungula ku onha nhundzu naswona ndzi khomiwile kutani ndzi gweviwa malembe mambirhi. Muavanyisi u vule leswaku a ndzi nge he pfuki ndzi cincile naswona a ndzi fanelanga ndzi tshama ni vaaka-tiko.

Loko ndzi huma ekhotsweni, ndzi tlhele ndzi rhandzana na Anita, ntombhi ya mina ya khale. Hi tekanile, naswona ndzi hete nkarhinyana ndzi nga ha yivi kumbe ku karhata vanhu. Endzhaku ka malembe ma nga ri mangani, ndzi tlhelele eka mikhuva ya mina. Ndzi sungule ku tshova tindhawu ta mabindzu kutani ndzi yiva swisefo swa mali. Ndzi sungule ku tirhisa swidzidziharisi, ndzi nwa ku tlula mpimo naswona se a ndzi ri ni xibamu. Ndzi tlhele ndzi khomiwa kutani ndzi gweviwa ku tshama ekhotsweni.

Ndlela leyi a ndzi hanya ha yona yi endle leswaku Anita a tshikileleka swinene. Dokodela wakwe u n’wi nyike maphilisi yo verhamisa mianakanyo naswona u n’wi byele leswaku u fanele a dlaya vukati. Lexi tsakisaka hileswaku a nga swi endlanga sweswo.

NDLELA LEYI BIBELE YI HUNDZULEKE VUTOMI BYA MINA HA YONA: Loko ha ha ku tekana, Anita u hete nkarhinyana a dyondza Bibele ni Timbhoni ta Yehovha. Loko ndzi ri ekusuhi ni ku huma ekhotsweni, Anita u tlhele a endzeriwa hi Timbhoni. Leswi swi endleke hi siku leri ndzi nga khongela Xikwembu ndzi ku, “Loko u ri kona, ndzi kombela u ndzi pfuna leswaku ndzi swi xiya.”

Endzhaku ka tin’hweti ti nga ri tingani ndzi humesiwile ekhotsweni naswona ndzi ye eka mufundhisi wa le ndhawini ya ka hina kutani ndzi n’wi kombela leswaku a ta dyondzela mina ni nghamu ya mina Bibele. U vule leswaku u ta hi dyondzisa tidyondzo ta kereke ni xikhongelo.

Eku heteleleni, ndzi sungule ku hlaya Bibele. Swi ndzi hlamarisile ku dyondza leswaku Bibele ya byi yirisa vungoma. (Deteronoma 18:10-12) Hi ku famba ka nkarhi ndzi kume Xihondzo xo Rindza lexi Timbhoni ti xi nyikeke Anita hi siku leri ndzi khongeleke Xikwembu leswaku xi ndzi pfuna. Leswi ndzi swi hlayeke swi ndzi susumetele leswaku ndzi tihlanganisa na tona.

Swirho swa ndyangu wa ka hina, vanghana va hina ni vanhu lava a ndzi yiva na vona va khunguvanyekile loko va twa leswaku hi dyondza Bibele ni Timbhoni ta Yehovha. Van’wana a va ehleketa leswaku ndzi cinciwe miehleketo. Entiyisweni sweswo a swi fanerile. A ndzi tsanile swinene, a ndzi fe ripfalo naswona a ndzi dzaha mafole ya kwalomu ka 60 hi siku. Timbhoni leti hi pfuneke leswaku hi dyondza Bibele ni leti a hi hlangana na tona evandlheni ra kwalaho, a ti hi lehisela mbilu naswona a ti ri ni musa. Eku heteleleni, ndzi tshike mikhuva ya mina yo biha.—2 Vakorinto 7:1.

NDLELA LEYI NDZI VUYERIWEKE HA YONA: Sweswi mina na Anita se hi ni malembe ya 35 hi tekanile. Un’wana wa vana va hina ni vatukulu va hina vambirhi va tirhela Yehovha swin’we na hina. Emalembeni lama ha ku hundzaka, mina na Anita hi tirhise nkarhi wa hina wo tala leswaku hi pfuna van’wana leswaku va dyondza Bibele.

Ku tirhela Yehovha Xikwembu swi endle leswaku vutomi bya hina byi va ni xikongomelo. Hi 1970, muavanyisi u byele huvo leswaku a ndzi nge he pfuki ndzi cincile. Kambe hikwalaho ko pfuniwa hi Xikwembu ni nkongomiso wa Bibele, ndzi swi kombisile leswaku leswi muavanyisi a swi vuleke a swi nga ri ntiyiso.