“A Noqui Vakatawa ko Jiova”
Toro Voleka Vua na Kalou
“A Noqui Vakatawa ko Jiova”
RAICA mada na iyaloyalo ena tabana qo. O rawa ni vakila na nona nuidei na luve ni sipi e keve toka ena lomaserena na kena ivakatawa? Na iVolatabu e vakayagataka na ivakarau ni vosa na metaphor ena Same 23, e vakatauvatani kina na nona karoni ira na nona dauveiqaravi o Jiova kei na nona karona na nona sipi e dua na ivakatawa. E vinakata meda vakila na lomavakacegu vata ga era vakila o ira era vakataki Tevita na daunisame, era rawa ni kaya ena nuidei: “A noqui vakatawa ko Jiova.” *—Tikina e 1.
E ivakatawa ni sipi ni se cauravou o Tevita, a vola na same qo. E kila na ka e vinakata na sipi kei na itavi ni ivakatawa. A vakadinadinataka sara ga na veikaroni ni Kalou o Tevita qai vola na ka e vakatokai me “same ni veivakadeitaki” se same e vakanuideitaki kina e dua. Na yaca ni Kalou, Jiova e volai ena imatai kei na iotioti ni tikina ni Same 23. (Tikina e 1, 6) Na vo ni tikina ena same qori e vakamacalataka e tolu na sala e karoni ira kina na nona dauveiqaravi o Jiova me vaka ga na nona karona na nona sipi e dua na ivakatawa.—Same 100:3.
O Jiova e tuberi ira nona sipi. Era dau sese na sipi ke sega na kedra ivakatawa. Ena vinakati tale ga meda vukei meda rawa ni lewa vinaka na noda ilakolako. (Jeremaia 10:23) E vakamacalataka o Tevita ni o Jiova e dau tuberi ira na nona tamata ena “vanua veico drokadroka” kei na “bati ni uciwai sa drodro malua.” E tuberi ira ena “sala dodonu.” (Tikina e 2, 3) Na ivakaraitaki ni sipi kei na kena ivakatawa e vakadeitaka nida rawa ni nuitaka na Kalou. Nida muria na nona veidusimaki ena iVolatabu, eda na muria na ivakarau ni bula ena vakilai kina na vakacegu, marau kei na nuidei.
Taqomaki ira. Na sipi e sega na kedra ivakatawa era sega ni rawa ni taqomaki ira ra qai rerere. E tukuna vei ira na nona dauveiqaravi o Jiova mera kua ni rere ke ra “lako e loma ni buca ni yaloyalo ni mate” se na gauna era rarawa kina. (Tikina e 4) E vakaraici ira o Jiova qai tu vakarau me vukei ira. E rawa ni vakavukui ira era sokaloutaki koya qai vakaukauataki ira mera vosota na veivakatovolei.—Filipai 4:13; Jemesa 1:2-5.
Vakani ira. Na sipi era vakararavi vua na kedra ivakatawa me vakani ira. Eda rawa ni vakacegui vakayalo ena veivuke ga ni Kalou. (Maciu 5:3) Eda kalougata ni daulomasoli o Jiova, e vakarautaka na magiti vakayalo vei ira era qaravi koya. (Tikina e 5) Na iVolatabu kei na kena ivola ni vuli wili kina na kena o wilika tiko qo, era ivurevure ni kakana vakayalo e vakacegui kina na noda via kila na ibalebale ni bula kei na inaki ni Kalou me baleti keda.
E lomavakacegu o Tevita ni kila ke voleka tiko ga vua na nona iVakatawa vakalomalagi, ena karoni koya vakayalololoma o Jiova ena “veisiga kece ga ni [nona] bula.” (Tikina e 6) O vinakata mo lomavakacegu tale ga va qori? Ke vaka kina, mo vulica na sala o rawa ni volekati Jiova kina. O na rawa gona ni nuidei ena ligana na iVakatawa Levu, e dau tuberi ira era yalodina tiko ga vua, e taqomaki ira qai vakani ira.—Aisea 40:11.
Wili iVolatabu e Vakatututaki ena Me:
[iVakamacala e ra]
^ para. 1 E levu na dauwiliwili era kila vinaka ga na ivakadewa qo “A Noqu iVakatawa na TURAGA.” Ke o via kila na vuna era sega ni biuta kina na yaca ni Kalou, Jiova, eso na ivakadewa ni iVolatabu, raica na tabana e 195-197 ni ivola Na Cava Sara Mada e Kaya na iVolatabu? tabaka na iVakadinadina i Jiova.