Tjhidela KuZimu

‘UJehova UnguMelusi Wami’

QALA isithombe esisekhasineli. Uyakubona ukuvikeleka kwelamjana elibanjelwe esifubeni sakamelusalo? KuRhalani 23, iBhayibhili isebenzisa isingathekiso sakamelusi nezimvu zakhe ukufanisa ukutlhogomela kwethando uJehova akunikela abakhulekeli bakhe. Ufuna sizwe ukuvikeleka okufunyanwa ngilabo, abangatjho ngokuqiniseka njengomrhalani uDavidi bona: ‘UJehova unguMelusi wami.’ *—Ivesi 1.

Umtloli werhalaneli, uDavidi, waba ngumelusi asesemutjha. Uyazazi iintlhogo zezimvu neemthwalo kamelusi. UDavidi, owakhe wezwa ukutlhogomela kwakaZimu epilwenakhe watlola lokho ebekubizwa ngokobana “lirhalani lokuqiniseka namtjhana lethemba.” Ibizo lakaZimu elithi, Jehova, livela ekuthomeni nekupheleni kwerhalaneli. (Amavesi 1, 6) Amezwi aphakathi ahlathulula iindlela eentathu uJehova atlhogomela ngazo abantu bakhe njengomelusi atlhogomela izimvu zakhe.—IRhalani 100:3.

UJehova udosa phambili izimvu zakhe. Izimvu ngaphandle komelusazo zilahleka lula. Ngokufanako, sitlhoga irhelebho ukufumana indlela elungileko eya ekuphileni. (Jeremiya 10:23) UDavidi uhlathulula bona uJehova, unqophisa abantu bakhe “emadlelweni alihlaza” godu ‘nemanzini apholileko.’ Ubadosela ‘eendleleni ezilungileko.’ (Amavesi 2, 3) Iimfanekiso ephathelene nokufuya le isiqinisekisa bona singamethemba uZimu. Ngokulandela iinqophiso zakaZimu ngokuvumelana neBhayibhili, singalwela ukufikelela indlela yokuphila eletha ukwaneliseka, ukuqabuleka nokuvikeleka.

UJehova uvikela izimvu zakhe. Ngaphandle komelusazo, izimvu ziba nokwesaba begodu azikghoni ukuzirhelebha. UJehova utjela abantu bakhe bona akukafuzi besabe, ngitjho nanyana ‘bakhamba ngerharheni lethunzi lokufa’—hlangana neenkhathi ezibudisi ekuphileni. (Ivesi 4) UJehova uyabaqala, uhlala akulungele ukubarhelebha. Angapha abakhulekeli bakhe ukuhlakanipha namandla abawatlhogako bona bakwazi ukuqalana neenlingo.—KwebeFilipi 4:13; KaJakobosi 1:2-5.

UJehova wondla izimvu zakhe. Izimvu zithembele kumelusazo bona azifumanele ukudla. Sinetlhogo engokomoya engazaliswa kwaphela ngerhelebho lakaZimu. (Matewu 5:3) Ngokuthabisako, uJehova nguMondli onesandla esivulekileko, ohlela phambi kweenceku zakhe itafula elinokudla okunengi. (Ivesi 5) IBhayibhili neencwadi ezilirhebho ekufundeni iBhayibhili, njengomagazini owufundako lo, ziimthombo wokudla okungokomoya owanelisa itlhogeko yethu yokwazi umnqopho wokuphila nehloso kaZimu ngathi.

UDavidi wazizwa avikelekile azi bona nekahlala aseduze noMelusi wakhe wezulwini, uzokuzwa ukutlhogomela kwethando kwakaJehova ‘imihla yoke yokuphila [kwakhe].’ (Ivesi 6) Uyakufuna ukuvikeleka okunjalo? Nengabe kunjalo, funda indlela ongatjhidela ngayo kuJehova. Ngokwenza njalo ungazizwa uphephile ezandleni zakaMelusi oMkhulu, odosa phambili, avikele begodu ondle labo abahlala bathembekile kuye.—Isaya 40:11.

[Umtlolo waphasi]