“Jehova i Stap Lukaot Gud Long Mi Olsem We Mi Mi Sipsip Blong Hem”
Yu Save Kam Klosap Long God
“Jehova i Stap Lukaot Gud Long Mi Olsem We Mi Mi Sipsip Blong Hem”
YU TRAEM lukluk pija we i stap long pej ya. Yu luk we man ya blong lukaot long sipsip i holem wan smol sipsip klosap long jes blong hem. ?Yu ting se smol sipsip ya i harem se hem i stap sefgud? Long Ol Sam 23, Baebol i yusum pijatok blong man blong lukaot long sipsip, wetem sipsip blong hem, blong soemaot se Jehova i kea gud long ol man we oli wosipim hem. Jehova i wantem we yumi harem se yumi sefgud, olsem Deved we i trastem Jehova mo i singsing se: “Jehova i stap lukaot gud long mi olsem we mi mi sipsip blong hem.” *—Vas 1 (NW).
Deved we i raetem Sam ya, hem i wan man blong lukaot long sipsip, taem hem i yangfala. Hem i save gud ol samting we ol sipsip oli nidim, mo hem i save gud wok blong man blong lukaot long sipsip. Long laef blong Deved, hem i luk se Jehova i lukaot gud long hem. Taswe hem i raetem Sam ya we ol man oli kolem se “wan singsing blong man we i harem se hem i sefgud mo we i trastem God.” Nem ya Jehova, i kamaot long stat blong Sam ya, mo long en blong hem tu. (Vas 1, 6, NW) Ol tok long medel blong japta ya, oli tokbaot se Jehova i lukaot gud long ol man blong hem long tri defren rod, olsem we man blong lukaot long sipsip i stap lukaot gud long ol sipsip blong hem.—Ol Sam 100:3.
Jehova i lidim ol sipsip blong hem. Ol sipsip we i no gat man blong lukaot long olgeta, oli save go lus. Long sem fasin, yumi tu, yumi nidim wan man blong givhan long yumi blong faenem stret rod we i go kasem laef. (Jeremaea 10:23) Deved i talem se Jehova i stap lidim ol man blong hem, oli go “long ples we i gat gudfala gras long hem,” mo “long kwaet ples we wota i stap ron smol long hem.” Hem i stap lidim olgeta “long ol stret rod.” (Vas 2, 3) Ol pijatok ya oli givhan long yumi blong trastem God. Taem yumi letem God i lidim yumi wetem ol tok blong hem long Baebol, yumi folem rod ya blong laef we i save mekem yumi glad, yumi harem gud, mo yumi harem se yumi sef.
Jehova i lukaot gud long ol sipsip blong hem. Sipos i no gat man blong lukaot long ol sipsip, ol sipsip oli fraet, mo oli no save lukaot long olgeta wanwan. Samtaem ol man blong Jehova oli fesem sam samting long laef blong olgeta we i olsem se oli stap ‘pas long ples we i tudak olgeta i ples blong ded.’ Be Jehova i talem long olgeta se oli no mas fraet. (Vas 4) Jehova i stap lukaot gud long ol man blong hem, mo hem i rere blong givhan long olgeta. Hem i save givim waes mo paoa we oli nidim blong stanap strong agensem ol samting we oli kam blong traem olgeta.—Filipae 4:13; Jemes 1:2-5.
Jehova i givim kakae long ol sipsip blong hem. Ol sipsip oli dipen long man we i lukaot long olgeta, blong hem i faenem kakae blong olgeta. Yumi tu, yumi dipen long God blong i givim ol save blong tijim yumi we i olsem kakae. (Matiu 4:4) Yumi talem bigfala tangkiu long Jehova, God ya we i givim samting long gladhat blong hem. Hem i mekemrere wan tebol long fored blong ol man blong hem we i fulap gud long kakae. (Vas 5) Yumi save kasem ol kakae ya long Baebol mo long ol buk we oli givhan long yumi blong stadi Baebol, olsem magasin ya we yu stap ridim. Ol kakae ya oli givhan long yumi blong save from wanem yumi laef, mo stamba tingting blong God long saed blong yumi.
Deved i harem se hem i sefgud. Hem i save se sipos hem i kam klosap long Jehova, Bigfala Man ya blong lukaot long sipsip, bambae hem i luk se Jehova i kea long hem mo i lavem hem “oltaem long laef blong [hem].” (Vas 6) ?Olsem wanem? ?Yu tu, yu wantem tumas blong stap sef? Sipos yes, i gud yu lanem blong kam klosap long Jehova. Long rod ya, yu save harem se yu sefgud long han blong Bigfala Man ya blong lukaot long sipsip, we i lidim, i lukaot gud, mo i givim kakae long olgeta we oli holemstrong long hem.—Aesea 40:11.
[Futnot]
^ par. 3 Plante man we oli laekem rid, oli save gud tok ya we i talem se “MASTA i stap lukaot gud long mi olsem we mi mi sipsip blong hem.” Blong faenemaot from wanem sam man blong raetem Baebol oli karemaot nem ya Jehova, yu save lukluk buk ya we ol Witnes blong Jehova oli wokem, ?Wanem Samting We Baebol i Rili Tijim? long pej 195-197.