Fwenai Kudi Leza

“Yehova I Mukumbi Wami”

TALA kifwatulo kidi pa dino dyani. Lelo ubamone mutyima-ntenke udi na kano kana ka mukōko mu kyandi kya mukumbi wako? Mu Mitōto 23, Bible i mwingidije kyelekejo kya mukumbi ne mikōko yandi mwanda wa kulombola muswelo utele Yehova batōtyi bandi mutyima. Witusakilanga twikale na mutyima-ntenke wikalanga na boba banena na kikulupiji pamo bwa Davida, mulembi wa mitōto amba: “Yehova i Mukumbi wami.” *—Vese 1.

Davida, mulembi wa uno mutōto, wādi mukumbi tamba ku bunkasampe. Wādi uyukile bisakilwa mikōko ne mwikadile mwingilo wa bukumbi. Davida, wēmwenine mu bwandi būmi buledi bwa Leza, wāsonekele kyokya kyatelelwe bu “mutōto wa kikulupiji.” Dijina Yehova i ditelwe ku ñanjilo ne ku mfulo kwa luno lwimbo lwa mitōto. (Vese 1, 6) Binenwa bidi pa bukata bilombola miswelo isatu ilelanga Yehova bantu bandi pamo bwa mukumbi ulela luombe lwandi.—Mitōto 100:3.

Yehova wendejanga mikōko yandi. Mikōko yampikwa mukumbi ibwanya kujimina. Netu mo monka, tusakilwa bukwashi pa kusaka kusokola dishinda dya būmi. (Yelemia 10:23) Davida ushintulula amba Yehova uludikilanga bantu bandi ku “madyo a lumenya” ne ku “mema atalala, nyā.” Wibalombolanga “mu mashinda malumbuluke.” (Vese 2, 3) Kino kyelekejo kya bukumbi kitutonona tukulupile Leza. Shi tulonde bwendeji bwa mushipiditu wandi bulombwelwe mu Bible, nabya, tukalondalonda dishinda dya būmi ditupa kuloelelwa, mutyima mutūke ne mutyima-ntenke.

Yehova ulamanga mikōko yandi. Shi mukumbi kadipo’po, mikōko imvwananga moyo ne kubulwa bukwashi. Yehova ulombolanga bantu bandi amba kebadipo ne kyobakwatyilwa moyo nansha shi bapityile “mu kipakasa kya mujiñininya wa lufu”—kitatyi kimweka bu kya mfindi mikatampe mu būmi. (Vese 4) Yehova wibatalanga, ne udi pabwipi mwanda wa kwibakwasha. Ubwanya kupa batōtyi bandi tunangu ne bukomo bobasakilwa mwa kulwila na matompo.—Fidipai 4:13; Yakoba 1:2-5.

Yehova udishanga mikōko yandi. Mikōko italanga enka kudi mukumbi wayo mwanda wa kusokola kakudya. Netu tusakilwa bidibwa bya ku mushipiditu byotubwanya kupebwa enka na bukwashi bwa Leza. (Mateo 5:3) Dyese, Yehova Mwine upāna na buntu, i mutūdile’ko bantu bandi mesa a bidibwa binune. (Vese 5) Bible ne mabuku esambila pa Bible, kimfwa uno julunale otanga’u, i nsulo ya bidibwa bya ku mushipiditu bipwa nzala yetu ya kuyuka kyotwikadile’ko ne mpango ya Leza kotudi.

Davida wādi na mutyima-ntenke, wādi uyukile amba shi ashale nyeke pabwipi na Mukumbi wandi wa mūlu, nabya ukemwena buledi bwa buswe bwa Yehova “mafuku onsololo a būmi [bwandi].” (Vese 6) Lelo wabilanga uno mutyima-ntenke? Nankyo, wifunde muswelo obwanya kufwena kudi Yehova. Mu uno muswelo, ukemvwana mutyima-ntenke mu maboko a Mukumbi Mukatampe, mwine wendejanga, ulamanga, ne udisha boba bashala na kikōkeji kwadi.—Isaya 40:11.

[Kunshi kwa dyani]