Dirava Kahirakahira Oi Lao

‘Iehova be Lau Ia Naria Tauna’

MANI inai rau ai ia noho laulau oi itaia. Mamoe naria tauna ese ena mamoe ia rosia, unai oi itaia neganai, mamoe ena hemami oi laloa diba, a? Salamo 23 ai, mamoe naria tauna bona ena mamoe edia haheitalai ia noho, unai haheitalai amo Iehova ese ena hesiai taudia ia naria dalana ia hahedinaraia. Iehova ia ura ena henari dainai hemami namona ita abia, Salamo torea tauna bamona, mai lalogoada ida ita gwau: ‘Iehova be lau ia naria noho, mamoe naria tauna bamona.’ a​—Siri 1, BHğ.

Salamo torea tauna Davida ia matamata neganai, ia be mamoe ia naria. Ia ese mamoe edia ura gaudia bona mamoe naria tauna ena maduna idauidau ia diba. Dirava ena henari karana ia mamia tauna, Davida, ese Salamo 23 ai unai ia gwauraia. Dirava ena ladana, Iehova, be Salamo 23 ena siri matamanai bona dokonai ia hedinarai. (Siri 1, 6, BHğ) Mamoe naria tauna ese ena mamoe ia naria bamona, siri 2 ia lao 5 ai, Iehova ese ena taunimanima ia naria daladia toi ia hahedinaraia.​—Salamo 100:3.

Iehova ese ena mamoe ia hakaudia. Mamoe naria tauna be lasi neganai, mamoe idia boio. Unai hegeregerena, dala maoronai ita raka totona, heduru ita abia be namo. (Ieremia 10:23) Davida ia gwau, Iehova ese ena taunimanima be ‘rei bona ranu namona gabunai’ ia hakaudia lao. Ia ese “kara maoromaoro daladia dekenai” idia ia hakaua lao. (Siri 2, 3) Unai laulau herevadia ese ita ia hagoadaia Dirava ita abidadama henia totona. Baibel ai Dirava ena hakaua herevadia ita badinaia neganai, eda mauri lalonai do ita moale bona do ita noho namo.

Iehova ese ena mamoe ia gimadia. Mamoe naria tauna be lasi neganai, mamoe idia gari bona idia mamia ta ese ia durudia lasi. Iehova ese ena taunimanima ia hamaoroa, “dibura koura gabuna” anina be, edia mauri lalonai hekwakwanai badadia idia davaria neganai, idia gari lasi be namo. (Siri 4) Iehova ese idia ia naria, bona Ia noho hegaegae idia ia durua totona. Ia idia tomadiho henia taudia dekenai aonega bona goada ia henia, hahetoho idauidau idia haheaukalaia totona.​—Filipi 4:13; Iamesi 1:​2-5.

Iehova ese ena mamoe ia ubudia. Mamoe idia ura edia naria tauna be idia dekenai aniani ia henia. Dirava sibona ena heduru amo Ia do ita dibaia. (Mataio 5:3) Ita moale badina Iehova be hariharibada Diravana, iena hesiai taudia totona aniani momo ia hegaegaelaia. (Siri 5) Baibel bona Baibel bukadia hegeregere, hari oi duahia Gima Kohorona, be Iehova ese ia henia lauma aniani ta, unai amo ita ese mauri ena anina bona Dirava ena ura do ita diba.

Davida ia diba Iehova kahirakahira ia noho neganai, “[ena] mauri dinadia ibounai lalonai,” Iena henari karana ia mamia. (Siri 6) Oi ura unai bamona oi noho namo, a? Bema oibe, Iehova kahirakahira oi lao dalana oi diba be namo. Unai amo do oi mamia oi be Mamoe Naria Tauna Badana ena imana lalonai oi noho. Ia idia badinaia taudia be Ia ese do ia hakaua, gimaia, bona ubua.​—Isaia 40:11.

[Futnout]