Kuhĩrĩria Ngai

“Jehova Nĩwe Mũrĩithi Wakwa”

TA RORA mbica ĩrĩa ĩrĩ karatathi-inĩ gaka. Hihi nĩ ũrona ũrĩa kagondu kau karaigua karĩ na ũgitĩri gĩthũri-inĩ kĩa mũrĩithi wako? Thĩinĩ wa Thaburi 23, Bibilia ĩhũthĩrĩte ngerekano ya mũrĩithi na ng’ondu ciake kuonania tha cia Jehova harĩ arĩa mamũthathayagia. Endaga tũigue tũrĩ na ũgitĩri ũrĩa ũkoragwo na arĩa mangiuga ta mũtungi wa Thaburi Daudi marĩ na ũmĩrĩru, “Jehova nĩwe mũrĩithi wakwa.” a​—Mũhari wa 1.

Daudi, mwandĩki wa Thaburi ĩno, aatuĩkire mũrĩithi kuuma arĩ mũnyinyi. Nĩ aamenyaga mabataro ma ng’ondu na wĩra ũrĩa mũrĩithi agĩrĩirũo nĩ kũruta. Tondũ nĩ eeyoneire ũrĩa Ngai aamũrũmbũyagia, rwĩmbo rũrũ aandĩkire nĩ rwĩtagwo “Thaburi ya kũũmĩrĩria kana ya mwĩhoko.” Rĩĩtwa rĩa Ngai, Jehova, rĩrĩ mũhari-inĩ wa kĩambĩrĩria na wa kũrĩkĩrĩria wa Thaburi ĩyo. (Mĩhari ya 1, 6) Ciugo cia mĩhari ĩyo ĩngĩ ĩrĩ gatagatĩ nĩ ironania njĩra ithatũ iria Jehova ahũthagĩra kũrũmbũiya andũ ake o ta ũrĩa mũrĩithi arũmbũyagia ng’ondu ciake.​—Thaburi 100:3.

Jehova nĩ atongoragia ng’ondu ciake. Ng’ondu itarĩ na mũrĩithi wacio no ciũre na njĩra hũthũ. Ona ithuĩ no taguo tũbataraga gũteithio nĩguo tũmenye njĩra ĩrĩa yagĩrĩire ũtũũro-inĩ. (Jeremia 10:23) Daudi, aatarĩirie atĩ, Jehova atongoragia andũ ake harĩ “nyeki nduru” na harĩ “maĩ o marĩa me na ũhurũko.” Akamatongoragia “na njĩra cia ũthingu.” (Mĩhari ya 2, 3) Maũndũ macio megiĩ ũrĩithi nĩ matũmaga tũgĩe na ma atĩ no twĩhoke Ngai. Tũngĩrũmĩrĩra ũtongoria wa roho wake ta ũrĩa ũhaana thĩinĩ wa Bibilia, tũngĩkorũo tũkĩrũmĩrĩra njĩra ĩngĩtũma tũiganĩre, tũcanjamũke na tũigue tũrĩ na ũgitĩri.

Jehova nĩ agitagĩra ng’ondu ciake. Ng’ondu itarĩ na mũrĩithi wacio, nĩ ciĩtigagĩra, nĩ irĩ guoya, na itirĩ hinya. Jehova eraga andũ ake atĩ matiagĩrĩirũo nĩ gwĩtigĩra, o na rĩrĩa ‘marahungurĩra mũkuru wa nduma ta ya gĩkuũ’—mahinda marĩa ũtũũro ũngĩkorũo ũrĩ mũritũ mũno. (Mũhari wa 4) Jehova akoragwo akĩmarora, eharĩirie kũmateithia hĩndĩ ciothe. No ahe arĩa mamũthathayagia ũũgĩ na hinya ũrĩa marabatara nĩguo mahote kũhiũrania na magerio.​—Afilipi 4:13; Jakubu 1:2-5.

Jehova nĩ aheaga ng’ondu ciake irio. Ng’ondu ikoragwo ciĩhokete mũrĩithi wacio nĩguo cione gĩa kũrĩa. Tũkoragwo na mabataro ma kĩĩroho marĩa arĩ o Ngai wiki ũngĩtũteithia kũmahingia. (Mathayo 5:3) Wega nĩ atĩ, Jehova nĩ Mũtaana mũno, aigagĩra ndungata ciake metha ĩrĩ na irio nyingĩ. (Mũhari wa 5) Bibilia hamwe na mabuku marĩa matũteithagia kwĩruta Bibilia, ta ngathĩti ĩno ũrathoma-rĩ, nĩ kĩhumo kĩa irio cia kĩĩroho iria itũteithagia kũmenya bata wa ũtũũro na muoroto wa Ngai harĩ ithuĩ.

Daudi aaiguaga arĩ mũgitĩre, nĩ kũmenya atĩ angĩatũũrire hakuhĩ na Mũrĩithi wake wa igũrũ, nĩ angĩakeneire kũrũmbũiyo na njĩra ya wendo nĩ Jehova ‘matukũ mothe ma muoyo wake.’ (Mũhari wa 6) Hihi nĩ wĩriragĩria kũgĩa na ũgitĩri ta ũcio? Angĩkorũo nĩguo-rĩ, wĩrute ũrĩa ũngĩkuhĩrĩria Jehova. Ũngĩka ũguo no ũigue ũrĩ mũgitĩre moko-inĩ ma Mũrĩithi ũrĩa Mũnene, ũrĩa ũtongoragia, akagitĩra, na akahe irio arĩa matũũraga marĩ ehokeku harĩ we.​—Isaia 40:11.

[Kohoro ka magũrũ-inĩ]