“Ni Jehova ti Pastorko”
Umadanika iti Dios
“Ni Jehova ti Pastorko”
KITAEM ti ladawan iti daytoy a panid. Mariknam kadi ti kinatalged ti kordero nga inubba ti pastorna? Iti Salmo 23, inusar ti Biblia ti pangngarig maipapan iti maysa a pastor ken ti karnerona a mangyilustrar iti nadungngo a panangtaripato ni Jehova kadagiti agdaydayaw kenkuana. Kayatna a mariknatayo ti kinatalged a mapaspasaran dagidiay kas ken David a kombinsido nga agkuna: “Ni Jehova ti Pastorko.” a—Bersikulo 1.
Ni David, a nangisurat iti daytoy a Salmo, ket maysa a pastor idi agtutubo pay. Ammona ti kasapulan dagiti karnero ken dagiti rebbengen ti pastor. Yantangay napasaranna ti panangaywan ni Jehova, insuratna ti makunkuna a “salmo ti pammatalged ken panagtalek.” Agparang ti nagan ti Dios a Jehova, iti pangrugian ken iti pagnguduan daytoy a salmo. (Bersikulo 1, 6) Iti Bersikulo 2 agingga iti 5, nadeskribir ti tallo a pamay-an ni Jehova a mangaywan iti ilina a kas iti panangaywan ti pastor kadagiti karnerona.—Salmo 100:3.
Iturong ni Jehova dagiti karnerona. Mabalin a mayaw-awan dagiti karnero no awan ti pastorda. Iti umasping a pamay-an, kasapulantayo ti tulong tapno masarakantayo ti umiso a dana ti biag. (Jeremias 10:23) Ilawlawag ni David nga iturturong ni Jehova ti ilina iti “naraber a pagaraban” ken kadagiti “nasayaat-pannakapadanumna a lugar.” Iturongna ida kadagiti “desdes ti kinalinteg.” (Bersikulo 2, 3) Dagitoy a nagsayaat a deskripsion ipanamnamada a makapagtalektayo iti Dios. No surotentayo ti panangiturong ti espirituna kas mabasa iti Biblia, agbalinto a makapnek, makapabang-ar, ken natalged ti biagtayo.
Salakniban ni Jehova dagiti karnerona. Mabutbuteng ken awan gawgaway dagiti karnero no awan ti pastorda. Ibaga ni Jehova a saan koma nga agbuteng ti ilina, ‘uray no magnada iti ginget ti napuskol a kinasipnget’—bayat ti arigna kasisipngetan a kanito iti biag. (Bersikulo 4) Bantayan ida ni Jehova, a sisasagana a tumulong kadakuada. Maipaayna kadagiti agdaydayaw kenkuana ti sirib ken bileg a kasapulanda tapno masarangetda dagiti pakasuotan.—Filipos 4:13; Santiago 1:2-5.
Taraonan ni Jehova dagiti karnerona. Ti pastor ti pagpannurayan dagiti karnero iti taraon. Adda naespirituan a kasapulantayo a mapennek laeng babaen iti tulong ti Dios. (Mateo 5:3) Agyamantayo ta naparabur ni Jehova, a nangisagana kadatayo iti lamisaan nga addaan iti nawadwad a taraon. (Bersikulo 5) Ti Biblia ken dagiti katulongan a mangadal iti dayta, kas iti daytoy a magasin a basbasaem, ket naglaon iti naespirituan a taraon a mangpennek iti kasapulantayo tapno maammuantayo ti kaipapanan ti biag ken ti panggep ti Dios kadatayo.
Natalged ti rikna ni David ta ammona a no agtultuloy a nasinged iti nailangitan a Pastorna, mapasaranna ti nadungngo a panangaywan ni Jehova iti “amin nga al-aldaw ti panagbiag[na].” (Bersikulo 6) Tartarigagayam kadi ti kasta a kinatalged? No wen, ammuem no kasanoka nga umadani ken Jehova. Iti kasta, natalgedto ti riknam kadagiti takiag ti Naindaklan a Pastor, a mangiturong, mangsalaknib, ken mangpakan kadagidiay agtalinaed a nasungdo kenkuana.—Isaias 40:11.
Singasing a basaen iti Biblia iti Mayo:
[Footnote]
a Adu nga agbasbasa ti pamiliar iti patarus a “Ti APO ti Pastorko.” Tapno maammuam no apay a saan nga inaramat ti dadduma a Biblia ti nagan ti Dios a Jehova, kitaem ti panid 195-197 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.