“Jehovah Edi Andibọk Mi”
San̄a Kpere Abasi
“Jehovah Edi Andibọk Mi”
SE NDISE emi odude mi. Omokụt nte ekpemerọn̄ afatde eyenerọn̄ oro akama. Ndi ọmọfiọk nte etiede eyenerọn̄ emi ke idem? Psalm 23 emen nte ekpemerọn̄ esinamde n̄kpọ ye erọn̄ esie odomo ye ima ima ukpeme emi Jehovah esinọde mme andituak ibuot nnọ enye. Enye oyom nnyịn inyene ukem ukpeme oro enye ọnọde mbon oro ẹsinyụn̄ ẹtịn̄de se andiwet psalm ẹketịn̄de uko uko ẹte: “Jehovah edi Andibọk mi.”—Ufan̄ikọ 1.
David, andiwet psalm emi, ekedi ekpemerọn̄ ke ini akparawa esie. Enye ama ọdiọn̄ọ se mme erọn̄ ẹsiyomde ye se idide utom ekpemerọn̄. David emi ama okokụt nte Abasi esikpemede owo ekewet se ẹkotde “psalm idotenyịn m̀mê mbuọtidem emi.” Enyịn̄ Jehovah odu ke ntọn̄ọ ye ke utịt psalm emi. (Ufan̄ikọ 1, 6) Se ẹwetde ke psalm emi owụt usụn̄ ita emi Jehovah esikpemede ikọt esiemmọ nte emi ekpemerọn̄ esikpemede mme erọn̄ esie.—Psalm 100:3.
Jehovah ada mme erọn̄ esie usụn̄. Erọn̄ emi mînyeneke andikpeme esisosop. Nnyịn n̄ko imoyom ẹwụt nnyịn nnennen usụn̄ emi ikpasan̄ade. (Jeremiah 10:23) David ọdọhọ ke Jehovah ada ikọt esie aka “awawa mbiet” ye “mme ebiet nduọkodudu emi mmọn̄ awakde,” onyụn̄ ada mmọ “asan̄a ke usụn̄ edinen ido.” (Ufan̄ikọ 2, 3) Utọ ebiet emi Abasi adade nnyịn aka mi anam ifiọk ke akpana ibuọt idem ye enye. Edieke itienede ndausụn̄ edisana spirit ke ndinam se Bible ọdọhọde, iyodu uwem emi edinamde ikop uyụhọ, inemesịt, ikûnyụn̄ ukop ndịk.
Jehovah ekpeme mme erọn̄ esie. Erọn̄ eke mînyeneke andikpeme esikop ndịk onyụn̄ anana un̄wam. Jehovah ọdọhọ ikọt esie ẹkûkop ndịk, idem ekpededi mmọ ẹsan̄a ke “itịghede ọkpọsọn̄ ekịm”—oro edi, ini emi uwem enen̄erede ọsọn̄ ye mmọ. (Ufan̄ikọ 4) Jehovah esikpeme ikọt esiemmọ onyụn̄ eben̄e idem kpukpru ini ndin̄wam mmọ. Enye esinọ mmọ ọniọn̄ ye odudu man ẹkeme ndiyọ idomo. —Philippi 4:13; James 1:2-5.
Jehovah ọbọk mme erọn̄ esie. Mme erọn̄ ẹsifiọk ke andikpeme mmimọ oyoyom udia ọnọ mmimọ idia. Kpukpru nnyịn n̄ko imoyom udia eke spirit, ndien Abasi kpọt ekeme ndinọ nnyịn udia emi. (Matthew 5:3) Imenen̄ede ikop inemesịt koro Jehovah edi Abasi ntatubọk emi ebride akamba okpokoro ọnọ ikọt esie. (Ufan̄ikọ 5) Bible ye mme n̄wed emi ẹkemede ndida n̄kpep Bible, utọ nte enye emi osụk okotde mi, ẹdi udia eke spirit emi ẹkemede ndinam nnyịn ifiọk ntak emi idude uwem ye se Abasi aduakde ọnọ nnyịn.
Ndịk ikanamke David; enye ama ọdiọn̄ọ ke edieke ikade iso ikpere Andikpeme imọ emi odude ke heaven, ke enye eyekpeme imọ ‘ke ofụri eyouwem imọ.’ (Ufan̄ikọ 6) Ndi omoyom Jehovah etiene ekpeme fi ke ofụri eyouwem fo? Edieke edide ntre, kpep nte akpasan̄ade ekpere Jehovah. Ke ntem, afo udukopke ndịk ke ikpanesịt Akwa Andibọk m̀mê Andikpeme nnyịn, emi adade nnyịn usụn̄, ekpemede nnyịn, onyụn̄ ọbọkde kpukpru mbon oro ẹsọn̄ọde ẹda ye enye.—Isaiah 40:11.
Itie Bible emi okpokotde ke May: